អ្នកលក់ដូរនិងអ្នកប្រើប្រាស់មានទស្សនៈដូចគ្នាថា រដូវកាលទិញទំនិញនៅទិវាអ្នកនៅលីវ (Singles' Day) នៅក្នុងប្រទេសចិនកាលពីថ្ងៃទី១១ ខែវិច្ឆិកាកន្លងទៅនេះ មិនសូវមានភាពហ៊ឹកហ៊ាក់ដូចកាលពីប៉ុន្មានឆ្នាំមុនទេ ស្របពេលដែលក្រុមហ៊ុនពាណិជ្ជកម្មអនឡាញនានាបានងាកទៅបរទេសសម្រាប់ការរីកចម្រើនរបស់ខ្លួន។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
ព្រឹត្តិការណ៍ប្រចាំឆ្នាំនេះត្រូវបានដាក់ឈ្មោះតាមទម្រង់លេខនៃថ្ងៃទី១១ ខែ១១ និងបានចាប់ផ្ដើមដំបូងដោយក្រុមហ៊ុនពាណិជ្ជកម្មអនឡាញ Alibaba ដែលផ្ដល់ការបញ្ចុះតម្លៃដ៏គួរឱ្យទាក់ទាញដើម្បីទាក់ចិត្តអ្នកទិញឱ្យចំណាយច្រើន។ ចាប់តាំងពីពេលនោះមក ព្រឹត្តិការណ៍ដ៏អធិកអធមនេះបានពង្រីកដល់វេបសាយពាណិជ្ជកម្មអនឡាញផ្សេងទៀតដូចជា JD.com និង Pinduoduo ជាដើមនៅក្នុងប្រទេសចិនក៏ដូចជានៅបរទេស។
ទោះបីជាទិវាអ្នកនៅលីវនេះពីដំបូងគឺជាព្រឹត្តិការណ៍ដែលធ្វើឡើងតែមួយថ្ងៃក៏ដោយ ក៏វេបសាយពាណិជ្ជកម្មអនឡាញនានានៅក្នុងប្រទេសចិនឥឡូវនេះបានចាប់ផ្ដើមតាំងពីប៉ុន្មានសប្ដាហ៍មុនទិវានេះម្ល៉េះដើម្បីបង្កើនការលក់។ ព្រឹត្តិការណ៍នេះក៏ត្រូវបានគេចាត់ទុកថា ជាការវាស់វែងអំពីអារម្មណ៍របស់អ្នកប្រើប្រាស់ផងដែរកាលពីមុន។
ប៉ុន្តែនៅចំពេលដែលសេដ្ឋកិច្ចចិនកំពុងចុះខ្សោយដែលបណ្ដាលមកពីវិបត្តិអចលនទ្រព្យនិងសម្ពាធបរិត្តផរណា អ្នកប្រើប្រាស់លែងចំណាយហ៊ឹកហ៊ាក់លើការទិញទំនិញនានាក្នុងអំឡុងព្រឹត្តិការណ៍ដ៏អធិកអធមនេះទៀតហើយ។
អ្នកស្រី Wang Haihua ដែលជាម្ចាស់ក្លឹបហាត់ប្រាណមួយកន្លែងនៅក្នុងទីក្រុងប៉េកាំង បាននិយាយថា៖ «ខ្ញុំចំណាយលុយតែប៉ុន្មានរយយ័នប៉ុណ្ណោះលើរបស់របរចាំបាច់ប្រចាំថ្ងៃ»។
អ្នកស្រី Wang បានបន្ថែមថា តម្លៃទំនិញនៅលើវេបសាយពាណិជ្ជកម្មអនឡាញក្នុងអំឡុងទិវាអ្នកនៅលីវនេះគឺមិនប្រាកដថាថោកជាងតម្លៃទំនិញនៅពេលធម្មតានោះទេ។
លោក Zhang Jiewei អាយុ ៣៤ ឆ្នាំដែលជាម្ចាស់ហាងកាត់សក់មួយកន្លែងនៅក្នុងទីក្រុង Xi’an មានទស្សនៈដូចអ្នកស្រី Wang ដែរ ដោយបាននិយាយថា លោកលែងទុកចិត្តការផ្សព្វផ្សាយបញ្ចុះតម្លៃទំនិញនៅទិវាអ្នកនៅលីវទៀតហើយ ដោយសារតែអ្នកលក់ខ្លះមានទំនោរដំឡើងតម្លៃទំនិញធម្មតាមុនពេលផ្ដល់ការបញ្ចុះតម្លៃ ដោយធ្វើឱ្យអ្នកប្រើប្រាស់យល់ថា ពួកគេកំពុងទិញទំនិញក្នុងតម្លៃមួយដ៏ល្អ។
លោក Zhang បាននិយាយថា៖ «ខ្ញុំធ្លាប់ទិញទំនិញជាច្រើនកាលពីពីរឬបីឆ្នាំមុន ហើយខ្ញុំថែមទាំងទិញទូរស័ព្ទដៃទៀតផងក្នុងទិវាអ្នកនៅលីវនោះ»។
លោកបានបន្ថែមថា៖ «ខ្ញុំបានឈប់ធ្វើដូច្នេះនៅក្រោយវិបត្តិជំងឺកូវីដ១៩ ដោយសារតែចំណូលតិចជាងមុន។ ឆ្នាំនេះ ខ្ញុំមិនទិញអ្វីទាំងអស់»។
អ្នកជំនាញខ្លះថា វិធានការជំរុញសេដ្ឋកិច្ចរបស់រដ្ឋាភិបាលចិនកាលពីពេលថ្មីៗនេះមានឥទ្ធិពលបន្តិចបន្តួចប៉ុណ្ណោះក្នុងការបង្កើនទំនុកចិត្តរបស់អ្នកប្រើប្រាស់។
លោក Shaun Rein ដែលជាស្ថាបនិកនិងជានាយកគ្រប់គ្រងក្រុមហ៊ុន China Market Research Group នៅក្នុងទីក្រុងសៀងហៃ ប្រទេសចិន បានថ្លែងថា៖ «មនុស្សម្នាមិនចាប់អារម្មណ៍ក្នុងការចំណាយនោះទេហើយកំពុងកាត់បន្ថយការចំណាយលើការទិញរបស់ថ្លៃៗ។ តាំងពីខែតុលា ឆ្នាំ ២០២២ មក សេដ្ឋកិច្ចទន់ខ្សោយ មានន័យថាទំនិញគ្រប់មុខត្រូវបានដាក់លក់បញ្ចុះតម្លៃពេញមួយឆ្នាំ ដូច្នេះទិវាអ្នកនៅលីវគឺមិនបានធ្វើឱ្យទំនិញចុះថ្លៃបន្ថែមទៀតជាងខែមុនទិវានេះនោះទេ»។
អ្នកលក់ដែលជាធម្មតាចូលរួមនៅក្នុងព្រឹត្តិការណ៍លក់ដូរទំនិញនៅទិវាអ្នកនៅលីវនេះបានបញ្ជាក់ថា ថ្លៃចូលរួមគឺលែងចំណេញទៀតហើយនៅពេលដែលថ្លៃផ្សាយពាណិជ្ជកម្មខ្ពស់និងការលក់មិនដូចបំណង។
លោក Zhao Gao ដែលគ្រប់គ្រងរោងចក្រកាត់ដេរមួយកន្លែងក្នុងខេត្ត Zhejiang បាននិយាយថា បន្ទាប់ពីចំណាយលើថ្លៃផ្សាយពាណិជ្ជកម្មដល់ក្រុមហ៊ុនពាណិជ្ជកម្មអនឡាញហើយ លោកបានទូទាត់រួចខ្លួនតែនៅពេលការលក់បានបញ្ចប់រួចរាល់ផង។
លោកថ្លែងដូច្នេះថា៖ «វេបសាយពាណិជ្ជកម្មអនឡាញទាំងនោះមានលក្ខខណ្ឌជាច្រើនសម្រាប់ការផ្សព្វផ្សាយបញ្ចុះតម្លៃ ហើយអតិថិជនបានចាប់ផ្ដើមសង្ស័យ។ ក្នុងនាមជាអ្នកលក់ម្នាក់ ខ្ញុំលែងចូលរួមនៅក្នុងការផ្សព្វផ្សាយបញ្ចុះតម្លៃក្នុងទិវាអ្នកនៅលីវនេះទៀតហើយ»។
អ្នកលក់ម្នាក់ទៀតឈ្មោះ Du Baonian ដែលមានក្រុមហ៊ុនម្ហូបអាហារច្នៃសាច់ចៀមនៅក្នុងតំបន់ Inner Mongolia បាននិយាយថា ការលក់ជាទូទៅកាលពីមួយឆ្នាំមុនបានធ្លាក់ចុះ ១៥% ដោយសារតែអ្នកប្រើប្រាស់លែងសូវចំណាយនិងកាត់បន្ថយការប្រើប្រាស់។
លោក Du បាននិយាយថា៖ «យើងឃើញចំណូលធ្លាក់ចុះ ប៉ុន្តែការផ្សាយពាណិជ្ជកម្មនៅលើវេបសាយពាណិជ្ជកម្មអនឡាញអាចជួយយើងឱ្យរក្សាជំហរលក់នាំមុខរបស់យើងបាន»។ លោកបានបន្ថែមថា លោកបានពិចារណាផ្សាយពាណិជ្ជកម្មលើវេបសាយពាណិជ្ជកម្មអនឡាញផ្សេងៗទៀតដើម្បីទាក់ទាញអ្នកប្រើប្រាស់ឱ្យបានកាន់តែច្រើនថែមទៀត។
ស្របពេលនេះដែរ វេបសាយពាណិជ្ជកម្មអនឡាញនានាដែលប្រឹងប្រែងទប់ទល់ជាមួយនឹងទីផ្សារក្នុងស្រុកដែលយឺតយ៉ាវក៏បានងាកទៅរកទីផ្សារនៅបរទេសផងដែរ ដើម្បីស្វែងរកការរីកចម្រើនថ្មី ដោយផ្ដល់នូវការផ្សព្វផ្សាយបញ្ចុះតម្លៃដូចជាការមិនយកថ្លៃដឹកជញ្ជូននៅលើពិភពលោកនិងការអនុញ្ញាតឱ្យឈ្មួញលក់ទំនិញឱ្យអ្នកប្រើប្រាស់នៅលើពិភពលោកដោយងាយស្រួលជាដើម។
ជាឧទាហរណ៍ ក្រុមហ៊ុន Alibaba បានបញ្ជាក់នៅលើវេបសាយព័ត៌មាន Alizila របស់ខ្លួនថា អ្នកលក់ប្រហែល ៧០.០០០ នាក់ ឃើញការលក់របស់ពួកគេកើនឡើងទ្វេដង នៅពេលពួកគេផ្ដល់ការដឹកជញ្ជូនទំនិញដោយឥតគិតថ្លៃ។ ក្រុមហ៊ុននេះបានបន្ថែមថា នៅក្នុងទីផ្សារនានាដូចជានៅប្រទេសសិង្ហបុរីនិងទីក្រុងហុងកុងជាដើម អតិថិជនថ្មីក៏កើនឡើងទ្វេដងផងដែរ៕