ប៉ុន្មានថ្ងៃមុនពេលសហរដ្ឋអាមេរិកបញ្ចេញរបាយការណ៍សាកលលោកប្រចាំឆ្នាំរបស់ខ្លួនស្តីពីការជួញដូរមនុស្ស ក្រុមអាជ្ញាធរថៃបានប្រកាសថា ជនសង្ស័យជួញដូរមនុស្សចំនួន៧២នាក់ ដែលបានស្ថិតនៅក្នុងការឃុំឃាំងរួចទៅហើយនោះត្រូវរងការចោទប្រកាន់ពីបទចោទប្រកាន់នានា ខណៈដែលមានការចេញដីកាចាប់ខ្លួនដើម្បីចាប់ខ្លួនមនុស្ស៤៥នាក់បន្ថែមទៀត។
លោក Wanchai Roujanavong អ្នកនាំពាក្យក្រសួងយុត្តិធម៌បានប្រាប់ក្រុមអ្នកយកព័ត៌មានក្នុងទីក្រុងបាងកកថា «យើងនឹងចោទប្រកាន់មនុស្ស៧២នាក់ដែលត្រូវបានចាប់ខ្លួន»។ ចំពោះមនុស្សដែលនៅរត់គេចខ្លួននៅឯបរទេសនៅឡើយ យើងនឹងធ្វើការជាមួយប៉ូលិសជាតិដើម្បីបញ្ជូនពួកគេត្រឡប់មកវិញ ស្របទៅតាមសន្ធិសញ្ញាបត្យាប័ន។
ក្រុមអាជ្ញាធរបានប្រាប់ឲ្យដឹងថា គេនឹងមិនអាចអនុញ្ញាតឲ្យជនទាំងនេះដាក់ប្រាក់ធានានៅក្រៅឃុំទេ។
ក្នុងចំណោមមនុស្សដែលឃុំខ្លួនទាំងនេះ មានឧត្តមសេនីយ៍ឯក Manas Khongpaen ដែរ។
ការបង្ក្រាបការជួញដូរមនុស្សយ៉ាងខ្លាំងរបស់ថៃនៅក្នុងខែឧសភា បានចាប់ក្រុមមន្រ្តីផ្សេងទៀតចំនួន១៤នាក់ រួមមានមន្រ្តីប៉ូលីស៤នាក់នៅក្នុងអ្វីដែលលោក Aek Angsananont អនុប្រធានប៉ូលិសជាតិបានចាត់ទុកថា ជាការស៊ើបអង្កេតនៅក្នុងការជួញដូរមនុស្សដ៏ធំបង្អស់របស់ថៃ។
លោក Matthew Smith នាយកប្រតិបត្តិអង្គការ Fortify Rights ដែលជាអង្គការសិទ្ធិមនុស្សមិនយកកម្រៃមានទីតាំងក្នុងតំបន់អាស៊ីអាគ្នេយ៍បាននិយាយថា «ការឆ្លើយតបពីអាជ្ញាធរនៅពេលសព្វថ្ងៃនេះបានទទួលការស្វាគមន៍»៕