នាយករដ្ឋមន្ត្រីថ្មីរបស់ប្រទេសថៃ លោក Srettha Thavisinសន្យាថានឹងធ្វើសកម្មភាពភ្លាមៗ ដើម្បីដោះស្រាយបញ្ហាសេដ្ឋកិច្ចរបស់ប្រទេសនេះ។ លោកបានថ្លែងដូចនេះនៅក្នុងសុន្ទរកថាចូលកាន់តំណែងរបស់លោក នៅចំពោះមុខរដ្ឋសភាថៃនៅថ្ងៃចន្ទនេះ គឺបន្ទាប់ពីមានការជាប់គាំងខាងនយោបាយអស់រយៈពេល៤ខែមក នៅពេលដែលសមាជិកសភាថៃមិនបានឯកភាពលើការបង្កើតរដ្ឋាភិបាលថ្មីមួយ។ នេះបើតាមការចេញផ្សាយរបស់ទីភ្នាក់ងារសារព័ត៌មាន AP។
លោកSrettha បានចូលប្រឡូកក្នុងឆាកនយោបាយថៃបន្ទាប់ពីបានក្លាយជាអ្នកអភិវឌ្ឍខាងអចលនទ្រព្យដ៏សំខាន់ម្នាក់ ហើយរដ្ឋាភិបាលថ្មីរបស់លោកកំពុងប្រឈមនឹងការរំពឹងទុក ក៏ដូចជាការទាមទារជាបន្ទាន់ក្នុងការដោះស្រាយបញ្ហាសេដ្ឋកិច្ចនិងនយោបាយ ក៏ដូចជាបញ្ហាបរិស្ថាននិងសង្គមផ្សេងៗជាច្រើនទៀតផងដែរ ក្នុងអាណត្តិ៤ឆ្នាំរបស់ខ្លួននេះ។
លោកបាននិយាយថា សេដ្ឋកិច្ចរបស់ថៃគ្រប់ផ្នែកបានធ្លាក់ចុះខ្លាំងក្រោយជំងឺរាតត្បាតកូវីដ១៩ ពិសេសវិស័យទេសចរណ៍។ ប្រាក់បំណុលសាធារណៈបានកើនឡើងជាង៦០ភាគរយ នៃផលទុនសរុបក្នុងស្រុក ក្នុងឆ្នាំ២០២៣ ខណៈបំណុលគ្រួសារបានឡើងដល់ជាង៩០ភាគរយនៃផលទុនសរុបក្នុងស្រុក ក្នុងឆ្នាំនេះ។
លោកបន្ថែមទៀតថា សេដ្ឋកិច្ចរបស់ថៃក្រោយជំងឺរាតត្បាតកូវីដ១៩ គឺដូចជាមនុស្ស«មានជំងឺម្នាក់» ដែលកំពុងងើបឡើងវិញទាំងត្រដាបត្រដួស ហើយដែលការណ៍នេះនឹងដាក់ប្រទេសថៃទៅក្នុងហានិភ័យនៃការឈានទៅចុះខ្សោយសេដ្ឋកិច្ច។
នាយករដ្ឋមន្ត្រីថៃរូបនេះបានសន្យាថា នឹងចាត់វិធានការជាបន្ទាន់ ដើម្បីដោះស្រាយបញ្ហាបំណុល ការបន្ធូរបន្ថយលើការឡើងថ្លៃប្រេងឥន្ធនៈ និងជំរុញវិស័យទេសចរណ៍ផងដែរ។ បើទោះបីជាយ៉ាងនេះក្តីលោកមិនបាននិយាយលម្អិតជុំវិញរឿងនេះឡើយ។
លោកក៏បានបន្ថែមទៀតថា រដ្ឋាភិបាលថៃនឹងអនុវត្តភ្លាមៗផងដែរ តាមការសន្យាមួយដែលធ្វើឡើងក្នុងយុទ្ធនាការបោះឆ្នោតក្នុងពេលកន្លងទៅ នោះគឺការផ្តល់ប្រាក់ចំនួន២៨០ដុល្លារ ដល់គ្រប់ជនជាតិថៃទាំងអស់ ដែលមានអាយុចាប់ពី១៦ឆ្នាំឡើងទៅ ដើម្បីជំរុញសន្ទុះសេដ្ឋកិច្ចតាមរយៈការចំណាយក្នុងរយៈពេលខ្លីនេះ។ បើទោះបីជាគ្មានការរៀបរាប់លម្អិតជុំវិញរឿងនេះក្តី ក៏លោកធ្លាប់និយាយក្នុងពេលកន្លងទៅថា កម្មវិធីផ្តល់ប្រាក់នេះ នឹងត្រូវចំណាយអស់ប្រាក់រហូតដល់១៥ពាន់៨០០លានដុល្លារអាមេរិក ហើយកម្មវិធីនេះនឹងត្រៀមអនុវត្តចាប់ពីត្រីមាសទី១ឆ្នាំក្រោយនេះតទៅ។
ការសន្យាផ្តល់ប្រាក់ដល់ពលរដ្ឋនេះ បានធ្វើឱ្យមានការចាប់អារម្មណ៍ខ្លាំង ក្នុងយុទ្ធនាការឃោសនាបោះឆ្នោតក្នុងពេលកន្លងទៅ ប៉ុន្តែក្រុមអ្នករិះគន់បានលើកជាសំណួរថា តើកម្មវិធីនេះនឹងទទួលបានផលយូរអង្វែងឬយ៉ាងណានោះ៕
នាយករដ្ឋមន្ត្រីថ្មីថៃប្រាប់សភាថា រដ្ឋាភិបាលនឹងដោះស្រាយបញ្ហាសេដ្ឋកិច្ចជាបន្ទាន់
នាយរដ្ឋមន្ត្រីថ្មីរបស់ថៃ លោក Srettha Thavisin អានគោលនយោបាយ ទៅកាន់សភា ក្នុងរាជធានីបាងកក ប្រទេសថៃ កាលពីថ្ងៃទី១១ ខែកញ្ញា ឆ្នាំ២០២៣។
បាងកក —