រាជរដ្ឋាភិបាលដែលដឹកនាំដោយនាយករដ្ឋមន្ត្រីថៃថ្មីលោក Srettha Thavisin បានស្បថចូលកាន់តំណែងនៅចំពោះមុខព្រះភក្រ្តព្រះមហាក្សត្រថៃព្រះបាទ Maha Vajiralongkorn កាលពីថ្ងៃទី៥កញ្ញា ឆ្នាំ២០២៣។
នាយករដ្ឋមន្ត្រីថៃថ្មីលោក Srettha បានសន្យាថា «នេះជារដ្ឋាភិបាលសម្រាប់ប្រជារាស្រ្ត»នៅក្នុងសុន្ទរកថាឡើងកាន់អំណាចរបស់លោក ក្នុងរាជធានីបាងកក ប្រទេសថៃ បន្ទាប់ពីរូបលោក និងសមាជិកគណៈរដ្ឋមន្ត្រីទាំង៣៣នាក់ បានស្បថចូលកាន់តំណែងរួមមក។ លោកបាននិយាយថា លោកនឹងបង្ហាញនូវរបៀបវារៈគោលនយោបាយរបស់លោកនៅថ្ងៃចន្ទសប្តាហ៍ក្រោយ។
មហាសេដ្ឋីអចលនទ្រព្យដែលមានវ័យ៦១ឆ្នាំរូបនេះ ត្រូវបានសភាថៃបោះឆ្នោតឱ្យធ្វើជានាយករដ្ឋមន្ត្រីថ្មីរបស់ប្រទេសនេះ កាលថ្ងៃទី២២ ខែសីហា កន្លងទៅ បន្ទាប់ពីលោកត្រូវបានតែងតាំងដោយគណបក្ស Pheu Thai។ លោកគឺជាបុគ្គលថ្មីចុងក្រោយបំផុតម្នាក់ ដែលលេចមុខនៅក្នុងចលនានយោបាយ ដែលបង្កើតឡើងដោយអតីតនាយករដ្ឋមន្ត្រីថៃលោក Thaksin Shinawatra ដែលមានប្រជាប្រីយ៍ភាពខ្លាំងក្នុងចំណោមពលរដ្ឋថៃក្រីក្រនៅតាមទីជនបទ ជុំវិញគោលនយោបាយរបស់លោកស្តីពីការថែទាំសុខភាពទូទៅ និងការផ្តល់ប្រាក់ដល់ប្រជាកសិករ។
ការតែងតាំងលោក Sretta ឱ្យធ្វើជានាយករដ្ឋមន្ត្រីថៃថ្មីនៅពេលនេះ បានបិទបញ្ចប់នូវភាពជាប់គាំងខាងនយោបាយ ដែលបានកើតមានឡើង ចាប់តាំងពីគណបក្សឆ្ពោះទៅមុខ ឬ Move Forward Party និងសម្ព័ន្ធមិត្តរបស់បក្សនេះ បានឈ្នះការបោះឆ្នោតជ្រើសរើសសមាជិករដ្ឋសភាដ៏ភ្ញាក់ផ្អើលមួយ កាលពីខែឧសភាកន្លងទៅ។
មេដឹកនាំគណបក្សឆ្ពោះទៅមុខ ឬ Move Forward Party គឺលោក Pita Limjaroenrat បានបរាជ័យមិនអាចទទួលបានសំឡេងគាំទ្រគ្រប់គ្រាន់ក្នុងសភាថៃ ដើម្បីក្លាយជានាយករដ្ឋមន្ត្រី ដោយសារតែមានការជំទាស់ខ្លាំងពីក្រុមអភិរក្សនៃព្រឹទ្ធសភាថៃ ដែលគាំទ្រដោយក្រុមយោធា។
បើទោះបីជាគណបក្សភឿថៃ ទទួលបានចំណាត់ថ្នាក់លេខ២ ក្នុងការបោះឆ្នោតកាលពីខែឧសភាក្តី ប៉ុន្តែគណបក្សនេះ បានងាកទៅចងសម្ព័ន្ធភាពជាមួយក្រុមយោធានិងក្រុមសមាជិកសភារាជានិយម និងឈានទៅបំបែកភាពទាល់ច្រកបាន។
នាយករដ្ឋមន្ត្រីថៃថ្មី លោក Srettha ក៏នឹងកាន់មុខតំណែងជារដ្ឋមន្ត្រីក្រសួងហិរញ្ញវត្ថុថៃផងដែរ ហើយគណបក្ស Pheu Thai បានកាន់តំណែងក្រសួងសំខាន់ៗ ដែលមានដូចជា ក្រសួងការបរទស ក្រសួងការពារជាតិ ក្រសួងពាណិជ្ជកម្ម ក្រសួងដឹកជញ្ជូន និងក្រសួងសុខាភិបាល។
អតីតនាយករដ្ឋមន្ត្រីថៃលោក Thaksin បានវិលត្រឡប់ទៅកាន់រាជធានីបាងកកវិញ នៅចំថ្ងៃដែលលោក Sretta ត្រូវបានសភាថៃបោះឆ្នោតឱ្យធ្វើជានាយករដ្ឋមន្ត្រីថ្មីរបស់ប្រទេសនេះ ហើយការវិលត្រឡប់ របស់លោក Thaksin មកកាន់មាតុភូមិវិញ នេះ បានបិទបញ្ចប់នូវការរស់នៅនិរទេសខ្លួនចំនួន១៥ឆ្នាំនៅក្រៅប្រទេស ដែលបានចាប់ផ្តើមឡើង២ឆ្នាំ បន្ទាប់ពីលោកត្រូវបានទម្លាក់ចេញពីតំណែងជានាយករដ្ឋមន្ត្រី ដោយក្រុមយោធាដែលបានចងសម្ព័ន្ធភាពជាមួយក្រុមគាំទ្ររាជានិយម ហើយដែលបានមើលឃើញរូបលោកថា ជាការគំរាមកំហែងមួយ ទៅលើអំណាចដ៏យូរលង់របស់គេ នៅក្នុងរក្សារបៀបរបបសង្គម។
លោក Thaksin បានប្រគល់ខ្លួនឱ្យប៉ូលិសពេលមកដល់មាតុភូមិភ្លាម និងត្រូវបានតុលាការកំពូលរបស់ថៃ បញ្ជាឱ្យជាប់ពន្ធនាគារចំនួន៨ឆ្នាំ ដោយផ្អែកលើការកាត់ទោសក្នុងពេលកន្លងទៅ ពីបទប្រព្រឹត្តអំពើពុករលួយ។ ព្រះមហាក្សត្រថៃ បានបន្ថយទោស របស់លោក Thaksin ពីចំនួន៨ឆ្នាំមកនៅត្រឹម១ឆ្នាំវិញ កាលពីថ្ងៃសុក្រសប្តាហ៍មុន៕
ព័ត៌មានខ្លះនៅក្នុងសេចក្តីរាយការណ៍នេះមានប្រភពពីទីភ្នាក់ងារសារព័ត៌មាន AP និង Reuters។
ប្រែសម្រួលដោយ លោក ជ្រា វណ្ណារិទ្ធ
