មន្ត្រីប៉ូលិសនៅទីក្រុងអែលប៉ាសូ រដ្ឋតិចសាសកំពុងតែស៊ើបអង្កេតផ្តោតលើឧក្រិដ្ឋកម្មសម្អប់ជាតិសាសន៍ចំពោះការបាញ់សម្លាប់មនុស្សនៅផ្សារទំនើប Walmart ដែលមានមនុស្សស្លាប់អស់យ៉ាងហោចណាស់២០នាក់និងរបួស២៦នាក់កាលពីថ្ងៃសៅរ៍។
លោក Greg Allen ប្រធានប៉ូលិសបាននិយាយថាពួកគេមានសារមួយបង្ហោះតាមបណ្តាញសង្គមដែលសរសេរដោយជនសង្ស័យស្បែកសរូបនោះបញ្ជាក់ថាការបាញ់ប្រហារនេះគឺមានគោលបំណងសំដៅលើជនជាតិដែលមានដើមកំណើតអេស្ប៉ាញ។ ឥឡូវនេះយុវជនសង្ស័យដែលមានអាយុ២១ឆ្នាំរូបនេះកំពុងតែជាប់ឃុំឃាំង។
សារតាមអ៊ីនធឺណិតនោះត្រូវបានបង្ហោះមួយម៉ោងមុនពេលការបាញ់ប្រហារកើតឡើងហើយក្នុងនោះមានពាក្យពេចន៍ដែលត្អូញត្អែអំពី«ការចូលឈ្លានពានរបស់ជនដើមកំណើតអេស្ប៉ាញ»នៅរដ្ឋតិចសាស។ អ្នកសរសេរសារនោះបានបន្ថែមថាខ្លួនរំពឹងថានឹងត្រូវគេបាញ់សម្លាប់វិញនៅក្នុងការវាយប្រហារនេះ។
លោកវ៉ាគីន កាស្ត្រូ (Joaquin Castro) អ្នកតំណាងរាស្រ្តប្រចាំរដ្ឋតិចសាសបានបញ្ជាក់នៅ ក្នុងសេចក្តីថ្លែងការណ៍ថា៖
«អំពើភេរវកម្មដ៏អាក្រក់ប្រឆាំងនឹងពលរដ្ឋអាមេរិកាំងដើមកំណើតអេស្ប៉ាញនេះគឺត្រូវបានជំរុញលើកទឹកចិត្តដោយវោហាសាស្រ្តប្រឆាំងជាតិសាសន៍និងបំបែកបំបាក់និងអាចធ្វើបានដោយសារតែមានអាវុធដែលប្រើក្នុងសង្គ្រាម»។
លោកកាស្ត្រូ បានបន្ថែមថា៖
«ពាក្យពេចន៍នៅក្នុងសាររបស់ជនវាយប្រហារនេះស៊ីសង្វាក់គ្នាជាមួយនឹងការរៀបរាប់របស់លោកត្រាំអំពីជនអន្តោប្រវេសន៍ដើមកំណើតអេស្ប៉ាញថា«ជាជនឈ្លានពាន»។ ការបាញ់ប្រហារនៅថ្ងៃនេះជាការរំលឹកយ៉ាងច្បាស់ពីគ្រោះថ្នាក់នៃវោហាសាស្រ្តដូចនេះ»។
លោក កាស្ត្រូ ក៏ជាប្រធានក្រុមជនជាតិដើមកំណើតអេស្ប៉ាញប្រចាំនៅសភាតំណាងរាស្រ្តផងដែរ។
លោកអង់ដ្រេ ម៉ាណូអែល ឡូប៉េ អូប្រាដូ (Andres Manuel Lopez Obrado) ប្រធានាធិបតីម៉ិកស៊ិក បានបញ្ជាក់ថាមានជនជាតិម៉ិកស៊ិក៣នាក់ត្រូវបានសម្លាប់ក្នុងការវាយប្រហារនោះហើយ៦នាក់ទៀតបានរងរបួស។
លោកប្រធានាធិបតីសហរដ្ឋអាមេរិកដូណាល់ ត្រាំ បានបង្ហោះសារតាមទំព័រធ្វីតធឺកាលពីថ្ងៃសៅរ៍ថា៖
«លោកស្រី Melania និងខ្ញុំសូមបួងសួងដោយសុទ្ធចិត្តដល់ពលរដ្ឋដ៏អស្ចារ្យក្នុងរដ្ឋតិចសាស»។
លោកបានបន្ថែមថា៖ «ការបាញ់ប្រហារនៅ ទីក្រុងអែលប៉ាសូ រដ្ឋតិចសាសនៅថ្ងៃនេះ មិនគ្រាន់តែជាសោកនាដកម្មទេប៉ុន្តែវាជាអំពើដ៏កំសាកផងដែរ។ ខ្ញុំដឹងថាខ្ញុំឈរនៅជាមួយអ្នកគ្រប់គ្នាក្នុងប្រទេសនេះដើម្បីថ្កោលទោសអំពើដ៏គួរឱ្យស្អប់ខ្ពើមនៅថ្ងៃនេះ។ វាគ្មានហេតុផលឬការដោះសារណាមួយដែលសំអាងដើម្បីសម្លាប់មនុស្សស្លូតត្រង់ទេ...»៕