អគ្គនាយកដ្ឋានពន្ធដារនៃក្រសួងសេដ្ឋកិច្ចនិងហិរញ្ញវត្ថុបានបង្គាប់ឲ្យម្ចាស់ក្រុមហ៊ុនបុរី និងផ្ទះល្វែងចំនួន២ក្នុងរាជធានីភ្នំពេញចូលខ្លួនមកទូទាត់បំណុលពន្ធ។ នេះបើយោងតាមលិខិត ចុះថ្ងៃទី២៦ ខែមេសា ឆ្នាំ២០២២ ចេញដោយអគ្គនាយកដ្ឋានពន្ធដារ និងចុះហត្ថលេខាដោយអគ្គនាយកពន្ធដារ លោក គង់ វិបុល។
បើតាមលិខិតដែលបង្ហោះនៅលើគេហទំព័រសារព័ត៌មាន Freshnews ដែលស្និទ្ធនឹងរដ្ឋាភិបាល អគ្គនាយកដ្ឋានពន្ធដារបានស្នើឲ្យអគ្គនាយកក្រុមហ៊ុនបុរី គីម ស័ង អ្នកស្រី គន ប៉ោស៊ាង និងអគ្គនាយកក្រុមហ៊ុនផ្ទះល្វែង VIP លោក វន វណ្ណៈ ចូលមកដោះស្រាយបំណុលពន្ធរដ្ឋ មិនឲ្យលើសពី១៥ថ្ងៃ ក្រោយកាលបរិច្ឆេទនៃលិខិតអញ្ជើញនេះ។ យ៉ាងណាក្តី លិខិតនេះមិនបានបញ្ជាក់ពីទំហំបំណុលពន្ធដែលត្រូវបង់នោះទេ។
លិខិតបង្គាប់ក៏បានឲ្យដឹងផងដែរថា កន្លងមក អគ្គនាយកដ្ឋានពន្ធដារបានស្នើអគ្គនាយកក្រុមហ៊ុនទាំងពីរនេះមកដោះស្រាយបំណុលពន្ធ ប៉ុន្តែអ្នកទាំងពីរមិនបានមកតាមការអញ្ជើញ និងមិនបានទូទាត់បំណុលពន្ធនោះទេ។ លិខិតនេះបន្ថែមថា ក្នុងករណីអគ្គនាយកក្រុមហ៊ុនទាំងពីររូបមិនបានមកដោះស្រាយតាមកាលកំណត់ អគ្គនាយកដ្ឋាននឹងចាត់ទុកជាការប្រព្រឹត្តបទល្មើសព្រហ្មទណ្ឌដូចមានចែងក្នុងមាត្រា១២៧ មាត្រា១៣៥ និងមាត្រា១៣៦ នៃច្បាប់ស្តីពីសារពើពន្ធ ហើយនឹងចាត់វិធានការតាមផ្លូវច្បាប់។
ប្រធាននាយកដ្ឋានគ្រប់គ្រងអ្នកជាប់ពន្ធធំនៃអគ្គនាយកដ្ឋានពន្ធដារ លោក អេង រតនា ប្រាប់វីអូអេនៅថ្ងៃពុធថា កាតព្វកិច្ចពន្ធដែលអគ្គនាយកក្រុមហ៊ុនទាំងពីរខាងលើត្រូវទូទាត់គឺជាបន្ទុកពន្ធលើអាជីវកម្ម។ ប៉ុន្តែលោកមិនអាចបញ្ជាក់ពីទំហំពន្ធជាប់បន្ទុក ឬថា តើមានការបង់ពន្ធពីសំណាក់ម្ចាស់អាជីវកម្មបុរី និងផ្ទះល្វែងទាំងពីរនាក់នោះនៅឡើយឬយ៉ាងណាទេ ដោយសារតែលោកមិនមានឯកសារជាប់ខ្លួន។
លោកបន្តថា ការបង់ពន្ធជាកាតព្វកិច្ចរបស់ប្រជាពលរដ្ឋ ឬអាជីវករគ្រប់រូប ហើយបើសិនមានករណីគេចវេះមិនបង់ពន្ធ នោះអគ្គនាយកដ្ឋានពន្ធដារនឹងចាត់វិធានការតាមផ្លូវច្បាប់ ក៏ដូចជាចំណាត់ការបន្តបន្ទាប់បន្ថែមទៀត។
លោកថ្លែងថា៖ «ធម្មតា អាហ្នឹងប្រកបអាជីវកម្មគួរតែចូលរួមក្នុងការបង់ពន្ធ។ បើមិនបង់ទេគឺខាងពន្ធដារមានវិធានការអនុវត្តទៅតាមច្បាប់បទប្បញ្ញត្តិដែលមានជាធរមាន។ យើងអញ្ជើញគាត់មកធម្មតា។ យើងអញ្ជើញតាមលិខិតស្នាមធម្មតា ហើយបើមិនមកទេ អាចមានវិធានការបន្តទៀត អាចបង្កកគណនីធនាគារ។ ហើយបើគាត់ប្រកបអាជីវកម្មអីផ្សេងទៀត គឺបង្កកអាជ្ញាបណ្ណគាត់ ជាពិសេសគាត់លក់ផ្ទះអីគាត់អត់អាចលក់បាន កាត់ឈ្មោះអត់បាន ឬទិញដីអីក៏ទិញអត់កើតដែរ»។
វីអូអេមិនអាចទាក់ទងសុំការអធិប្បាយពីតំណាងក្រុមហ៊ុនទាំងពីរបាននៅឡើយទេនាថ្ងៃពុធនេះ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី បានប្រាប់វីអូអេថា ការប្រមូលពន្ធតាមច្បាប់ជាធរមាន ជាកាតព្វកិច្ចត្រូវបំពេញរបស់រាល់សហគ្រាស ក្រុមហ៊ុន និងអាជីវកម្មផ្សេងៗ។ លោកក៏បានជំរុញឲ្យមានការអនុវត្តច្បាប់ពន្ធដារឲ្យបានស្មើភាពផងដែរ។
លោកថ្លែងថា៖ «មិនថាក្រុមហ៊ុនហ្នឹងជាក្រុមហ៊ុនធំ ក្រុមហ៊ុនតូច ក្រុមហ៊ុនខ្សែអ្នកតូចទេ គឺយើងធ្វើការអនុលោមហ្នឹងឲ្យស្មើភាពគ្នា និងគ្រប់ជ្រុងជ្រោយ។ កុំឲ្យមានតែក្រុមហ៊ុនគាត់ ធម្មតា គាត់អត់មានខ្សែគាត់ត្រូវបំពេញកាតព្វកិច្ចពេញលេញអ៊ីចឹងទៅ។ ចំណែកក្រុមហ៊ុនដែលគាត់មានខ្សែបណ្តាញឬវិធីផ្សេងៗ រួមទាំង ឧទាហរណ៍ថា លទ្ធភាពនៃការសូកប៉ាន់ កេងបន្លំអីផ្សេងៗទៀត គាត់អាចគេចពន្ធបាន»។
លោក ប៉ិច ពិសីក៏ចង់ឃើញការលុបបំបាត់«អំពើពុករលួយ និងការចាប់ជំរិតពន្ធ» ក្នុងទម្រង់នៃការទារថ្លៃសេវាក្រៅផ្លូវការបន្ថែមជាដើម ដែលអាចដាក់សម្ពាធឲ្យក្រុមហ៊ុន ឬអាជីវកម្មមួយចំនួនបង្ខំចិត្តបិទទ្វារផងដែរ។
លោកបាននិយាយថា៖ «ទន្ទឹមនឹងគ្នាហ្នឹង គឺយើងត្រូវមើលភាពមិនប្រក្រតីផ្សេងៗដូចជា អំពើពុករលួយដែលអាចកើតមាននៅក្នុងនីតិវិធីរដ្ឋបាល ឬក៏គេហៅថា ការិយាធិបតេយ្យហ្នឹងគឺ យឺតយ៉ាវជាដើម។ ហើយបើគេថា បង់ពន្ធហើយ ពិបាកបង់ទៅទៀត ឧទាហរណ៍ ឬគេសុំច្បាប់ចុះបញ្ជីផ្សេងៗ ពិបាកសុំច្បាប់ទៅទៀត»។
គួរបញ្ជាក់ថា រដ្ឋាភិបាលចាប់ផ្តើមរឹតបន្តឹងការបង់ពន្ធលើអាជីវកម្មវិស័យសាងសង់សំណង់ផ្ទះល្វែងចាប់តាំងពីឆ្នាំ២០១៥ ដែលតម្រូវឲ្យមានការបង់ពន្ធទៅតាមច្បាប់ ខណៈវិស័យនេះមានការរីកចម្រើនខ្លាំង៕