បាឡុងចារកម្មដែលត្រូវបានគេសង្ស័យជាបស់ចិនថាបានហោះពីលើប្រទេសអាមេរិកអស់រយៈពេលជាច្រើនថ្ងៃមកហើយ។ នេះបើតាមការបញ្ជាក់ឱ្យដឹងរបស់ក្រុមមន្ត្រីសហរដ្ឋអាមេរិក កាលពីថ្ងៃព្រហស្បតិ៍ម្សិលមិញ។
អ្នកនាំពាក្យក្រសួងការពារជាតិសហរដ្ឋអាមេរិកលោកឧត្តមសេនីយ៍ត្រី Patrick Ryder បាននិយាយថា បាឡុងហោះនោះបានធ្វើដំណើរឆ្ងាយពីលើតំបន់ចរាចរណ៍ផ្លូវអាកាសពាណិជ្ជកម្ម ហើយមិនបានផ្តល់ការគំរាមកំហែងផ្នែកយោធា ឬការគំរាមកំហែងដោយផ្ទាល់ណាមួយដល់មនុស្សនៅលើដីនោះឡើយ។
ទីបញ្ជាការដ្ឋានការពារដែនអាកាសអាមេរិកខាងជើងកំពុងតាមដានដំណើររបស់បាឡុងមួយនេះ ប៉ុន្តែក្រុមមន្ត្រីមិនបាននិយាយទេថា តើពេលនេះវាកំពុងស្ថិតនៅចំណុចណាមួយនោះឡើយ។
ទីបញ្ជាការដ្ឋានការពារដែនអាកាសអាមេរិកខាងជើងបានបញ្ជាក់ក្នុងសេចក្តីថ្លែងការណ៍មួយថា «ខ្លួនកំពុងតាមដាននិងត្រួតពិនិត្យ» ពីដំណើរហោះរបស់បាឡុងមួយនេះយ៉ាងដិតដល់។ ការចាប់សញ្ញាឃើញបាឡុងហោះនោះកើតមានឡើងតែប៉ុន្មានថ្ងៃប៉ុណ្ណោះ មុនពេលរដ្ឋមន្ត្រីការបរទេសអាមេរិកលោក Antony Blinken មានគម្រោងជាយូរមកហើយថា នឹងទៅទស្សនកិច្ចប្រទេសចិន ក្នុងពេលឆាប់ៗខាងមុខនេះ។ គេនៅមិនទាន់ដឹងច្បាស់នៅឡើយទេថា តើការរកឃើញបាឡុងចារកម្មនេះអាចប៉ះពាល់ដល់ដំណើរទស្សនកិច្ចរបស់រដ្ឋមន្ត្រីការបរទេសអាមេរិករូបនេះដែរឬអត់។
បាឡុងនេះត្រូវបានគេប្រទះឃើញកាលពីថ្ងៃពុធកន្លងទៅ នៅក្នុងរដ្ឋ Montana ភាគពាយ័ព្យសហរដ្ឋអាមេរិកជាទីកន្លែងមូលដ្ឋានកងទ័ពជើងអាកាសអាមេរិកចំនួន ៣ ស្ថិតនៅទីនោះ ដែលធ្វើប្រតិបត្តិការនិងរក្សាមីស៊ីលបាលីស្ទិកអន្តរទ្វីបរបស់អាមេរិក។
ជើងយន្តហោះចាកចេញពីព្រលានយន្តហោះទីក្រុង Billings នៃរដ្ឋ Montana ត្រូវបានផ្អាករយៈពេលខ្លីកាលពីថ្ងៃពុធ ខណៈពេលដែលសហរដ្ឋអាមេរិកបានប្រមូលយន្តហោះចម្បាំងមួយចំនួនដើម្បីត្រួតពិនិត្យមើលបាឡុងមួយនេះ។
ក្រុមមន្ត្រីយោធាអាមេរិកបានព្រមានមិនឱ្យបាញ់ទម្លាក់បាឡុងនោះទេ ព្រោះអាចធ្វើឱ្យប៉ះពាល់ដល់មនុស្សលើដី ដោយសារតែបំណែកបាក់បែករបស់វាធ្លាក់ចុះមកក្រោម។
មន្ត្រីក្រសួងការពារជាតិអាមេរិកថាបាឡុងចារកម្មដែលមកដល់ទឹកដីអាមេរិកនេះបានហោះចេញពីប្រទេសចិន តាមប្រជុំកោះ Aleutia ក្នុងរដ្ឋអាឡាស្កា និងតាមប្រទេសកាណាដាភាគខាងជើង។
ចិនបាននិយាយនៅថ្ងៃសុក្រនេះថា ខ្លួនកំពុងធ្វើការដើម្បីផ្ទៀងផ្ទាត់សេចក្តីរាយការណ៍របស់សហរដ្ឋអាមេរិកថាបាឡុងចារកម្មរបស់ចិនកំពុងធ្វើដំណើរលើសហរដ្ឋអាមេរិក។
អ្នកនាំពាក្យក្រសួងការបរទេសចិនលោកស្រី Mao Ning និយាយនៅថ្ងៃសុក្រនេះថា «ការផ្ទៀងផ្ទាត់កំពុងធ្វើឡើង»។ លោកស្រីបានជំរុញឱ្យរក្សាការស្ងៀមស្ងាត់រហូតទាល់ការពិតបានបញ្ចាក់ច្បាស់៕