អង្គការពលកម្មអន្តរជាតិដែលហៅកាត់ថា (ILO) បានរកឃើញថា មានកម្មករជាង៤០ភាគរយមានការចុះខ្សោយជំងឺឈាម ស្លេកស្លាំង និងមានតែប្រមាណតែ៣ភាគរយតែប៉ុណ្ណោះដែលមានអាហារមានជីវជាតិបរិភោគគ្រប់គ្រាន់។
របាយការណ៍ស្រាវជា្រវដែលបានចេញផ្សាយកាលពីថ្ងៃច័ន្ទបានពិនិត្យលើកម្មករចំនួន៣.៩៨០នាក់។
លោក រ៉ុង ឈុន ប្រធានសហភាពសហជីពកម្ពុជាមានប្រសាសន៍ថាមូលហេតុដែលកម្មករមានជំងឺចុះខ្សោយឈាមដោយសារតែបរិស្ថាននៅក្នុងរោងចក្រមិនល្អ ចំហាយគីមីភាយចេញពីក្រណាត់ក្នុងរោងចក្រ អាកាសធាតុក្តៅខ្លាំងហើយគួបផ្សំនឹងកម្មករទទួលទានមិនគ្រប់គ្រាន់ជាហេតុធ្វើឱ្យពួកគេងាយរងគ្រោះនឹងជំងឺផ្សេងៗ។
លោក រ៉ុង ឈុន ព្យាករណ៍ថានៅថ្ងៃអនាគតក្រុមកម្មករកាត់ដេរសម្លៀកបំពាក់កម្ពុជានឹងមានជំងឺអាជីពជាប់ខ្លួនដោយសារតែពួកគេបរិភោគអាហារមិនគ្រប់គ្រាន់ ដែលជាហេតុធ្វើឱ្យកម្ពុជាទទួលរងផលប៉ះពាល់យ៉ាងខ្លាំងខាងផ្នែកសេដ្ឋកិច្ច។
លោកនិយាយថា៖ «អនាគតទៅប្រសិនជានយោជក ក៏ដូចជារដ្ឋាភិបាលមិនគិតគូពីបញ្ហាហ្នឹងអនាគតទៅគាត់នឹងមានជំងឺអាជីព ហើយបើមានជំងឺអាជីពច្រើនលើសលប់ទៅវានាំឱ្យមានផលប៉ះពាល់ទៅដល់ចំណូលសេដ្ឋកិច្ចជាតិរបស់យើងផងដែរ»។
នៅក្នុងរបាយការណ៍របស់អង្គការពលកម្មអន្តរជាតិបាននិយាយថាក្នុងចំណោមកម្មករប្រមាណជិត៤០០០នាក់ក្នុងរោងចក្រចំនួន១០មានប្រមាណ ១៥,៧ភាគរយ មានទម្ងន់មិនគ្រប់គ្រាន់ ប្រមាណ២ ភាគ៣ មានអសន្តិសុខស្បៀង មានន័យថាពួកគេធ្វើការច្រើនមិនមានពេលវេលាគ្រប់គ្រាន់ក្នុងការទទួលយកនូវសុវត្ថិភាពនិងជីវជាតិអាហារគ្រប់គ្រាន់ និង ៤៣, ២ ភាគរយទទួលរងពីភាពស្លេកស្លាំង។
កញ្ញា ឈាង ធីតា កម្មកររោងចក្រជីនតាយដែលមានទីតាំងនៅសង្កាត់ចាក់អង្រែក្រោមបាននិយាយថាក្នុងរយៈពេលជាង១០ឆ្នាំដែលបានធ្វើការក្នុងរោងចក្របានធ្វើឱ្យសុខភាពចុះខ្សោយ។កញ្ញាបាននិយាយថាបរិស្ថាន ជាតិពុលដែលភាយចេញពីក្រណាត់ និង បរិស្ថានខ្សល់ចេញ ចូលមិនគ្រប់គ្រាន់នៅក្នុងរោងចក្របានធ្វើឱ្យកម្មករដួលសន្លប់ជាញឹកញាប់ មួយថ្ងៃប្រហែលពី២ទៅបីនាក់។
កញ្ញាបាននិយាយថាក្រុមកម្មករចំណាយប្រមាណជាង៣០០០រៀលតែប៉ុណ្ណោះក្នុងការទទួលទានអាហារក្នុងមួយថ្ងៃ ដូច្នេះមានកម្មករសឹងតែទាំងអស់មានសភាពស្លេកស្លាំងខ្វះឈាមក្រហម។
កញ្ញានិយាយថា៖ «បើនិយាយពីសុខភាពវិញកាលពីខ្ញុំមិនទាន់ចូលធ្វើការរោងចក្រ សុខភាពខ្ញុំនិយាយថា១០០%គឺខ្ញុំអត់ដែលឈឺអ្វីទេ។ប៉ុន្តែមកដល់ពេលនេះជំងឺខ្ញុំ១០០មុខ។ ១០ឆ្នាំជាងអ្វីដែលខ្ញុំសល់ពីវិស័យកាត់ដេរគឺជំងឺហ្នឹងឯង»។
វីអូអេមិនអាចស្នើសុំលោក ហេង សួរ អ្នកនាំពាក្យក្រសួងការងារដើម្បីធ្វើសេចក្តីអត្ថាធិប្បាយបានទេដោយទូរស័ព្ទរបស់លោកបានបិទ។
លោក ខែន លូ អគ្គលេខាធិការសមាគមរោងចក្រកាត់ដេរកម្ពុជាបានទទួលស្គាល់ថាការវាយតម្លៃរបស់អង្គការពលកម្មអន្តរជាតិពិតជាត្រឹមត្រូវ។
លោកនិយាយថាតាមការសិក្សាកន្លងមកបានរកឃើញថាសុខភាពរបស់ក្រុមកម្មករមិនរឹងមាំទេដោយសារទទួលទានមិនគ្រប់គ្រាន់និងធ្វើការនៅកន្លែងដែលមានលក្ខខណ្ឌមិនល្អ។
របាយការណ៍ដែលបានចេញផ្សាយកាលពីខែកញ្ញាដោយក្រុមតស៊ូមតិក្នុងប្រទេសកម្ពុជានិងប្រទេសអង់គ្លេសបានឱ្យដឹងថាមាន៣៣%នៃកម្មកររោងចក្រ មានកង្វះអាហារូបត្ថម្ភវេជ្ជសាស្ត្រដែលចាំបាច់ក្នុងកម្មករម្នាក់ត្រូវចំណាយ២,៥ ដុលា្លរ ទៅលើម្ហូបអារហារដើម្បីបំប៉នសុខភាពកម្មករឱ្យល្អប្រសើរឡើងវិញ៕