គេនៅមិនឃើញមានអ្នកឈ្នះដាច់ណាមួយ នៅក្នុងការបញ្ចប់ការបោះឆ្នោតដ៏តឹងតែងនៅក្នុងប្រទេសអេស្ប៉ាញកាលពីថ្ងៃអាទិត្យម្សិលមិញនោះទេ ខណៈពេលដែលគណបក្សក្រុមស្តាំនិយម បរាជ័យក្នុងការសម្រេចបានតាមការប៉ាន់ស្មានរបស់ខ្លួន ដើម្បីទទួលបានជ័យជម្នះឱ្យបានគ្រប់គ្រាន់ ក្នុងការទម្លាក់នាយករដ្ឋមន្ត្រីកំពុងកាន់អំណាច លោក Pedro Sanchez ចេញពីតំណែង។ នេះបើយោងទៅលើការចេញផ្សាយរបស់ទីភ្នាក់ងារសារព័ត៌មាន Reuters។
គណបក្សនាំមុខទាំងពីរ នឹងត្រូវស្វះស្វែងចរចាបង្កើតកិច្ចព្រមព្រៀមសម្ព័ន្ធភាពមួយ ដើម្បីឈានទៅបង្កើតបានសំឡេងភាគច្រើន ក្នុងការគ្រប់គ្រងនិងដឹកនាំប្រទេស ប៉ុន្តែក្រុមអ្នកវិភាគនានាបានព្រមានថា ដំណើរការនេះអាចត្រូវជាប់គាំងនៅក្នុងសភានិងឈានទៅការបោះឆ្នោតជាថ្មីមួយទៀត។
ដោយសន្លឹកឆ្នោតដែលត្រូវបានរាប់ហើយ១០០ភាគរយ នៅត្រឹមម៉ោង១កន្លះព្រឹកថ្ងៃចន្ទនេះ គណបក្សប្រឆាំងស្តាំនិយម គឺគណបក្សប្រជាជនឬ PP បានទទួលអាសនៈចំនួន១៣៦នៅក្នុងរដ្ឋសភា ខណៈពេលដែលគណបក្សសង្គមនិយមរបស់លោកនាយករដ្ឋមន្ត្រី Sanchez ដែលកំពុងកាន់អំណាច បានទទួលអាសនៈចំនួន១២២ នៅក្នុងរដ្ឋសភាអេស្ប៉ាញ។
គណបក្សទាំងពីរទទួលបានអាសនៈមិនគ្រប់ចំនួន ១៧៦អាសនៈ ដែលត្រូវការជាចាំបាច់ដើម្បីគ្រប់គ្រងអំណាចបាន។ ប៉ុន្តែគណបក្សសង្គមនិយម ទទួលបានលទ្ធផលប្រសើរជាងអ្វីដែលត្រូវបានព្យាករណ៍ទុក ខណៈពេលដែលគណបក្សប្រជាជនបរាជ័យដោយមិនទទួលបានលទ្ធផលភាគច្រើនដាច់ខាត ដូចការប៉ាន់ស្មានទុកនោះឡើយ ដែលបង្កើតឱ្យមានភាពរំជើបរំជួលអន្ទះសារ ទៅក្នុងការរាប់សន្លឹកឆ្នោត។
លទ្ធផលនេះ មានន័យថា លោកនាយករដ្ឋមន្ត្រី Sanchez ទំនងជាបានក្លាយពីនាយករដ្ឋមន្ត្រី ដែលត្រៀមចេញពីតំណែង ទៅជាគូប្រជែងដើម្បីត្រៀមបង្កើតរដ្ឋាភិបាលថ្មីមួយទៅវិញ៕