ប្រទេសកូរ៉េខាងត្បូងបានប្រកាសកាលពីថ្ងៃចន្ទថា ខ្លួននឹងដកប្រទេសជប៉ុនចេញពីបញ្ជីដៃគូពាណិជ្ជកម្មដែលគួរឱ្យទុកចិត្តទៅជាប្រភេទថ្មីមួយដែលត្រូវមានការរឹតបន្តឹងជាងមុខលើការនាំចេញទំនិញ។
ការប្រកាសនេះគឺជាវិធានការចុងក្រោយនៅក្នុងជម្លោះពាណិជ្ជកម្មរវាងប្រទេសទាំងពីរ ដែលប្រទេសជប៉ុនបានទម្លាក់កូរ៉េខាងត្បូងចេញពីបញ្ជីដៃគូពាណិជ្ជកម្មដែលខ្លួនពេញចិត្ត។
រដ្ឋមន្ត្រីពាណិជ្ជកម្មកូរ៉េខាងត្បូងលោក Sung Yun-mo បាននិយាយកាលពីថ្ងៃចន្ទថា ប្រភេទថ្មីគឺសម្រាប់ប្រទេសដែលបានមានការនាំចេញរំលោភបទដ្ឋានអន្តរជាតិ។ ការផ្លាស់ប្តូរនេះគ្រោងនឹងចូលជាធរមាននៅខែកញ្ញា។ នៅពេលវិធានការនេះចូលជាធរមាន ក្រុមហ៊ុនកូរ៉េខាងត្បូងដែលចង់បញ្ជូនទំនិញទៅកាន់ប្រទេសជប៉ុននឹងត្រូវឆ្លងកាត់ដំណើរការអនុម័តដែលចំណាយពេលរហូតដល់១៥ថ្ងៃ។ ប្រព័ន្ធបច្ចុប្បន្នចំណាយពេលប្រហែលប្រាំថ្ងៃប៉ុណ្ណោះ។ គោលនយោបាយថ្មីនេះរបស់ប្រទេសជប៉ុនចាប់ផ្តើមនៅថ្ងៃទី២៨ខែសីហា។ រដ្ឋាភិបាលក្រុងតូក្យូទទូចថា ការសម្រេចចិត្តរបស់ខ្លួនត្រូវបានជំរុញដោយការព្រួយបារម្ភអំពីសន្តិសុខជាតិ។
សង្គ្រាមពាណិជ្ជកម្មរវាងជប៉ុននិងកូរ៉េខាងត្បូងដែលជាប្រទេសមានសេដ្ឋកិច្ចធំលំដាប់ទី ៣ និងទី១១របស់ពិភពលោកនឹងមានផលប៉ះពាល់ច្រើនដល់បណ្តាញផ្គត់ផ្គង់បច្ចេកវិទ្យាទូទាំងពិភពលោក ព្រោះកូរ៉េខាងត្បូងផលិត memory chips ឬបន្ទះអង្គចងចាំចំនួន៧០ភាគរយក្នុងពិភពលោក៕