យ៉ាងហោចណាស់មានពលករចំណាកស្រុកកម្ពុជា៥៦នាក់ ដែលធ្វើការខុសច្បាប់នៅក្នុងប្រទេសក្នុងតំបន់អាស៊ាន ត្រូវបានជួយសង្គ្រោះនិងបញ្ជូនមកកាន់ប្រទេសកំណើតវិញមុនដំណាច់ឆ្នាំ២០១៧។ នេះបើយោងតាមការឱ្យដឹងរបស់ក្រសួងការបរទេសកម្ពុជានាថ្ងៃពុធ។
សេចក្ដីប្រកាសព័ត៌មានរបស់ក្រសួងការបរទេសកម្ពុជា ដែលចេញផ្សាយនៅថ្ងៃទី៣ខែមករានេះ បានឱ្យដឹងថាស្ថានតំណាងប្រទេសកម្ពុជាក្នុងប្រទេសចំនួនបីគឺប្រទេសម៉ាឡេស៊ី ថៃនិងវៀតណាម កាលពីចុងខែធ្នូកន្លងទៅ បានធ្វើកិច្ចអន្តរាគមន៍និងជួយសង្គ្រោះពលករចំណាកស្រុកជនជាតិខ្មែរចំនួន៥៦នាក់ឱ្យមានសេរីភាព និងបញ្ជូនកមកម្ពុជាវិញដោយសុវត្ថិភាព។
ពលរដ្ឋខ្មែរទាំងនេះ ត្រូវបានអាជ្ញាធរនៃប្រទេសទាំងបីខាងលើ ឃាត់ខ្លួនឬកាត់ទោសចំពោះការលួចចូលទៅស្នាក់នៅនិងប្រកបការងារដោយខុសច្បាប់។
ក្នុងចំណោមពលរដ្ឋទាំងនេះ មានពលរដ្ឋខ្មែរចំនួន៥នាក់ រួមទាំងកុមារផងដែរ ត្រូវបានអាជ្ញាធរនៃប្រទេសម៉ាឡេស៊ីចាប់ឃាត់ខ្លួននិងបញ្ជូនមកកម្ពុជាវិញនៅថ្ងៃទី ៣១ ខែធ្នូកន្លងទៅ។ ២៩នាក់ទៀត ត្រូវបានបញ្ជូនពីប្រទេសវៀតណាម ក្រោមបទចោទថាពួកគេបានស្នាក់នៅនិងប្រកបអាជីវកម្មលក់ឆ្នោតខុសច្បាប់នៅទីក្រុងហូជីមិញ។ ចំណែកឯ ពលករនេសាទកម្ពុជាចំនួន ២២នាក់ផ្សេងទៀត ត្រូវបានបញ្ជូនពីប្រទេសថៃ បន្ទាប់ពីតុលាការថៃ កាត់ទោសពីបទនេសាទខុសច្បាប់ក្នុងដែនទឹកនៃប្រទេសនោះ។
គួរបញ្ជាក់ថា ដើម្បីជីវភាពរស់នៅនិងលក្ខខណ្ឌសេដ្ឋកិច្ចគ្រួសាររបស់ខ្លួន មានពលរដ្ឋកម្ពុជាយ៉ាងហោចណាស់ជាង១លាននាក់ កំពុងធ្វើចំណាកស្រុកទៅធ្វើការនៅប្រទេសជិតខាងក្នុងតំបន់អាស៊ាន ជាពិសេសនៅប្រទេសថៃ និងម៉ាឡេស៊ី។ ពួកគេមួយចំនួនធំ នៅមិនទាន់ទទួលបានការការពារសមស្របនិងការគោរពសិទ្ធិជាមូលដ្ឋានក្នុងការរស់នៅរបស់ពួកគេឲ្យបានត្រឹមត្រូវនៅឡើយ៕