បងស្រីរបស់សកម្មជនថៃបាត់ខ្លួនលោក Wanchalearm Satsaksit បាននិយាយនៅសប្ដាហ៍នេះថា អ្នកស្រីនឹងធ្វើដំណើរទៅប្រទេសកម្ពុជាជាមួយនឹងមេធាវីមួយក្រុម ដើម្បីផ្ដល់ភស្តុតាងដែលអ្នកស្រីសង្ឃឹមថា នឹងជំរុញឲ្យមានការស៊ើបអង្កេតលើការបាត់ខ្លួនរបស់លោក Wanchalerm នៅក្នុងទីក្រុងភ្នំពេញ។
មិនមានដំណឹងអ្វីលេចឮពីលោក Wanchalearm នោះទេ ចាប់តាំងពីលោកត្រូវបានគេរាយការណ៍ថា ត្រូវបានគេចាប់បញ្ចូលក្នុងរថយន្តមួយគ្រឿងនៅជិតកន្លែងស្នាក់នៅរបស់លោក ក្នុងទីក្រុងភ្នំពេញកាលពីថ្ងៃទី ៤ ខែមិថុនាកន្លងទៅនេះ ទោះបីជាមានការដាក់សម្ពាធលើរដ្ឋាភិបាលថៃ និងរដ្ឋាភិបាលកម្ពុជាឲ្យបង្ហាញមូលហេតុអំពីការបាត់ខ្លួនឈឹងនេះក៏ដោយ។
កន្លងមក អង្គការសិទ្ធិមនុស្ស និងអង្គការផ្សេងៗទៀតបានអំពាវនាវឲ្យមានការស៊ើបអង្កេតចំពោះរឿងនេះ។
បងស្រីរបស់លោក Wanchalearm ឈ្មោះ Sitanan Satsaksit បានប្រាប់ VOA ថា អ្នកស្រីនឹងធ្វើដំណើរទៅប្រទេសកម្ពុជា នៅថ្ងៃទី ១០ ខែវិច្ឆិកាខាងមុខ ជាមួយនឹងមេធាវីថៃ ៣ នាក់ ដើម្បីត្រៀមលក្ខណៈសម្រាប់សវនាការរបស់តុលាការ នៅថ្ងៃទី ៨ ខែធ្នូខាងមុខ។ ពួកគេសង្ឃឹមថា សវនាការនេះគឺជាជំហានដំបូងឆ្ពោះទៅកាន់ការបើកការស៊ើបអង្កេតពេញលេញលើរឿងនេះ។
អង្គការសិទ្ធិមនុស្ស Human Rights Watch បានលើកឡើងថា សកម្មជនថៃវ័យ ៣៧ ឆ្នាំរូបនេះ បានគេចខ្លួនមកស្នាក់នៅក្នុងប្រទេសកម្ពុជា កាលពីខែឧសភា ឆ្នាំ ២០១៤ បន្ទាប់ពីរដ្ឋប្រហារនៅប្រទេសថៃ។ អង្គការនេះបានបញ្ជាក់កាលពីខែមិថុនា ឆ្នាំ ២០១៨ ថា អាជ្ញាធរថៃបានចេញដីកាចាប់ខ្លួនលោក Wanchalearm ក្រោយពីលោកមិនបានបង្ហាញខ្លួនតាមដីកាកោះហៅរបស់អាជ្ញាធរ៕