សាលាដំបូងខេត្តសៀមរាបបានបិទបញ្ចប់ការស៊ើបអង្កេតលើការចោទប្រកាន់សកម្មជនសង្ឃល្បីឈ្មោះមួយអង្គ គឺព្រះអង្គ លួន សុវ៉ាត ពីបទ«រំលោភសេពសន្ថវៈ» និង«បរិហារកេរ្តិ៍ជាសាធាណៈ»។ នេះបើយោងតាមលិខិតជូនដំណឹងមួយចុះថ្ងៃទី១២ ខែមករា ឆ្នាំ២០២១ ដែលVOAទទួលបាន។
នៅក្នុងសេចក្តីជូនដំណឹងនេះ ចៅក្រមស៊ើបសួរ លោក នូ វាសនា លើកឡើងថាករណីនេះ«ត្រូវបានស៊ើបសួរចប់សព្វគ្រប់ហើយ និងបិទការស៊ើបសួរតាមនីតិវិធី»។
ព្រះអង្គ លួន សុវ៉ាត ត្រូវបានចោទប្រកាន់ពីបទ«រំលោភសេពសន្ថវៈ» និង«បរិហារកេរ្តិ៍ជាសាធារណៈ» ប្រព្រឹត្តទៅនៅរាជធានីភ្នំពេញ កាលពីអំឡុងឆ្នាំ២០១៦ និងនៅភូមិព្រីង ឃុំជីក្រែង ស្រុកជីក្រែង ខេត្តសៀមរាប កាលពីថ្ងៃទី៣០ ខែឧសភា ឆ្នាំ២០២០។ នេះបើយោងតាមសេចក្តីជូនដំណឹង។
លោក យិន ស្រាង អ្នកនាំពាក្យរបស់តុលាការខេត្តសៀមរាប បានប្រាប់ VOA នៅថ្ងៃច័ន្ទនេះថា តុលាការនៅបន្តចោទប្រកាន់ព្រះអង្គ លួន សុវ៉ាត។ លោកមិនទាន់អាចបញ្ជាក់ថ្ងៃសវនាការជំនុំជម្រះនៅឡើយទេ។
ព្រះអង្គ លួន សុវ៉ាត ដែលកំពុងនិរទេសព្រះកាយនៅប្រទេសស្វីស បានច្រានចោលការចោទប្រកាន់នោះថារៀបចំឡើង ដើម្បីបំផ្លាញព្រះអង្គ ហើយជាការកាត់តទាំងអស់។ ព្រះអង្គក៏បង្ហាញការមិនទុកចិត្តរបាយការណ៍របស់នគរបាល និងពាក្យបណ្តឹងដែលចោទប្រកាន់ពីបទ«រំលោភសេពសន្ថវៈ»។
ព្រះអង្គមានថេរដីកាថា៖ «ការចោទប្រកាន់ពីតុលាការក្តី ឬក៏របាយការណ៍របស់ប៉ូលិសអីផ្សេងៗ វាអាចខុសពីការពិត។ ជួនអី មិនមានអ្នកប្តឹងក៏ថាបាន ទៅជាតុលាការអ្នកប្តឹងខ្លួនឯង ក៏ថាបាន»។
ព្រះអង្គបន្ថែមថា៖ «គ្មាននរណាមួយដែលទៅប្តឹងក្នុងការបំផ្លាញគ្រួសារខ្លួន បំផ្លាញកិត្តិយសខ្លួន បំផ្លាញនូវអ្វីៗសម្រាប់ខ្លួនទេ»។
ចាប់តាំងពីដើមខែមិថុនា ឆ្នាំ២០២០ ព្រះអង្គ លួន សុវ៉ាត រងការចោទប្រកាន់ថាសន្ទនាស្នេហាជាមួយមនុស្សស្រីមួយចំនួនក្នុងវីដេអូចំនួន៤ដែលត្រូវបានផ្សព្វផ្សាយក្នុងប្រព័ន្ធសង្គមហ្វេសប៊ុក។ បន្ទាប់មក ប៉ូលិសខេត្តសៀមរាបក៏បានចេញប្រតិបត្តិការទ្រង់ទ្រាយធំ ចុះឆែកឆេរផ្ទះសាច់ញាតិរបស់ព្រះអង្គក្នុងខេត្តសៀមរាប និងបានសួរចម្លើយស្រ្តី៤នាក់ ជាបងប្អូន ហើយនិងម្តាយដែលត្រូវបានចោទប្រកាន់ក្នុងវីដេអូទាំងនោះ។
តាមរយៈការសួរចម្លើយនោះ ប៉ូលិសឲ្យដឹងថាមានការប្តឹងពីស្រ្តីម្នាក់ក្នុងបទល្មើសព្រហ្មទណ្ឌ «រំលោភសេពសន្ថវៈ»។ ប៉ូលិសខេត្តសៀមរាបក៏បានកសាងសំណុំរឿងទៅតុលាការ។
ព្រះអង្គមានថេរដីកាបន្ថែមថាប៉ូលិសបានរឹបអូសទ្រព្យសម្បត្តិរបស់ព្រះអង្គដែលរួមទាំងរថយន្តផង សរុបមានតម្លៃយ៉ាងតិច៥ម៉ឺនដុល្លារអាមេរិក។ ព្រះអង្គបន្ថែមថាមានការរៀបចំ ដើម្បីបំផ្លាញព្រះអង្គ ដែលជាសកម្មជនសង្ឃមួយអង្គ។
ព្រះអង្គបន្ថែមថា៖ «អញ្ចឹងអាត្មាមិនអាចទទួលយកបាននូវការចោទប្រកាន់បែបសម្លាប់ បែបប្រហារ បែបអសីលធម៌ អគុណធម៌ អមនុស្សធម៌ ខុសពីការពិត ប្រឌិតនូវភស្តុតាង ព័ត៌មានក្លែងក្លាយផ្សេងៗបែបនេះទេ»។
កាលពីថ្ងៃទី៣ ខែមិថុនា ឆ្នាំ២០២០ ព្រះអង្គ លួន សុវ៉ាត ត្រូវបានបង្ខំឲ្យផ្សឹកដោយព្រះមេគណខេត្តសៀមរាប ដោយសម្អាងលើវីដេអូ ដែលមិនមានរូបភាពផ្ទាល់របស់ព្រះអង្គ គ្រាន់តែជាសំឡេងដែលព្រះអង្គថា នេះជាការបង្កើតសាច់រឿង ដើម្បីធ្វើបាបព្រះអង្គ។
កន្លងទៅស្រ្តីម្នាក់មានឈ្មោះ ទឹម រដ្ឋា ហៅក្រៅថា ស្រីដា អាយុ៣១ឆ្នាំ រស់នៅក្នុងភូមិអន្លង់ត្នោត ឃុំជីក្រែង ស្រុកជីក្រែង ខេត្តសៀមរាប ដែលមានផ្ទះនៅទល់មុខវត្តស្លែង ដែលព្រះអង្គ លួន សុវ៉ាត ធ្លាប់គង់នៅ។ កញ្ញាក៏ធ្លាប់ចេញមុខបដិសេធថា មិនមានទំនាក់ទំនងស្នេហាអ្វីជាមួយព្រះអង្គនោះទេ។
ប៉ុន្តែលោកស្រី ដួង ថាវរី ស្នងការរងនគរបាលខេត្តសៀមរាប ទទួលបន្ទុកផ្នែកប្រឆាំងការជួញដូរមនុស្សនិងការពារអនីតិជន ធ្លាប់ប្រាប់ VOA ថាប្អូនស្រីម្នាក់ក្នុងចំណោមបងប្អូនទាំង៤នាក់របស់ស្រ្តីខាងលើបានប្តឹងព្រះអង្គ លួន សុវ៉ាត ពីបទរំលោភសេពសន្ថវៈ។
លោក អំ សំអាត នាយករងទទួលបន្ទុកឃ្លាំមើលសិទ្ធិមនុស្សរបស់អង្គការលីកាដូ មានប្រសាសន៍ថាមានចំណុចមិនប្រក្រតីនិងការសង្ស័យច្រើនអំពីការចោទប្រកាន់នេះ ដោយសារព្រះអង្គជាសកម្មជនសង្ឃមួយអង្គដែលមានប្រជាប្រិយភាព។
លោកបន្តថាបទល្មើសដែលតុលាការចោទប្រកាន់នោះ កើតក្នុងឆ្នាំ២០១៦ ហេតុអ្វីទើបមកចោទប្រកាន់នៅពេលនេះ។
លោកបញ្ជាក់ថា៖ «បើសិនជាបទល្មើសនេះកើតតាំងពី២០១៦ ហេតុអីមិនព្រមចាត់វិធានការតាំងពី២០១៦? ហេតុអីមកដល់២០២០ ហើយពេលនេះបានចាត់វិធានការលើព្រះអង្គ។ អញ្ចឹងគេគិតថារឿងនេះវាមានភាពមិនប្រក្រតី ហើយមានមន្ទិលសង្ស័យច្រើន ក្នុងការចោទប្រកាន់ទៅលើព្រះអង្គលួន សុវ៉ាត»។
លោក ស៊ឹង សែនករុណា អ្នកនាំពាក្យសមាគមសិទ្ធិមនុស្សអាដហុក មានប្រសាសន៍ថាគ្រាន់តែវីដេអូបង្ហោះលើប្រព័ន្ធសង្គមហ្វេសប៊ុក មិនអាចយកជាការបានទេក្នុងការចោទប្រកាន់ ខណៈព្រះអង្គ លួន សុវ៉ាត និងស្រ្តីម្នាក់ដែលពាក់ព័ន្ធនឹងករណីនេះ ក៏បានច្រានចោលការចោទប្រកាន់ទំនាក់ទំនងស្នេហា និងបានលើកឡើងអំពីការបង្កើតហ្វេសប៊ុកក្លែងក្លាយផងដែរ។
លោកមានប្រសាសន៍ថា៖ «ខ្ញុំយល់ថាដើម្បីឲ្យមានភាពល្អប្រសើរហ្នឹង គួរតែមានការទម្លាក់នូវបទចោទប្រកាន់ ហើយកុំបន្តនីតិវិធីទៅមុខទៀត»។
ក្រមព្រហ្មទណ្ឌកម្ពុជាមាត្រា២៣៩ ចែងថាបទល្មើសរំលោភរួមមានការរួមភេទដោយការប្រើហិង្សា ការបង្ខិតបង្ខំ និងការគំរាមកំហែងជាដើម។ បទរំលោភសេពសន្ថវៈនេះ ត្រូវផ្តន្ទាទោសជាប់ពន្ធនាគារពី៥ឆ្នាំទៅ១០ឆ្នាំ៕