កាលពីថ្ងៃពុធ ក្រុមរុករកមួយបានរកឃើញប្រអប់ខ្មៅដែលមានទិន្នន័យដ៏សំខាន់របស់រទេះភ្លើងដឹកអ្នកដំណើរដែលបានធ្លាក់ចេញពីផ្លូវនៅក្នុងទីក្រុងហ្វីឡាដែលហ្វី (Philadelphia) ភាគឦសានសហរដ្ឋអាមេរិក នៅពេលដែលក្រុមអាជ្ញាធរបន្តរកកំទិចបាក់បែកនោះ។
មនុស្សយ៉ាងហោចណាស់៦នាក់បានស្លាប់ក្នុងការធ្លាក់ចេញពីផ្លូវនៃទូរទេះភ្លើងចំនួន៧នៃរទេះភ្លើងរត់ក្នុងតំបន់ភាគឦសានរបស់ក្រុមហ៊ុន Amtrak កាលពីយប់ថ្ងៃអង្គារដែលបានចេញដំណើរពីរដ្ឋធានីវ៉ាស៊ីនតោនទៅកាន់ទីក្រុងញូវយ៉ក ដោយមានមនុស្ស១៤០នាក់បានចូលសម្រាកក្នុងមន្ទីរពេទ្យ ដែលរួមមានមនុស្ស៦នាក់មានរបួសជាទំងន់។ ក្រុមមន្រ្តីនិយាយថា ក្នុងចំណោមអ្នកធ្វើដំណើរនិងអ្នកបើកបរចំនួន២៤៣នាក់នៅលើរទេះភ្លើង គេមិនដឹងចំនួនមនុស្សដែលបាត់ខ្លួននោះទេ ទោះជាយ៉ាងណាក៏ដោយ អ្នកដំណើរខ្លះអាចចាកចេញពីកន្លែងកើតហេតុនោះដោយគ្មានរបួស។
លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានមានប្រសាសន៍ថា លោកនិងភរិយារបស់លោកគឺលោកស្រី Michelle មានការរន្ធត់ហើយមានទុកព្រួយយ៉ាងខ្លាំងពីគ្រោះថ្នាក់នេះ។
លោកប្រធានាធិបតី អូបាម៉ា បានមានប្រសាសន៍ថា នៅតាមបណ្តោយរបៀងភាគឦសានរទេះភ្លើងក្រុមហ៊ុន Amtrak ជាផ្នែកមួយនៃជីវភាពប្រចាំថ្ងៃរបស់ពលរដ្ឋជាច្រើន។ ចាប់ពីរដ្ឋធានីវ៉ាស៊ីនតោននិងទីក្រុងហ្វីឡាដែលហ្វីទៅកាន់ទីក្រុងញូវយ៉កនិងទីក្រុងបូស្តូន នេះជាសោកនាដកម្មមួយដែលធ្វើឲ្យយើងទាំងអស់គ្នារំជួលចិត្ត។
លោក Michael Nutter អភិបាលក្រុងហ្វីឡាដែលហ្វីនិយាយថា ប្រអប់ខ្មៅរបស់រទេះភ្លើងនោះដែលមានលក្ខណៈស្រដៀងទៅនឹងប្រអប់ខ្មៅរបស់យន្តហោះ បានត្រូវបញ្ជូនទៅកាន់មជ្ឈមណ្ឌលកិច្ចប្រតិបត្តិការរបស់ក្រុមហ៊ុន Amtrak នៅក្នុងរដ្ឋ Delaware ដែលជារដ្ឋជិតខាង ក៏ប៉ុន្តែ ក្រុមអ្នកជំនាញមិនទាន់បានទទួលព័ត៌មានពីប្រអប់ខ្មៅនោះនៅឡើយទេ៕