មន្ត្រីជាន់ខ្ពស់របស់ក្រសួងការបរទេសសហរដ្ឋអាមេរិកកំពុងបំពេញទស្សនកិច្ចរយៈពេលពីរថ្ងៃនៅប្រទេសកម្ពុជា ចាប់ពីថ្ងៃច័ន្ទនេះ ដោយផ្តោតជាសំខាន់លើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ដែលជាច្បាប់ដ៏ចម្រូងចម្រាស ហើយនឹងពិភាក្សាបញ្ហាសិទ្ធិមនុស្ស សិទ្ធិការងារនិងបញ្ហាផ្សេងទៀត។
សេចក្តីប្រកាសព័ត៌មានរបស់ស្ថានទូតសហរដ្ឋអាមេរិកបានឲ្យដឹងថា លោក ស្គុត បើសប៊ី (Scott Busby) ឧបការីរងនៃក្រសួងការបរទេសសហរដ្ឋអាមេរិកទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារ ប្រចាំបណ្តាប្រទេសតំបន់អាស៊ីខាងកើត និងប៉ាស៊ីហ្វិកនឹងជួបជាមួយ «មន្ត្រីរាជរដ្ឋាភិបាលកម្ពុជា និងមន្ត្រីសង្គមស៊ីវិល» ដើម្បីពិភាក្សាលើបញ្ហានានាដែលសង្គមស៊ីវិលយល់ថា អាចនឹងរឹតត្បិតលំហសេរីភាពនៃការបញ្ចេញមតិនៅក្នុងប្រទេសកម្ពុជា។
លោក តឹក វណ្ណារ៉ា នាយកប្រតិបត្តិនៃវេទិកាអង្គការមិនមែនរដ្ឋាភិបាលស្តីពីកម្ពុជាហៅកាត់ថា NGO Forum ដែលនឹងជួបពិភាក្សាជាមួយលោកស្គុត បើសប៊ី (Scott Busby)នោះ បានអមអរសាទរចំពោះដំណើរទស្សនកិច្ចរបស់មន្ត្រីសិទ្ធិមនុស្សអាមេរិករូបនេះ ហើយលោកបានលើកឡើងពីក្តីកង្វល់របស់អង្គការសង្គមស៊ីវិល ដែលកំពុងធ្វើប្រតិបត្តិការនៅក្នុងប្រទេសកម្ពុជា។
«យើងនឹងរីករាយក្នុងការជួបលោក ក្នុងការពិភាក្សាដោយបើកចំហ ត្រង់ទៅត្រង់មក ជាពិសេសទាក់ទិននឹងគោលជំហរដែលអង្គការសង្គមស៊ីវិលយើងចង់បាន។ ទី១គឺយើងចង់ឲ្យរាជរដ្ឋាភិបាលកម្ពុជាបញ្ចេញសេចក្តីព្រាងច្បាប់ចុងក្រោយឆ្នាំ២០១៥ និងបើកឲ្យមានកិច្ចពិភាក្សាជាមួយអង្គការសង្គមស៊ីវិលផ្សេងទៀត»។
លោកបានបន្ថែមថា រដ្ឋាភិបាលកម្ពុជាគួរតែធ្វើតាមសំណើរបស់អង្គការសង្គមស៊ីវិល និងប្រទេសផ្តល់ជំនួយផ្សេងទៀត ដែលបានរិះគន់ និងផ្តល់អនុសាសន៍ទៅរាជរដ្ឋាភិបាលកម្ពុជានាពេលថ្មីៗនេះ។
កាលពីខែឧសភាកន្លងទៅ ទីភ្នាក់ងារអភិវឌ្ឍន៍ចំនួន៤របស់អង្គការសហប្រជាជាតិ និងឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា រួមទាំងមន្ត្រី ជាន់ខ្ពស់ផ្នែកសិទ្ធិមនុស្ស និងប្រជាធិបតេយ្យរបស់សហគមន៍អឺរ៉ុប បានធ្វើការរិះគន់ចំពោះដំណើរការតាក់តែងសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ដោយស្នើឲ្យរដ្ឋាភិបាលកម្ពុជាបញ្ចេញសេចក្តីព្រាងច្បាប់នេះ និងបើកឲ្យមានកិច្ចពិភាក្សាផ្តល់យោបល់ជាសាធារណៈផងដែរ ក៏ប៉ុន្តែរដ្ឋាភិបាលកម្ពុជាបានធ្វើការព្រមានដល់ពួកគេ ដោយចោទថា ពួកគេធ្វើការហួសដែនកំណត់ និងលូកដៃចូលក្នុងកិច្ចការផ្ទៃក្នុងរបស់ប្រទេសដ៏ក្រីក្រមួយនេះ។
អង្គការសង្គមស៊ីវិលជាច្រើនបានដាក់សំណើទៅរដ្ឋាភិបាលកម្ពុជា ហើយបានរួមគ្នាធ្វើយុទ្ធនាការ ស្នើឲ្យរដ្ឋាភិបាលកម្ពុជាបញ្ឈប់ដំណើរការបង្កើតច្បាប់ស្តីពីសមាគម និងអង្គការមិនមែនរដ្ឋាភិបាល និងសុំឱ្យបើកកិច្ចពិភាក្សាលើសេចក្តីព្រាងច្បាប់ដ៏ចម្រូងចម្រាសមួយនេះ។ សូមបញ្ជាក់ថា មានអង្គការសង្គមស៊ីវិលយ៉ាងហោចណាស់៤០០កំពុងធ្វើសកម្មភាពនៅក្នុងប្រទេសកម្ពុជាបានចូលរួមក្នុងយុទ្ធនាការ។
កាលពីសប្តាហ៍មុន ក្រុមអង្គការសង្គមស៊ីវិលមួយចំនួនបានទៅសហរដ្ឋអាមេរិកដើម្បីបង្ហាញកង្វល់របស់ពួកគេដល់សភា និងរដ្ឋាភិបាលស.រ.អា. ហើយនិងសហគមន៍ខ្មែរនៅទីនោះ។
អង្គការសង្គមស៊ីវិលទាំងនោះបានលើកឡើងថា ច្បាប់នេះនឹងប៉ះពាល់ដល់គម្រោងជាង៤.០០០របស់អង្គការសង្គមស៊ីវិលនានា ដែលកំពុងអនុវត្តគម្រោងរបស់ខ្លួននាពេលបច្ចុប្បន្ន។ មនុស្សជាង១លាននាក់អាចប្រឈមនឹងការបាត់បង់ការងារធ្វើ ប្រសិនបើរដ្ឋាភិបាលអនុម័តច្បាប់ស្តីពីសមាគម និងអង្គការមិនមែនរដ្ឋាភិបាលថ្មីនេះ ដែលកំពុងឋិតនៅក្នុងដំណើរការតាក់តែង និងកែលម្អនៅក្រសួងមហាផ្ទៃនៅឡើយ។
តាមប្រភពនានាបានឲ្យដឹងថា លោកស្គុត បើសប៊ី (Scott Busby) នឹងធ្វើការជួបចរចាជាមួយលោកហោ ណាំហុង រដ្ឋមន្ត្រីការបរទេស នាព្រឹកថ្ងៃអង្គារខាងមុខ ដែលជាថ្ងៃបញ្ចប់នៃដំណើរទស្សនកិច្ចរបស់លោក៕