ភ្ជាប់​ទៅ​គេហទំព័រ​ទាក់ទង

សកម្មជន​សុំ​ឱ្យ​រដ្ឋាភិបាល​ធ្វើ​ច្បាប់​ដែល​ចាំបាច់​ជាជាង​ច្បាប់​គ្រប់គ្រង​សង្គមស៊ីវិល


លោក ​សួន ប៊ុនស័ក្តិ​ នាយក​លេខាធិការដ្ឋាន​នៃ​គណៈកម្មាធិការ​ប្រព្រឹត្តិកម្ម​នៃ​អង្គការ​សមាគមការពារ​សិទ្ធិ​មនុស្ស​កម្ពុជា ​លើក​កាន់​រដ្ឋធម្មនុញ្ញ​កម្ពុជា​ ក្នុង​អំឡុង​​​សន្និសីទ​​ព័ត៌មាន​អំពី​យុទ្ធនាការ​​«ឈប់​និង​ពិគ្រោះ​យោបល់​លើ​ច្បាប់​​ស្តី​ពី​សមាគម​និង​អង្គការ​មិនមែន​រដ្ឋាភិ​បាល» កាល​ពី​ថ្ងៃ​ច័ន្ទ​ទី​៤ ខែ​ឧសភា ឆ្នាំ​២០១៥។ (នៅ វណ្ណារិន/VOA)

ក្រុម​អង្គ​ការ​សង្គម​ស៊ីវិល​កម្ពុជា បាន​បន្ត​សុំ​ឲ្យរដ្ឋាភិបាល​បញ្ឈប់​ការ​ធ្វើ​សេចក្តី​ព្រៀង​ច្បាប់​ស្តីពី​សមាគម​ និង​អង្គការ​មិនមែន​រដ្ឋាភិបាល​ ហើយ​ងាក​មក​មើល​សេចក្តី​ព្រាង​ច្បាប់​ផ្សេង​ៗ​ទៀត​ ដែល​មាន​ភាព​ចាំបាច់​ដល់​ជីវភាព​រស់​នៅ​របស់​ពលរដ្ឋ​កម្ពុជា។​

លោក យ៉ង់ គឹមអេង អនុប្រធាន​នៃ​សម្ព័ន្ធ​ដើម្បី​សុចរិតភាព​និង​គណនេយ្យភាព​សង្គម​ចូល​រួម​ជា​វាគ្មិន​នៅ​ក្នុង​កម្មវិធី​ហេឡូវីអូអេ​កាល​ពី​ថ្ងៃ​ទី០៨ ខែ​ឧសភា ឆ្នាំ​២០១៤។ (លឹម សុធី/វីអូអេ)
លោក យ៉ង់ គឹមអេង អនុប្រធាន​នៃ​សម្ព័ន្ធ​ដើម្បី​សុចរិតភាព​និង​គណនេយ្យភាព​សង្គម​ចូល​រួម​ជា​វាគ្មិន​នៅ​ក្នុង​កម្មវិធី​ហេឡូវីអូអេ​កាល​ពី​ថ្ងៃ​ទី០៨ ខែ​ឧសភា ឆ្នាំ​២០១៤។ (លឹម សុធី/វីអូអេ)

លោក យ៉ង់ គឹមអេង​ ប្រធាន​មជ្ឈមណ្ឌល​ប្រជា​ពលរដ្ឋ​ដើម្បី​អភិវឌ្ឍន៍ និង​សន្តិភាព​ បាន​ប្រាប់​វីអូអេ ខេមរ​ភា​សា​នៅ​ថ្ងៃព្រហស្បតិ៍​នេះ ​នៅ​ឯ​កិច្ច​ប្រជុំពិគ្រោះ​យោបល់​ស្តីពី​ការ​រៀបចំ​គោល​នយោបាយ​ និងអង្គការ​សង្គម​ស៊ីវិល​ ដែល​រៀបចំ​ឡើង​ក្នុង​ទីក្រុង​ភ្នំពេញ​ថា​ សេចក្តី​ព្រៀង​ច្បាប់​ស្តី​ពី​សមាគម​ និងអង្គការ​មិនមែន​រដ្ឋាភិបាល​ មិនមែន​ជា​ច្បាប់​ដែល​ពលរដ្ឋ​កម្ពុជា​ត្រូវការ​ជា​ចាំបាច់​នោះ​ទេ។​

លោក​លើកឡើង​ថា រដ្ឋាភិបាល​គួរ​សំឡឹង​ទៅ​មើល​សេចក្តី​ព្រាង​ច្បាប់​ណា​ ដែល​បម្រើ​ប្រយោជន៍​ពលរដ្ឋ​កម្ពុជា ​ដូចជា​ច្បាប់​ស្តីពី​សិទ្ធិ​ទទួល​បាន​ព័ត៌មាន​ជាដើម​៖

«​ច្បាប់​នេះ​វា​ អត់​ទាន់​ចាំបាច់​ហេតុអី​បាន​រុញ​? ហេតុ​អី​បាន​ប្រញាប់​ចុះ​ច្បាប់​ផ្សេងៗ​ដែល​មាន​ផលប្រយោជន៍​សម្រាប់​ប្រជា​ពលរដ្ឋ​ ម៉េច​យើង​ប្រញ៉ាប់​ប្រញ៉ាល់?​ ដូចជា​ច្បាប់​ស្តីពី​សិទ្ធិ​ទទួល​បាន​ព័ត៌មាន។​ ហើយ​ប្រជាពលរដ្ឋ​ប៉ុន្មាន​នាក់​ដែល​រងគ្រោះ ​ដោយសារ​តែ​អត់​ទទួល​បាន​ព័ត៌មាន​សាធារណៈ»។

លោក​បន្តថា​៖ «ខ្ញុំ​ឧទាហរណ៍​ ប្រជាពលរដ្ឋ​ច្រើន​ណាស់​ដែល​គាត់​លក់​ដី​ក្នុង​តម្លៃ​ថោក​ អត់ដឹង​ថា​តំបន់​ហ្នឹង​គេ​អភិវឌ្ឍ​។ ប៉ុន្តែ បើ​មាន​ច្បាប់​សិទ្ធិ​ទទួល​ព័ត៌មាន គាត់​មាន​សិទ្ធិ​ទៅ​សួរ​គេ​បាន​ ដឹង​ថា​ប្លង់​ហ្នឹង​គេប្រុង​អភិវឌ្ឍន៍​ គាត់​មិន​លក់​ដី​គាត់​ក្នុង​តម្លៃ​ថោក​នោះ​ទេ។ ប្រហែល​ជា​គាត់​លក់​ក្នុង​តម្លៃ​ សមរម្យ​ ដែល​គាត់​អាច​ទៅ​ទិញ​កន្លែង​មួយ​ផ្សេង​ទៀត​បាន ​ឬក៏​គាត់​រង់ចាំ​បន្តិច​បាន​»។

ការ​បន្ត​ស្វះស្វែង​ស្នើឲ្យ​រដ្ឋាភិបាល​បញ្ឈប់​ធ្វើ​សេចក្តី​ព្រាង​ច្បាប់​ស្តី​ពីសមាគម​ និងអង្គការ​មិនមែន​រដ្ឋា​ភិ​បាល​ពី​សំណាក់​ក្រុម​អង្គការ​សង្គម​ស៊ីវិល​ទាំងនេះ​ គឺ​ធ្វើ​ឡើង​បន្ទាប់ពី​លោក​នាយករដ្ឋ​មន្ត្រី ហ៊ុន សែន បាន​ប្រកាស​កាលពី​ថ្ងៃ​អង្គារថា​ កម្ពុជា​ត្រូវ​តែ​អនុម័ត​ច្បាប់​មួយ​ចំនួន​ ដែល​ចាំបាច់​ និង​ដែល​មាន​នៅក្នុង​ផែនការ​ដោយ​មិន​បង្អង់​ឡើយ​ បើ​ទោះ​ជា​មាន​ប្រតិកម្ម​រិះគន់​ជា​បន្ត​បន្ទាប់​ពីអង្គការ​សង្គម​ស៊ីវិល និង​សហគមន៍​អន្តរជាតិ​ក៏ដោយ។

លោក​នាយករដ្ឋមន្ត្រី ហ៊ុន សែន លើក​ដៃ​ចង្អុល​នៅ​ក្នុង​អំឡុង​ពិធី​សម្ពោធ​ស្ពាន​អ្នកលឿង​ដ៏​វែង​ជាង​គេ​ក្នុង​ប្រទេស​កម្ពុជា​កាល​ពី​ថ្ងៃ​ទី​១៤ ខែ​មករា ឆ្នាំ​២០១៥។
លោក​នាយករដ្ឋមន្ត្រី ហ៊ុន សែន លើក​ដៃ​ចង្អុល​នៅ​ក្នុង​អំឡុង​ពិធី​សម្ពោធ​ស្ពាន​អ្នកលឿង​ដ៏​វែង​ជាង​គេ​ក្នុង​ប្រទេស​កម្ពុជា​កាល​ពី​ថ្ងៃ​ទី​១៤ ខែ​មករា ឆ្នាំ​២០១៥។

លោក​នាយក​រដ្ឋមន្ត្រី​មាន​ប្រសាសន៍​កាល​ពី​ពេល​នោះ​យ៉ាង​ដូច្នេះ​ថា៖ «យើង​នឹង​បន្ត​ចេញ​ច្បាប់​តាម​ផែន​ការ​របស់​យើង​ ព្រោះ​មាន​តែ​រដ្ឋសភា​ទេ​ ដែល​មាន​សិទ្ធិ​អនុម័ត​ច្បាប់​ មិនមែន​អង្គការ​ក្រៅ​រដ្ឋា​ភិ​បាល​ ឬ​ទូត​បរទេស​នោះ​ទេ​ដែល​មាន​សិទ្ធិ​អនុម័ត​ច្បាប់​នោះ»។​

លោក យ៉ង់​ គឹមអេង​ យល់​ថា ​ការ​ប្រញ៉ាប់​ប្រញ៉ាល់​របស់​រដ្ឋាភិបាល​ក្នុង​ការ​បង្កើត​ច្បាប់​ស្តី​ពី​សមាគម និង​អង្គការ​មិនមែនរដ្ឋាភិបាល​នេះ​ គឺ​ដោយសារ​តែ​ច្បាប់​នេះ​មាន​ប្រយោជន៍​ដល់​រដ្ឋាភិបាល​ មិនមែន​ប្រយោជន៍​សម្រាប់​មហាជន​កម្ពុជា​ឡើយ។​

លោក​និយាយ​ថា៖​ «យើង​ឃើញ​ថា​ដូច​ជា​ច្បាប់​ដែល​មិន​ឲ្យ​និយាយ​ពីថា​គ្មាន​របប​ខ្មែរ​ក្រហម​ អាហ្នឹង​ដោយសារ​ប៉ះ​ពាល់​មុខមាត់​ដល់​រដ្ឋា​ភិបាល​អាហ្នឹង​ គឺ​ច្បាប់​ហ្នឹង​ចេញ​លឿន​ណាស់។ ​ហើយ​ច្បាប់​ដែល​ថា​មានផល​ប្រយោជន៍​សម្រាប់​ប្រជាពលរដ្ឋ​ យើង​ឃើញ​ច្បាប់​ប្រឆាំង​អំពើ​ពុក​រលួយ​យូរណាស់​បាទ​ជិត​២០ឆ្នាំ​បាន​ចេញ»។​

លោក ផៃ ស៊ីផាន រដ្ឋ​លេខាធិការ​ និងជាអ្នកនាំ​ពាក្យ​ទីស្តីការ​គណ​រដ្ឋមន្រ្តី​ បាន​ការពារ​ជំហរ​រដ្ឋាភិបាល​ ក្នុង​ការជំរុញ​បន្តធ្វើ​សេចក្តីព្រាង​ច្បាប់​នេះ ពីព្រោះ​អង្គការ​សង្គម​ស៊ីវិល​មិន​មាន​សិទ្ធិ​លូក​ដៃ​ចូល​កិច្ច​ការ​រដ្ឋាភិបាល​នោះ​ទេ។​

លោក ផៃ ស៊ីផាន រដ្ឋលេខាធិការ និង​អ្នក​នាំ​ពាក្យ​របស់​គណរដ្ឋមន្ត្រី ពិភាក្សា​អំពី​បញ្ហា​ជុំវិញ​បរាជ័យ​របស់​អាស៊ាន​ក្នុងការ​សម្រេច​ឲ្យ​បាន​នូវ​កិច្ច​ព្រម​ព្រៀង​លើ​ជម្លោះ​នៅ​សមុទ្រចិន​ខាង​ត្បូង ក្នុង​កម្មវិធី Hello VOA កាលពី​ថ្ងៃទី២៣ ខែកក្កដា ឆ្នាំ២០១២។
លោក ផៃ ស៊ីផាន រដ្ឋលេខាធិការ និង​អ្នក​នាំ​ពាក្យ​របស់​គណរដ្ឋមន្ត្រី ពិភាក្សា​អំពី​បញ្ហា​ជុំវិញ​បរាជ័យ​របស់​អាស៊ាន​ក្នុងការ​សម្រេច​ឲ្យ​បាន​នូវ​កិច្ច​ព្រម​ព្រៀង​លើ​ជម្លោះ​នៅ​សមុទ្រចិន​ខាង​ត្បូង ក្នុង​កម្មវិធី Hello VOA កាលពី​ថ្ងៃទី២៣ ខែកក្កដា ឆ្នាំ២០១២។

លោក​បាន​បន្ថែមថា៖ «ទីមួយ​អង្គការ​សង្គម​ស៊ីវិល​ខ្លួនឯង​ហ្នឹង​ គឺ​មិនមាន​ដែន​សមត្ថកិច្ច​អ្វីមួយ​ក្រៅពី​ស៊ី​ឈ្នួល​បរទេស​ធ្វើ​កិច្ចការ ទីមួយ។​ ហើយ​ទីពីរ​ខ្លួន​ឯង​អត់​មាន​ច្បាប់​ផង​ រឿង​អី​មក​បង្គាប់​ឲ្យ​រដ្ឋាភិបាល​ឱ្យ​ឈប់​ គឺ​ខុស​ហើយ​អា​ហ្នឹង​»។​ ​

លោក បាន​បញ្ជាក់​ផងដែរ​ថា​ សេក្តី​ព្រាង​ច្បាប់​សេចក្តី​ពី​សមាគម ​និង​អង្គការ​មិនមែន​រដ្ឋាភិបាល​មិន​ត្រូវបាន​ធ្វើឡើង​ក្នុងស្ថាន​ភាព​ប្រញ៉ាប់​ប្រញ៉ាល់​ ក្នុង​បំណង​បម្រើ​ផល​ប្រយោជន៍​របស់​រដ្ឋាភិបាល​នោះ​ទេ​ គឺច្បាប់​នេះ​មាន​អាយុ​ច្រើន​ជាង​មួយ​ឆ្នាំ​ទៅ​ហើយ​។​

លោក​ពន្យល់ថា៖ «អត់ទេ​ច្បាប់​ហ្នឹង​ ធ្វើ​ច្រើន​អាយុ​ច្រើនជាង​មួយ​ឆ្នាំ​យ៉ាងតិច​ពី​អណត្តិ​មុន​មក​។ ជាការវាយ​ប្រហារ​មក​រដ្ឋា​ភិបាល​គួរ​អាណិត​អាសូរ ដែល​សង្គម​ស៊ីវិល​ហ្នឹង​គ្មាន​ព័ត៌មាន​ច្បាស់​លាស់»។​

ក្រុម​អង្គការ​សង្គម​ស៊ីវិល​លើក​ឡើង​ថា​ ប្រសិន​បើ​សេចក្តី​ព្រាង​ច្បាប់​នេះ​ត្រូវ​ចូល​ជា​ធរមាន វានឹង​ប៉ះ​ពាល់​ដល់​គម្រោង​ជាង​៤ពាន់​របស់​អង្គការ​សង្គម​ស៊ីវិល​នានា​ ដែល​កំពុង​អនុវត្តន៍​នាពេល​បច្ចុប្បន្ន។​ជាងនេះ​ទៀត វាអាច​ធ្វើ​ឲ្យ​មនុស្ស​ជាង​១​លាន​នាក់​ប្រឈម​នឹង​ការ​បាត់​បង់​ការងារ​ធ្វើ៕

XS
SM
MD
LG