នេះជាលើកទីពីរហើយក្នុងពេលបួនឆ្នាំដែលសេចក្តីសង្ឃឹមរបស់ពួកអ្នកបោះឆ្នោតនិយមការជឿនលឿនក្នុងការធ្វើឲ្យលោក ប៊ឺនី សេនដឺ (Bernie Sanders) សមាជិកព្រឹទ្ធសភាស.រ.អា.ប្រចាំរដ្ឋ Vermont ក្លាយជាបេក្ខជនប្រធានាធិបតីរបស់គណបក្សប្រជាធិបតេយ្យបានបាត់បង់កាលពីរដូវស្លឹកឈើលាស់នេះនៅពេលលោក Sanders អំពាវនាវឲ្យមានបដិវត្តន៍សង្គមមួយនិងកម្មវិធី សុខភាពMedicare សម្រាប់ពលរដ្ឋអាមេរិកាំងគ្រប់គ្នា ហើយលោកអតីតអនុប្រធានាធិបតីចូ បៃដិន(Joe Biden) ទទួលជ័យជំនះនៅក្នុងការប្រជែងដើម្បីទទួលការតែងតាំងជាបេក្ខជនប្រធានាធិបតី។
កាលពីឆ្នាំ២០១៦ ពួកប្រជាធិបតេយ្យសេរីនិយមទាំងនេះច្រើននាក់មិនបានទៅបោះឆ្នោតទូទៅទេនៅក្រោយលោកស្រីហ៊ីលឡារី គ្លីនតុន (Hillary Clinton) បានឈ្នះលោក Sanders ក្នុងការទទួលការតែងតាំងជាបេក្ខនារីប្រធានាធិបតីរបស់គណបក្សប្រជាធិបតេយ្យហើយលោក Sanders ហាក់ដូចជាមិនបានសុំពេញទំហឹងឲ្យពួកគេគាំទ្រលោកស្រី Clinton ក្នុងការបោះឆ្នោតនោះទេ។
ក៏ប៉ុន្តែលោក Sanders បាននិយាយបង្ហាញហេតុផលខ្លាំងកាលពីយប់ថ្ងៃច័ន្ទទី១៧ខែសីហានៅពេលចាប់ផ្តើមមហាសន្និបាតគណបក្សដោយនិយាយថា បញ្ហានិងគោលនយោបាយជឿនលឿននឹងមានតទៅទៀត ប្រសិនបើពួកគេជួយលោក Biden ដែលមិននិយមជ្រុលយកជ័យជំនះលើលោកប្រធានាធិបតី ដូណាល់ត្រាំ (DonaldTrump) ក្នុងការបោះឆ្នោតទូទៅនៅថ្ងៃទី៣វិច្ឆិកាខាងមុខនេះ។
នៅក្នុងសុន្ទរកថាមួយដែលលោកបានថ្លែងពីផ្ទះរបស់លោកឯក្រុង Burlington រដ្ឋ Vermont លោកSandersបាននិយាយថា៖ «អនាគតនៃលទ្ធិប្រជាធិបតេយ្យរបស់យើងកំពុងមានគ្រោះថ្នាក់។ ទស្សនៈជាច្រើនក្នុងបណ្តាគំនិតរបស់យើងដែលយើងបានប្រយុទ្ធការពារកាលពីពីរបីឆ្នាំមុននេះ បានត្រូវចាត់ថា ជ្រុលនិយម តែនៅពេលនេះមហាជនយល់ហើយ»។
ការអំពាវនាវរបស់លោក Sanders ឲ្យមានឯកភាពក្នុងគណបក្សនេះគឺជាការងាកចេញពីវិធានការមុនៗរបស់លោក ដែលបានព៌ណនាខ្លួនលោកថា ជាអ្នកសង្គមនិយមប្រជាធិបតេយ្យដែលជាគូប្រជែងចុងក្រោយបង្អស់របស់លោក Biden កាលពីពេលមុននេះក្នុងឆ្នាំនេះ។ លោក Sandersមិនបានគាំទ្រដោយភក្តីភាពជានិច្ចចំពោះគណបក្សប្រជាធិបតេយ្យទេ ទោះបីជាលោកជាសមាជិកគណៈកម្មាធិការគណបក្សគឺcaucusនៅក្នុងព្រឹទ្ធសភាស.រ.អា.។
លោក Joe Biden បេក្ខជនប្រធានាធិបតីនៃគណបក្សប្រជាធិបតេយ្យ និងអ្នកស្រី Kamala Harris បេក្ខជនអនុប្រធានាធិបតី ស្វាគមន៍អ្នកគាំទ្រពីមជ្ឈមណ្ឌល Chase Center នៅទីក្រុង Wilmington រដ្ឋ Delaware សហរដ្ឋអាមេរិក។
សាខាជឿនលឿននិយម
លោក Sanders ត្រូវគេមើលឃើញ ថា ជាមេដឹកនាំនៃសាខាជឿនលឿននិយមរបស់គណបក្សប្រជាធិបតេយ្យដែលជាក្រុមមួយនៃពួកអ្នកបោះឆ្នោតសេរីនិយមដែលទ្រទ្រង់គោលនយោបាយកែទម្រង់សង្គមក្នុងគោលបំណងជួយប្រជារាស្ត្រអាមេរិកាំងដែលមានឋានៈទន់ខ្សោយដោយមានរួមបញ្ចូលកម្មវិធីថែទាំសុខភាពសាកល ការរៀនក្នុងមហាវិទ្យាល័យដោយមិនចាំបាច់បង់ប្រាក់ប្រាក់បៀវត្សរ៍អប្បបរិមាច្រើនជាងមុននិងអត្ថប្រយោជន៍សង្គមកិច្ចមួយចំនួនទៀត។
លោក Sanders បានអំពាវនាវឲ្យពួកអ្នកគាំទ្រលោកគិតថា ការយកជ័យជំនះលើលោក Trump មានសារៈសំខាន់ណាស់ដល់ការរក្សាបុព្វហេតុជឿនលឿននិយមនៅក្នុងការពិភាក្សាក្នុងចំណោមមហាជនអាមេរិកាំង។
លោក James Thurber ជាសាស្ត្រចារ្យនៅក្នុងដេប៉ាតឺម៉ង់វិជ្ជារដ្ឋាភិបាលនៃសាកលវិទ្យាល័យឈ្មោះAmerican University។ លោកបាននិយាយថា៖«ខ្ញុំយល់ថាលោក Sanders បានបង្ហាញដោយជោគជ័យថា លោកគាំទ្រខ្លាំងដល់លោក Joe Biden និងបេក្ខនារីអនុប្រធានាធិបតី Harris ដោយលោកបានពន្យល់ដល់ចលនារបស់លោកថា បញ្ហាជាច្រើនដែលលោកបានជំរុញនៅពេលនេះជាបញ្ហាសំខាន់ៗដែលមហាជនយកចិត្តទុកដាក់ហើយថា លោកចង់ធ្វើការជាមួយពួកជឿនលឿននិយម ពួកមិននិយមជ្រុលនិងពួកអភិរក្សនិយមដើម្បីធ្វើឱ្យលោក Biden ជាប់ឆ្នោត»។ លោកបាននិយាយយោងដល់លោកស្រី Kamala Harris សមាជិកាព្រឹទ្ធសភាស.រ.អា.ប្រចាំរដ្ឋកាលីហ្វ័រញ៉ា (California) ដែលជាដៃគូលោក Biden សម្រាប់តំណែងអនុប្រធានាធិបតីស.រ.អា.។
លោក Sanders បាននិយាយប្រាប់ពួកអ្នកគាំទ្រលោកថា សេចក្តីថ្លៃថ្នូរជឿនលឿននិយមអាចត្រូវអន្តរាយបើពួកគេមិនបោះឆ្នោតឱ្យលោក Biden ដើម្បីធ្វើឱ្យប្រាកដប្រជាថា លោកTrump មិនឈ្នះឆ្នោតធ្វើជាប្រធានាធិបតីអាណត្តិទីពីរនោះទេ។
លោកSandersបានថ្លែងកាលពីថ្ងៃច័ន្ទទី១៧ខែសីហាថា៖ «នៅក្រោមរដ្ឋបាលនេះ ការនិយមអំណាចផ្តាច់ការចាក់ឫសនៅក្នុងប្រទេសយើង។ ខ្ញុំ គ្រួសារខ្ញុំនិងគ្រួសារជាច្រើនរបស់លោកអ្នកដឹងអំពីវិធីបញ្ឆោតដែលការនិយមអំណាចផ្តាច់ការបំផ្លាញលទ្ធិប្រជាធិបតេយ្យ សុភាវធ៌មនិងមនុស្សជាតិ»។
ហេតុផលធ្វើឱ្យពួកអ្នកគាំទ្របោះឆ្នោតជូនលោកBiden
លោក ត្រាំ បាននិយាយអះអាងច្រើនដងថា ពួកប្រជាធិបតេយ្យសេរីនិយមដូចជាលោក Sandersជាដើមធ្វើសកម្មភាពដើម្បី«បំផ្លាញប្រទេស» ហើយកំពុងលើកតម្កើងសង្គមនិយមដែលប្រជារាស្ត្រអាមេរិកាំងច្រើននាក់មិនចូលចិត្ត។
វោហារសាស្ត្ររបស់លោក Sanders មានគោលដៅបង្ហាញហេតុផលឱ្យពួកអ្នកគាំទ្រលោកបោះឆ្នោតជូនលោក Biden ជាជាងនៅផ្ទះឬជ្រើសរើសបេក្ខជនម្នាក់ទៀតគឺលោកប្រធានាធិបតីដូណាល់ ត្រាំ។
លោក Thurber នៃសាកលវិទ្យាល័យAmerican University បាននិយាយថា៖ «យើងទាំងអស់គ្នាដឹងហើយថា កាលពីឆ្នាំ២០១៦លោកស្រី Hillary Clinton បានចាញ់ឆ្នោតប្រមាណ៦ម៉ឺន៨ពាន់សន្លឹកនៅក្នុងរដ្ឋសំខាន់ៗបីរួមគ្នាគឺរដ្ឋ Pennsylvania រដ្ឋ Wisconsin និងរដ្ឋ Michigan។ ហើយនៅក្នុងរដ្ឋទាំងនោះមនុស្ស១សែន ២សែននាក់បានបោះឆ្នោតឱ្យពួកបេក្ខជននៃគណបក្សទីបីនិងទីបួន ហើយជាច្រើននាក់មិនទៅបោះឆ្នោតទេ។ហើយនេះជាបញ្ហាសំខាន់នៅទីនេះ។ លោក Sanders បាននិយាយបង្ហាញហេតុផលលើកទឹកចិត្តពួកអ្នកគាំទ្រលោកឱ្យទៅបោះឆ្នោតជូនលោក Biden ហើយកុំឱ្យបោះឆ្នោតឱ្យបេក្ខជនម្នាក់ទៀត»។
ដោយកត់សម្គាល់ថា លោកនៅមានការមិនស្របគ្នាជាមួយលោកBiden អំពីគោលនយោបាយសំខាន់ៗនោះ លោក Sanders ក៏បានគូសបញ្ជាក់នៅក្នុងសុន្ទរកថាលោកថា វិស័យជាច្រើនដែលបុព្វហេតុជឿនលឿននិយមអាចត្រូវជំរុញ ប្រសិនបើពួកប្រជាធិបតេយ្យកាន់អំណាចនៅក្នុងសេតវិមានវិញ។ ពួកអ្នកធ្វើការឃោសនាបោះឆ្នោតជូនលោក Biden បានធ្វើការជាមួយលោក Sanders ក្នុងពេលប៉ុន្មានអាទិត្យមុនមហាសន្និបាតគណបក្សដើម្បីធ្វើឱ្យប្រាកដប្រជាថា គោលដៅជឿនលឿននិយមមានរួមបញ្ចូលក្នុងកម្មវិធីនយោបាយរបស់គណបក្សប្រជាធិបតេយ្យ។
លោក Sandersបាននិយាយថា លោក Biden គាំទ្របុព្វហេតុជឿនលឿននិយមដូចជាការបង្កើនប្រាក់បៀវត្សរ៍អប្បបរិមាដល់១៥ដុល្លារក្នុងមួយម៉ោងការសុំឈប់មិនធ្វើការដោយនៅមានប្រាក់បៀវត្សរ៍ដើម្បីជួយគ្រួសារមានបញ្ហាដូចជាមានជំងឺធ្ងន់ធ្ងរជាដើមនិងការផ្តល់ប្រាក់ដល់ការសិក្សាសាកលសម្រាប់កុមារអាយុ៣និង៤ឆ្នាំ ហើយធ្វើឱ្យមានការថែទាំកុមារសម្រាប់គ្រួសាររាប់លាន។
លោក Sanders បានកត់សម្គាល់ថា ផែនការថែទាំសុខភាព Medicare សម្រាប់ប្រជារាស្ត្រគ្រប់គ្នាដែលជាកម្មវិធីធានារ៉ាប់រងខាងសុខាភិបាលសម្រាប់ជនជាតិអាមេរិកាំងគ្រប់គ្នា មិនបានត្រូវរួមបញ្ចូលក្នុងកម្មវិធីនយោបាយរបស់គណបក្សទេ។
លោក Sanders បានថ្លែងថា៖ «បើទោះជា លោក Joe និងខ្ញុំមិនយល់ស្របគ្នាអំពីមា៌គាល្អបំផុតសម្រាប់ឱ្យមានផែនការថែទាំសុខភាពសាកលក៏ដោយក៏លោក Joe មានផែនការមួយដែលពង្រីកការថែទាំសុខភាពនិងបន្ថយតម្លៃឱសថ។ បន្ថែមលើនេះ លោក Joe នឹងបន្ទាបអាយុជនមានសិទ្ធិចុះឈ្មោះក្នុងកម្មវិធីMedicareពី៦៥ឆ្នាំមកនៅត្រឹម៦០ឆ្នាំ៕
ប្រែសម្រួលដោយលោកឈឹម សុមេធ