ប្រធានគណបក្សជំទាស់ដែលមានសំឡេងភាគតិចនៅរដ្ឋសភាគឺលោក សម រង្ស៊ី បានថ្លែងថា ក្រុមការងារ និងតំណាងគណបក្សសង្គ្រោះជាតិនឹងរិះរកយុទ្ធវិធី ដើម្បីទប់ស្កាត់សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល មិនឲ្យមានការអនុម័តក្នុងសម័យប្រជុំពេញអង្គសភានាពេលខាងមុខនេះ។
ថ្លែងទៅកាន់តំណាងអង្គការសង្គមស៊ីវិលជាង១០នៅក្នុងជំនួបពិសេសមួយនៅទីស្តីការរដ្ឋសភា នៅល្ងាចថ្ងៃច័ន្ទនេះ លោក សម រង្ស៊ី ប្រធានគណបក្សសង្គ្រោះជាតិ បានប្រាប់ថា គណបក្សរបស់លោកដែលមានសំឡេងភាគតិចនៅក្នុងសភានឹងព្យាយាមតស៊ូមតិគ្រប់វិធី រួមទាំងប្រើប្រាស់វប្បធម៌សន្ទនារវាងលោក និងលោកនាយករដ្ឋមន្រ្តី ហ៊ុន សែន ប្រធានគណបក្សប្រជាជនកម្ពុជាផងដែរ។
«គោលដៅរបស់យើង គឺដូចគ្នាទេ គឺយើងអត់ចង់ឲ្យច្បាប់ហ្នឹងចេញទេ។ ទី១ យើងត្រូវតែស្ទាបស្ទង់មើលជំហររបស់គេ បើថា យើងអាចនិយាយពីដើមទី យើងនឹងនិយាយតែម្តងថា យើងមិនចង់ឲ្យច្បាប់នេះចេញទេ។ ចាំមើលតើគេនឹងនិយាយយ៉ាងម៉េច?»។
លោក សម រង្ស៊ី ហៅសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលនេះថា ជាការរឹតបន្តឹងដំណើរការប្រជាធិបតេយ្យ និងសេរីភាពនៅកម្ពុជា។ លោកក៏បានឲ្យដឹងផងដែរថា វិធីសាស្ត្រទាំងនោះរួមទាំង ការនិយាយក្នុងអង្គប្រជុំអចិន្ត្រៃយ៍នៃរដ្ឋសភា ការមិនចូលរួមប្រជុំក្នុងសភាពេញអង្គ និងការដើរចេញពីការប្រជុំជាដើម ប្រសិនបើគណបក្សកាន់អំណាចចចេសថា នឹងដាក់ច្បាប់ដ៏ចម្រូងចម្រាសនេះចូលទៅក្នុងកិច្ចប្រជុំពេញអង្គនោះ។
«ទីពីរ បើយើងដឹងហើយថា ឥឡូវគេដាច់ខាត អត់ចង់ថយទេ។ គេចង់ឲ្យច្បាប់ហ្នឹងចេញ ខ្ញុំត្រូវតែពិគ្រោះយោបល់ជាមួយសហការីខ្ញុំជាមួយតំណាងរាស្ត្រទាំង៥៥នាក់ ដើម្បីធ្វើអ្វីមានលក្ខណៈប្រាដកនិយម ឲ្យមានលក្ខណៈសមរម្យ ឲ្យមានលក្ខណៈទទួលខុសត្រូវ ឲ្យមានលក្ខណៈថ្លៃថ្នូរ។ តើចូលប្រជុំជជែក ឬមិនជជែក។ ការដើរចេញហ្នឹង ចាំខ្ញុំពិគ្រោះយោបល់ទៀត»។
កាលពីសប្តាហ៍កន្លងទៅ តំណាងអង្គការធំៗទាំងនេះជាង១០ក៏ធ្លាប់បានធ្វើការជួបសម្តែងក្តីបារម្ភរបស់ខ្លួនជាមួយលោក កឹម សុខា អនុប្រធានទី១រដ្ឋសភា និងជាអនុប្រធានគណបក្សជំទាស់ផងដែរ។
អង្គការធំៗជាង១០នោះ គឺជាតំណាងអង្គការជាង៣០០ផ្សេងទៀត ដែលចូលរួមធ្វើយុទ្ធនាការបញ្ឈប់ និងស្នើឲ្យមានកិច្ចពិភាក្សាយោបល់ឲ្យបានច្រើនលើសេចក្តីព្រាងច្បាប់មួយនេះ។ អង្គការសង្គមស៊ីវិលទាំងនោះរួមមាន វេទិកានៃអង្គការមិនមែនរដ្ឋាភិបាលស្តីពីកម្ពុជាហៅកាត់ថា NGO Forum អង្គការតម្លាភាពកម្ពុជា TI មជ្ឈមណ្ឌលសិទ្ធិមនុស្សកម្ពុជា CCHR និងអង្គការ Pact Cambodia ជាដើម។
នៅក្នុងជំនួបជាមួយលោក សម រង្ស៊ី តំណាងអង្គការសំខាន់ៗទាំងនោះក៏បានសម្តែងពីក្តីបារម្ភ ចំពោះអ្វីដែលសេចក្តីព្រាងច្បាប់នេះនិងធ្វើការរឹតត្បិតដល់ដំណើរការរបស់ពួកគាត់ រួមទាំងការដំណើរការចុះបញ្ជី ការដាក់របាយការណ៍ និងសកម្មភាពហិរញ្ញវត្ថុ ការរឹតត្បិតក្នុងការចូលរួមក្នុងការអង្កេតការវិវឌ្ឍនៃលិទិ្ធប្រជាធិបតេយ្យ និងនយោបាយនៅកម្ពុជាជាដើម។
លោក ព្រាប កុល ប្រធានប្រតិបត្តិរបស់អង្គការតម្លាភាពកម្ពុជា TI បានថ្លែងបា្រប់លោក សម រង្ស៊ី ថា បើច្បាប់នេះអនុម័តអង្គការតូចៗ និងសមាគមថ្នាក់មូលដ្ឋានជាង២៥០០០នឹងប្រឈមការបិទទ្វា ដែលធ្វើប៉ះពាល់ដល់ដំណើរអង្គការសង្គមស៊ីវិលជាច្រើននៅថ្នាក់ជាតិ និងដំណើរការជំនួយនៅក្នុងប្រទេសកម្ពុជាផងដែរ។
ទោះជាយ៉ាងណាក៏ដោយ លោក ឈាង វុន អ្នកនាំពាក្យរដ្ឋសភា និងជាតំណាងរាស្ត្រមកពីគណបក្សកាន់អំណាច បានហៅការសន្យារបស់លោក សម រង្ស៊ី ថាជា«ការកេងចំណេញយកផលប្រយោជន៍នយោបាយពីប្រជារាស្ត្រ ទោះបីជាគណបក្សជំទាស់នេះមិនអាចបញ្ចប់ដំណើរការអនុម័តច្បាប់នេះក៏ដោយ។
«ចុះបើទប់ស្កាត់បានឲ្យទប់ទៅ។ បើសិនជាអ្នកតំណាងរាស្ត្រដូចគណបក្សសង្គ្រោះជាតិ ដែលមានអាសនៈអីតែ៥៥ក្នុងរដ្ឋសភាធ្វើការតាមការចង្អុលបង្ហាញ វាខុសនឹងរដ្ឋធម្មនុញ្ញបាត់ទៅហើយ ដែលគេហាមឃាត់អាណត្តិបញ្ជាគឺវាខុសបាត់ទៅហើយ»។
លោក ឈាង វុន បានឲ្យដឹងថា គណៈកម្មកាអចិន្ត្រៃយ៍រដ្ឋសភានឹងធ្វើការប្រជុំនាថ្ងៃអង្គារខាងមុខនេះ ដើម្បីសម្រេចថា គណៈកម្មាធិការជំនាញណាមួយជាអ្នកទទួលការងារបន្តលើសេចក្តីព្រាងច្បាប់ថ្មីនេះ។
សេចក្តីព្រាងច្បាប់មួយនេះបានទទួលរងការរិះគន់ជាច្រើនពីសំណាក់អង្គការសង្គមស៊ីវិល ប្រទេសម្ចាស់ជំនួយ និងទីភ្នាក់ងារអភិវឌ្ឍន៍របស់អង្គការសហប្រជាជាតិផងដែរ ព្រោះវានឹងធ្វើឲ្យប៉ះពាល់ដល់ដំណើរការ និងគម្រោងអភិឌ្ឍន៍ធំៗនៅក្នុងប្រទេសដ៏ក្រីក្រនេះ៕