ថ្នាក់ដឹកនាំកំពូលនៃគណបក្សសង្គ្រោះជាតិបានធ្វើការប្រជុំនៅក្នុងប្រទេសហ្វីលីពីន ដើម្បីកំណត់ជំហរ និងគោលនយោបាយរបស់ខ្លួនឡើងវិញ ក្រោយពេលដែលមានការគាបសង្កត់ និងការបំភិតបំភ័យពីគណបក្សកាន់អំណាចរបស់លោកនាយករដ្ឋមន្ត្រី ហ៊ុន សែន។ មន្ត្រីសំខាន់ៗរបស់គណបក្សជំទាស់នឹងវិលត្រឡប់មកប្រទេសកម្ពុជាវិញនាថ្ងៃអង្គារស្អែកនេះ បន្ទាប់ពីកិច្ចប្រជុំដ៏សំខាន់មួយនៅទីក្រុងម៉ានិល ប្រទេសហ្វីលីពីននោះ។
លោក កឹម សុខា អនុប្រធានគណក្សជំទាស់ និងតំណាងរាស្ត្រគណបក្សនេះពីររូបដែលរងរបួសក្នុងការវាយដំនោះ នឹងវិលត្រឡប់មកកាន់ប្រទេសកម្ពុជានាថ្ងៃអង្គារស្អែកនេះ រីឯលោក សម រង្ស៊ី ប្រធានគណបក្សជំទាស់នឹងធ្វើដំណើរទៅកាន់ទ្វីបអឺរ៉ុប។ នេះបើយោងតាមព័ត៌មានដែលចុះផ្សាយក្នុងទំព័រហ្វេសប៊ុកផ្ទាល់ខ្លួនរបស់លោក កឹម សុខា និងលោក សម រង្ស៊ី។
លោក កឹម សុខា បានសរសេរក្នុងទំព័រហ្វេសប៊ុករបស់លោកនាថ្ងៃច័ន្ទនេះថា លោកបានឈាងចូលសួរសុខទុក្ខ លោក ញ៉យ ចំរើន និងលោក គង់ សភានៅទីក្រុងបាងកក ប្រទេសថៃ មុនពេលរួមដំណើរត្រឡប់មកកម្ពុជាវិញជាមួយមន្ត្រីសំខាន់ៗរបស់គណបក្សសង្គ្រោះជាតិនោះ។
ដំណើរវិលត្រឡប់មកវិញរបស់លោក កឹម សុខា និងតំណាងរាស្ត្រសំខាន់ៗរបស់គណបក្សជំទាស់នេះគឺធ្វើឡើងមិនប៉ុន្មានថ្ងៃទេ បន្ទាប់ពីកិច្ចប្រជុំពិសេសមួយ ដើម្បីកំណត់ផែនការយុទ្ធសាស្ត្ររបស់ខ្លួន បន្ទាប់ពីរងសម្ពាធនយោបាយពីគណបក្សកាន់អំណាច។
ក្នុងវីដេអូខ្លីពីទីក្រុងម៉ានិល ប្រទេសហ្វីលីពីន លោក សម រង្ស៊ី ប្រធានគណបក្សសង្គ្រោះជាតិ និងលោក កឹម សុខា អនុប្រធានគណបក្សជំទាស់នេះ បានបញ្ជាក់ថា សមាជិកសំខាន់ៗក្នុងគណបក្សបានជួបជុំគ្នានាសប្តាហ៍កន្លងទៅដើម្បីកំណត់គោលដៅរបស់គណបក្សជំទាស់ឡើងវិញ។ ទោះជាយ៉ាងណាក្តី លោក សម រង្ស៊ី បានបញ្ជាក់ថា គណបក្សរបស់លោកនៅតែមានជំហរដដែលក្នុងការព្យាយាមឱ្យមានការផ្លាស់ប្តូរនៅក្នុងប្រទេសដ៏ក្រីក្រនេះ។
ក្នុងវីដេអូខ្លីមួយ ដែលផ្សាយក្នុងទំព័រហ្វេសប៊ុករបស់លោកនាចុងសប្តាហ៍កន្លងមកនេះ លោក សម រង្ស៊ី បានថ្លែងនៅយ៉ាងដូច្នេះថា៖
«ទោះជាមានព្រឹត្តិការណ៍ថ្មីៗមួយចំនួន ទោះជាស្ថានការណ៍នយោបាយប្រែប្រួលយ៉ាងណាក៏ដោយ ក៏ជំហររបស់របស់យើង និងគោលដៅរបស់យើង នៅដដែល។ ទឹកចិត្តរបស់យើង និងការប្តេជ្ញាចិត្តរបស់យើងនៅដដែល។ យើងចង់ឲ្យមានការផ្លាស់ប្តូរ ហើយការផ្លាស់ប្តូរនេះគឺធ្វើឡើងតាមរយៈការបោះឆ្នោតដោយសន្តិវិធី។ ជំហររបស់យើងគឺជំហរអហិង្សា ភាពថ្លៃថ្នូរដើម្បីដឹកនាំប្រទេសកម្ពុជាឈានទៅរកភាពរុងរឿង»។
ប្រធានគណបក្សជំទាស់ដដែលនេះបានស្នើឲ្យប្រជារាស្ត្រខ្មែរដែលស្រឡាញ់យុត្តិធម៌ សូមរួបរួមគ្នាជុំវិញគណបក្សសង្គ្រោះជាតិ ដើម្បីឈានដល់ការផ្លាស់ប្តូរក្នុងពេលឆាប់ៗខាងមុខនេះ។
នយោបាយក្នុងប្រទេសកម្ពុជាបានប្រឈមនឹងភាពតានតឹងជាបន្តបន្ទាប់នាប៉ុន្មានសប្តាហ៍មកនេះ បន្ទាប់ពីមានការវាយប្រហារលើតំណាងរាស្ត្រគណបក្សសង្គ្រោះជាតិ ការបោះឆ្នោតទម្លាក់លោក កឹម សុខា ចេញពីតំណែងអនុប្រធានទី១នៃរដ្ឋសភា ការចេញដីកាចាប់ខ្លួនលោក សម រង្ស៊ី ប្រធានគណបក្សសង្គ្រោះជាតិពីបទបរិហារកេរ្តិ៍ និងញុះញ៉ង់ តាមពាក្យបណ្តឹងរបស់លោក ហោ ណាំហុង តាំងពីឆ្នាំ២០០៨ និងការដករូបលោកចេញពីរដ្ឋសភាជាដើម។
លោក សម រង្ស៊ី ដែលសព្វថ្ងៃនេះកំពុងរស់នៅនីរទេសខ្លួននៅក្រៅប្រទេស ត្រូវបានតុលាការកាត់ទោសឲ្យជាប់ពន្ធនាគាររយៈពេលពីរឆ្នាំតាំងពីឆ្នាំ២០១៣ចំពោះការចោទថា លោក ហោ ណាំហុង បានឃុបឃិតជាមួយនឹងក្រុមខ្មែរក្រហមពេលលោក ហោ ណាំហុង នៅក្នុងមន្ទីរឃុំឃាំងបឹងត្របែក។
លោក កឹម សុខា ដែលចូលរួមក្នុងកិច្ចប្រជុំផ្ទៃក្នុងគណបក្សសង្គ្រោះជាតិដែរនោះបានថ្លែងនៅក្នុងវីដេអូខ្លីនោះផងដែរថា៖
«ខ្ញុំជាមួយលោកប្រធាន សម រង្ស៊ី និងសហការីថ្នាក់ដឹកនាំគណបក្សសង្គ្រោះជាតិ បាននឹងកំពុងជួបជុំគ្នានៅទីក្រុងម៉ានិលក្នុងថ្ងៃនេះគឺដើម្បីកំណត់នូវយុទ្ធសាស្ត្រនយោបាយរយៈពេលខ្លី រយៈពេលមធ្យម និងរយៈពេលវែង ក្នុងគោលដៅដើម្បីដណ្តើមយកជ័យជម្នះក្នុងការបោះឆ្នោតឆ្នាំ២០១៧ និងឆ្នាំ២០១៨ និងឈានទៅដឹកនាំប្រទេស ដើម្បីធ្វើការកែទម្រង់ប្រទេសជាតិយើងឲ្យទៅជាប្រទេសកាន់លទ្ធិប្រជាធិបតេយ្យសេរីពហុបក្សពិតប្រាកដ និងដើម្បីលើកកម្ពស់ជីវភាពរបស់ប្រជាពលរដ្ឋខ្មែរតាមសេចក្តីប៉ងប្រាថ្នារបស់ប្រជាពលរដ្ឋខ្មែរយើង»។
លោក សុខ ឦសាន អ្នកនាំពាក្យនៃគណបក្សប្រជាជនកម្ពុជាបានថ្លែងរិះគន់ខ្លាំងៗចំពោះការលើកឡើងរបស់ថ្នាក់ដឹកនាំកំពូលនៃគណបក្សជំទាស់ដោយលោកលើកហេតុផលថា ការលើកឡើងរបស់ថ្នាក់ដឹកនាំគណបក្សជំទាស់នេះគឺគ្រាន់តែជាការបោកប្រាស់អ្នកគាំទ្ររបស់ខ្លួនកុំឲ្យងាករេពីគណបក្សជំទាស់របស់ខ្លួន និងបង្ហាញពីមហិច្ឆតារបស់ថ្នាក់ដឹកនាំគណបក្សនេះក្នុងការព្យាយាមផ្តួលរំលំរដ្ឋាភិបាលរបស់លោក ហ៊ុន សែន។
លោក សុខ ឦសាន បញ្ជាក់ប្រាប់ VOA ថា៖
«អញ្ចឹងទេគឺវាមិនមានអីគួរឲ្យប្លែក គួរឲ្យភ្ញាក់ផ្អើលនោះទេ គឺមហិច្ឆតារបស់គាត់គឺអំណាចតែប៉ុណ្ណឹងទេ។ អញ្ចឹងដោយសារតែគាត់ដើរក៏យល់សប្តិ ដេកក៏យល់សប្តិឃើញតែអំណាចហ្នឹង អញ្ចឹងទេបានជាគាត់ហ៊ានធ្វើអីគ្រប់បែបយ៉ាងទាំងអស់ ទោះបីជាអំពើហ្នឹងវាខុសច្បាប់ ផ្ទុយអំពីច្បាប់ក៏គាត់ហ៊ានអនុវត្តដែរ»។
ក៏ប៉ុន្តែអ្នកនាំពាក្យគណបក្សកាន់អំណាចរូបនេះបានបញ្ជាក់ពីជំហរនៃការចរចារបស់គណបក្សខ្លួន ដើម្បីផ្សះផ្សាភាពរកាំរកូសនយោបាយកម្ពុជាឡើងវិញ។
«គោលជំហររបស់គណបក្សប្រជាជនកម្ពុជាក៏ដូចជាថ្នាក់ដឹកនាំគណបក្សប្រជាជនកម្ពុជាគឺលោកនៅតែបើកចំហអំពីវប្បធម៌សន្ទនា ក៏ប៉ុន្តែដូចយើងបានជ្រាបស្រាប់ហើយ គឺវប្បធម៌សន្ទនានេះវាគ្របដណ្តប់តែការងារនយោបាយទេ អត់មានគ្របដណ្តប់ការងារតុលាការ ហើយនិងការងារផ្លូវច្បាប់បាននោះទេ បាទ។ ដូច្នេះខុសពីកម្មវត្ថុហ្នឹងគឺយើងមិនអាចពិភាក្សាគ្នាបានទេ បាទ។ ហើយដូចយើងដឹងស្រាប់ហើយថា រឿងឯកឧត្តម សម រង្ស៊ី គឺជារឿងផ្លូវច្បាប់សុទ្ធសាធ គឺជាពាក្យបណ្តឹងរបស់ឯកឧត្តម ហោ ណាំហុងជាមួយនឹងឯកឧត្តម សម រង្ស៊ី គឺជាបុគ្គលនិងបុគ្គលទេ»។
កាលពីសប្តាហ៍កន្លងទៅ លោក Scott Busby ឧបការីរងរដ្ឋមន្ត្រីក្រសួងការបរទេសស.រ.អា.ទទួលបន្ទុកលទ្ធិប្រជាធិបតេយ្យ សិទ្ធិមនុស្ស និងពលកម្ម ក្នុងតំបន់អាស៊ី បានបញ្ជាក់ពីក្តីបារម្ភ និងការដើរថយក្រោយនៃលទ្ធិប្រជាធិបតេយ្យក្នុងប្រទេសកម្ពុជា ដល់ព្រឹទ្ធសភារបស់ស.រ.អា.។ ក្នុងនោះ លោកScott Busby ថ្លែងថា ការបោះឆ្នោតឃុំសង្កាត់នៅឆ្នាំ២០១៧ និងការបោះឆ្នោតជាតិឆ្នាំ២០១៨ខាងមុខនឹងមិនមានលក្ខណៈសេរី និងយុត្តិធម៌ទេ ហើយអាចនឹងមានអំពើហិង្សាផងដែរ។
យ៉ាងណាក៏ដោយ លោក កឹម សុខា អនុប្រធានគណបក្សជំទាស់ និងមន្ត្រីសំខាន់ៗរបស់គណបក្សនេះ គ្រោងនឹងវិលមកប្រទេសកម្ពុជាវិលនៅថ្ងៃអង្គារខាងមុខនេះ រីឯលោក សម រង្ស៊ី នឹងបន្តធ្វើដំណើរទៅកាន់ទ្វីបអឺរ៉ុប៕