លោក សម រង្ស៊ី មេដឹកនាំគណបក្សជំទាស់ នៅព្រឹកថ្ងៃពុធនេះ បានប្រាប់អ្នកចូលរួមពិធីបុណ្យរំឭកដល់ជនរងគ្រោះ នៅក្នុងការវាយប្រហារដោយគ្រាប់បែកដៃក្បែររដ្ឋសភាចាស់ កាលពីឆ្នាំ១៩៩៧ ថា តុលាការប្រទេសបារាំង បានចាប់ផ្តើមសើរើ សំណុំរឿងនេះ ដែលបានអូសបន្លាយពេល១៩ ឆ្នាំមក នេះ។
ការថ្លែងរបស់លោក សម រង្ស៊ី ប្រធានគណបក្សសង្គ្រោះជាតិ ធ្វើឡើងនៅស្របពេលដែលជនរងគ្រោះ ដែលនៅរស់រានមានជីវិតពីការវាយប្រហារនេះ បន្តទាមទារឲ្យរដ្ឋាភិបាលរកយុត្តិធម៌ដល់អ្នកដែលបានស្លាប់នៅក្នុងព្រឹត្តិការណ៍វាយប្រហារនោះ។
លោក សម រង្ស៊ី ដែលកំពុងនិរទេសខ្លួននៅក្រៅប្រទេស បានថ្លែងប្រាប់អ្នកចូលរួមប្រមាណជាង ១០០នាក់ នៅក្នុងពិធីបុណ្យនោះ តាមបណ្តាញទំនាក់ទំនងអេឡិកត្រូនិក Skype យ៉ាងដូច្នេះថា៖
«តុលាការបារាំងនៅក្នុងទីក្រុងប៉ារីស បានបើកសំណុំរឿងនេះ ឡើងវិញពីព្រោះមានហេតុការណ៍ថ្មីៗ ដែលគេបានដាក់បញ្ចូលក្នុងសំណុំរឿង។ ឥឡូវគេបានសម្រេចបើកសំណុំរឿងនេះ ឡើងវិញ»។យ៉ាងណាក៏ដោយ លោក សម រង្ស៊ី មិនបានបញ្ជាក់ពីកាលបរិច្ឆេទ អំពីការចាប់ផ្តើមសើរើរបស់តុលាការបារាំង នៅក្នុងសំណុំរឿងនេះទេ។ លោកគ្រាន់តែបញ្ជាក់ថា តុលាការប្រទេសបារាំង នឹងបង្កើនភាពសកម្មរបស់ខ្លួន ដើម្បីធ្វើឲ្យសំណុំរឿងដំណើរការទៅមុខ ជាមួយនឹងការស៊ើបអង្កេតដោយឯករាជ្យមួយ។ មេដឹកនាំ បក្សប្រឆាំងរូបនេះ ក៏បានចោទប្រកាន់ថា ការគប់គ្រាប់បែកឆ្នាំ ១៩៩៧ ជាអំពើភេរវកម្ម ដែលរៀបចំដោយរដ្ឋអំណាច។
នៅក្នុងការវាយប្រហារដ៏ឃោរឃៅ ដែលបានកើតឡើងកាលពីថ្ងៃទី ៣០ ខែ មិនា ឆ្នាំ ១៩៩៧ មានមនុស្សស្លាប់ចំនួន១៦នាក់ ដែលជាបុរស ស្រ្តី និងក្មេងៗ និងជាង ១០០នាក់ផ្សេងទៀតបានរងរបួស។ ការវាយប្រហារនោះបានកើតឡើង ខណៈដែលលោក សម រង្ស៊ី កំពុងដឹកនាំអ្នកគាំទ្ររបស់លោកប្រមាណ ២០០នាក់ នៅលើសួនច្បារ ក្បែររដ្ឋសភាចាស់ ដើម្បីរិះគន់ភាពមិនឯករាជ្យរបស់ប្រព័ន្ធតុលាការ និងប្រព័ន្ធតុលាការពុករលួយនៅកម្ពុជា។
របាយការណ៍របស់អង្គការសិទ្ធិមនុស្ស Human Rights Watch បានឲ្យដឹងថា ការស៊ើបអង្កេតមួយរបស់ ទីភ្នាក់ងារស៊ើបអង្កេតសហព័ន្ធរបស់សហរដ្ឋអាមេរិក (FBI) បានបញ្ចប់ការសន្និដ្ឋានរបស់ខ្លួនថា មន្ត្រីរដ្ឋាភិបាលជាច្រើន ជាអ្នកទទួលខុសត្រូវ ចំពោះការវាយប្រហារនោះ។
យ៉ាងណាក៏ដោយ ជនរងគ្រោះ ពីអំពើឃោរឃៅនេះ នៅតែទាមទាររកយុត្តិធម៌ ដោយមិនរាថយ។
អ្នកស្រី អ៊ីម ម៉ាឡែន វ័យ ៧៤ ឆ្នាំ ជាជនរងគ្រោះ ដោយការវាយប្រហារនោះ បានថ្លែងប្រាប់ក្រុមអ្នកសារព័ត៌មាន អំពីការឈឺចាប់របស់អ្នកស្រី និងការចង់បានយុត្តិធម៌ពីការវាយប្រហារដែលបានធ្វើឲ្យអ្នកស្រីក្លាយជាជនពិការជើងទាំងពីរ។ អង្គុយនៅលើកៅអីរុញជនពិការ អ្នកស្រី អ៊ីម ម៉ាឡែននិយាយថា ៖
«ចង់បានយុត្តិធម៌ ចង់បានឲ្យអន្តរជាតិថា មិនបានអីក៏ដោយ ឲ្យតែបានយកអ្នកក្បត់ដែលមកសម្លាប់ ប្រជារាស្ត្រនេះ ឲ្យយកមកឲ្យខ្ញុំមើលឃើញវាផង អាវាអ្នកបោកគ្រាប់បែកសម្លាប់ខ្ញុំនេះ។ ខ្ញុំចង់បានតែប៉ុណ្ណឹងទេ ខ្ញុំអត់ចង់បានអីទេ។ ចង់បានមើលមុខវាសម្លាប់ខ្មែរនេះ។ ខ្មែរនិងខ្មែរមកសម្លាប់នេះ»។
លោក សុខ ឦសាន អ្នកនាំពាក្យគណបក្សគ្រប់គ្រងប្រទេស បានមានប្រសាសន៍ប្រាប់ VOA ថា លោកសម រង្សី ត្រូវរកភស្តុតាងមកគាំទ្រការចោទប្រកាន់របស់លោក។
«រឿងនេះ ឲ្យគាត់រកភស្តុតាងមក មានស្អី។ រកភស្តុតាងទៅដើម្បីប្តឹង មិនមែនចេះតែថា លេងៗទេ។ បើគាត់ថាអញ្ចឹងរាល់តែឆ្នាំហ្នឹង តែថ្ងៃហ្នឹងគាត់ថា ថ្ងៃក្រោយ ឆ្នាំក្រោយ ថ្ងៃហ្នឹងទៀត គាត់ថាទៀត។ អាហ្នឹងថា ប៉ុន្មានឆ្នាំហើយ ១៩ឆ្នាំ ហើយមានប្រយោជន៍អី»។
លោកក៏បាន ច្រានចោលរបាយការណ៍ របស់អង្គការឃ្លាំមើលការរំលោភសិទ្ធិមនុស្សផងដែរ ទាក់ទិនការទទួលខុសត្រូវរបស់មន្ត្រីរដ្ឋាភិបាលចំពោះការវាយប្រហារដោយគ្រាប់បែកដៃនេះ។
VOA ព្យាយាមទាក់ទងសុំការអធិប្បាយពីលោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ អំពីការស៊ើបអង្កតសំណុំរឿងនេះ ដោយអាជ្ញាធរមានសមត្ថកិច្ចកម្ពុជា តែនៅមិនទាន់អាចទាក់ទងបាន។
របាយការណ៍របស់អង្គការឃ្លាំមើលការរំលោភសិទ្ធិមនុស្សដដែលនោះ បានឲ្យដឹងបន្ថែមថា នៅថ្ងៃដែលមានការវាយប្រហារដោយគ្រាប់បែកដៃនោះ កងអង្គរក្សផ្ទាល់ខ្លួន របស់លោក នាយករដ្ឋមន្ត្រី ហ៊ុន សែន ត្រូវបានដាក់ពង្រាយជាលើកដំបូងនៅឯទីកន្លែងធ្វើបាតុកម្ម។ កងអង្គរក្សនោះ ត្រូវគេស្គាល់ថា ជាកងពលតូច «ង៧០»។
ជាមួយនឹង ឧបករណ៍ទប់ស្កាត់អំពើកុបកម្មគ្រប់យ៉ាង កងពលនេះ មិនត្រឹមតែបរាជ័យ នៅក្នុងការរារាំងការវាយប្រហារនោះទេ ប៉ុន្តែថែមទាំងត្រូវបាន សាក្សីជាច្រើន ឲ្យដឹងថា បាន បើកជួរឈរជើងរបស់ខ្លួន អនុញ្ញាតឲ្យអ្នកគប់គ្រាប់បែករត់គេចខ្លួន និងបានគំរាមបាញ់មនុស្សដែលព្យាយាមតាមចាប់អ្នកវាយប្រហារ៕