ខណៈយោធានិងអាជ្ញាធរកម្ពុជាកំពុងរឹតបន្តឹងខាងសន្តិសុខតាមព្រំដែន ដើម្បីត្រៀមចាប់ខ្លួនមេដឹកនាំនិងសមាជិកនៃគណបក្សសង្គ្រោះជាតិ ដែលនិរទេសក្រៅប្រទេស លោក សម រង្ស៊ី ដែលជាប្រធានស្ដីទីគណបក្សនេះ នៅតែបន្តឈរលើជំហររបស់លោក ក្នុងការធ្វើមាតុភូមិនិវត្តន៍ទៅកម្ពុជាវិញ។ លោកបានអំពាវនាវឲ្យសហគមន៍អន្តរជាតិ«ឈរជាមួយគោលជំហរ»របស់គណបក្សប្រឆាំងមួយនេះ ដើម្បីលទ្ធិប្រជាធិបតេយ្យនៅកម្ពុជា។ នេះបើយោងតាមអត្ថបទទស្សនៈផ្ទាល់របស់លោក សម រង្ស៊ី ដែលចុះផ្សាយលើគេហទំព័រ Project Syndicate កាលពីថ្ងៃទី១ ខែវិច្ឆិកាកន្លងទៅនេះ។
នៅក្នុងអត្ថបទបែបទស្សនៈដែលមានចំណងជើងថា «The Fall and Rise of Cambodia's Opposition» ឬជាភាសាខ្មែរថា «ការធ្លាក់ចុះនិងកើនឡើងនៃគណបក្សប្រឆាំងរបស់កម្ពុជា» លោកសម រង្ស៊ី បានសរសេរជាភាសាអង់គ្លេសដែលត្រូវបានបកប្រែជាភាសាខ្មែរថា៖ «មិត្តរបស់កម្ពុជា ជាពិសេសប្រទេសទាំង១៨ដែលជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ត្រូវតែធ្វើអ្វីគ្រប់យ៉ាងក្នុងអំណាចរបស់ខ្លួន ដើម្បីបញ្ចុះបញ្ចូលកុំឲ្យរដ្ឋាភិបាលផ្តាច់ការ [របស់លោកនាយករដ្ឋមន្ត្រី ហ៊ុន សែន] ប្រើអំពើហិង្សាលើប្រជាពលរដ្ឋរបស់ខ្លួន ដែលអនុវត្តសិទ្ធិនិងសេរីភាពរបស់ពួកគេដែលត្រូវបានធានាដោយសន្ធិសញ្ញាអន្តរជាតិ»។
មេដឹកនាំប្រឆាំងរូបនេះ ដែលជាដៃគូប្រជែងយូរឆ្នាំខាងនយោបាយរបស់លោកនាយករដ្ឋមន្ត្រី ហ៊ុន សែន ក៏បានអះអាងថា លោកនិងក្រុមរបស់លោក នឹងធ្វើដំណើរវិលត្រឡប់ទៅកាន់កម្ពុជាវិញ នៅថ្ងៃទី៩ ខែវិច្ឆិកាខាងមុខនេះ ដើម្បីស្ដារលទ្ធិប្រជាធិបតេយ្យនៅកម្ពុជា ហើយលោកសង្ឃឹមថា «សហគមន៍អន្តរជាតិនឹងឈរលើគោលជំហររបស់ពួកយើង»។
នៅកម្ពុជាវិញ រដ្ឋាភិបាលកម្ពុជាក៏បានហាមមិនឲ្យក្រុមហ៊ុនអាកាសចរណ៍ទាំងអស់ដឹកលោក សម រង្ស៊ី និងមន្ត្រីមួយចំនួនរបស់គណបក្សប្រឆាំងមួយនេះ ដែលគ្រោងធ្វើដំណើរមកកម្ពុជាវិញទេ។ បន្ថែមលើនេះ កម្លាំងចម្រុះបានចាប់ផ្តើមយាមកាមនៅទីតាំងក្បែរព្រំដែនប្រទេសថៃនិងច្រកព្រំដែនតូចៗ ក៏ដូចជាខ្សែបន្ទាត់ព្រំដែននានា ដើម្បីត្រៀមទប់ទល់នឹងការមកដល់របស់លោក សម រង្ស៊ី។
ស្របពេលជាមួយគ្នានេះ គេក៏ឃើញមានការផ្សព្វផ្សាយមួយដែលថា គណបក្សសង្គ្រោះជាតិបានសម្រេចពន្យារពេលនៃការវិលត្រឡប់មកកម្ពុជាវិញរបស់លោក សម រង្ស៊ី និងមេដឹកនាំបក្សដទៃទៀត ដែលមន្ត្រីគណបក្សប្រឆាំងបានចាត់ទុកព័ត៌មាន ដែលផ្សព្វផ្សាយតាមបណ្តាញហ្វេសប៊ុកនេះថា ជាព័ត៌មានក្លែងក្លាយ។
នៅសល់តែ៤ថ្ងៃទៀតបណ្តោះ កម្ពុជាអាចប្រឈមនឹងតេស្តនយោបាយដ៏តានតឹងមួយ នៅពេលដែលរដ្ឋាភិបាលរបស់លោក ហ៊ុន សែន បានប្តេជ្ញាយ៉ាងដាច់អហង្ការ ថា នឹងចាប់ខ្លួនលោកសម រង្ស៊ី និងក្រុមរបស់លោក រួមទាំងអ្នកគាំទ្ររបស់គណបក្សសង្គ្រោះជាតិ ដែលប្រកាសចូលរួមទទួលការវិលត្រឡប់របស់លោក សម រង្ស៊ី ខណៈដែលលោក សម រង្ស៊ី នៅតែប្រកាន់ជំហរវិលត្រឡប់ចូលប្រទេសវិញ៕