ក្រសួងការពារប្រទេសរុស្ស៊ីប្រាប់ឲ្យដឹងថា យន្តហោះយោធាមួយគ្រឿងដែលមានមនុស្ស៩៣នាក់នៅលើនោះ រួមទាំងអ្នកចម្រៀងយោធាដ៏មានប្រជាប្រិយភាពបានធ្លាក់នៅក្នុងសមុទ្រខ្មៅភា្លមៗបន្ទាប់ពីហោះចេញពីទីកន្លែងលំហែកាយសូជី។
ពួកមន្រ្តីនិយាយថា កម្ទេចបាក់បែកមកពីយន្តហោះ និងសាកសពខ្លះបានត្រូវគេរកឃើញនៅក្នុងផ្ទៃទឹកទល់មុខឆ្នេរសមុទ្ររុស្ស៊ី។ ផ្នែកដ៏សំខាន់មួយរបស់យន្តហោះស្ថិតនៅចម្ងាយ១គីឡូម៉ែត្រកន្លះនៅផ្ទៃទឹកក្នុងជម្រៅប្រហែល៧០ម៉ែត្រ។
យន្តហោះធុន Tu-154 បានបាត់ពីប្រព័ន្ធរ៉ាដាតែប៉ុន្មាននាទីបន្ទាប់ពីហោះចេញពីទីកន្លែងលំហែកាយសូជីនៅម៉ោង ៥និង៤០នាទីព្រឹក។ យន្តហោះនោះបានហោះទៅកាន់មូលដ្ឋានទ័ពអាកាសនៅក្នុងប្រទេសស៊ីរី។
គ្មានការចង្អុលបង្ហាញពីមូលហេតុនៃការធ្លាក់យន្តហោះនោះនៅឡើយទេ។ ពួកមន្រ្តីនិយាយថា គ្មានសញ្ញាភាពអាសន្នបានបញ្ជូនចេញពីបន្ទប់បើកបរទេ។
កិច្ចប្រតិបត្តិការរុករកកំពុងបន្តធ្វើឡើង។ពួកអាជ្ញាធរនិយាយថា មិនសង្ឃឹមថាមានមនុស្សនៅរស់រានមានជីវិតទេ។
ក្រសួងការពារប្រទេសរុស្ស៊ីបានប្រាប់ឲ្យដឹងថា យន្តហោះម៉ាស៊ីន៣ដែលរចនាដោយសូវៀត បានធ្វើការហោះហើរជាប្រចាំទៅកាន់ទីតាំងមូលដ្ឋានអាកាសរុស្ស៊ីនៅខាងក្រៅទីក្រុង Latakia ទីក្រុងឆ្នេរសមុទ្ររបស់ប្រទេសស៊ីរី។
ក្រសួងការពារប្រទេសរុស្ស៊ីបានប្រាប់ឲ្យដឹងថា យន្តហោះនោះបានដឹកកងទ័ពនិងសមាជិកក្រុមអ្នកចម្រៀងយោធាប្រុសៗឈ្មោះ Alexandrov Ensemble ដែលបានហោះទៅកាន់ប្រទេសស៊ីរីដើម្បីចូលរួមពិធីបុណ្យចូលឆ្នាំថ្មីនៅឯមូលដ្ឋានយោធា។
នៅលើយន្តហោះនោះមានលោកស្រី Yelizaveta Glinka ជាវេជ្ជបណ្ឌិតរុស្ស៊ីដ៏ល្បី ល្បាញដែលគេស្គាល់ដោយសារការងារសប្បុរសធម៌របស់លោកស្រី។ លោកស្រីធ្វើដំណើរទៅកាន់ទីនោះដើម្បីជួយផ្តល់ជំនួយសុខាភិបាលដល់ប្រទេសស៊ីរី៕