រុស្ស៊ីនិយាយថា ការសម្រេចរបស់សហរដ្ឋអាមេរិកកាលពីពេលថ្មីៗនេះក្នុងការបន្ធូរបន្ថយការដាក់កម្រិតលើក្រុមឧទ្ទាមប្រដាប់អាវុធស៊ីរីគឺជា«សកម្មភាពបង្ករឿង» ដែលអាចបង្កគ្រោះថ្នាក់ដល់កងកម្លាំងរុស្ស៊ីនិងផលប្រយោជន៍ផ្សេងទៀតរបស់រុស្ស៊ីនៅក្នុងប្រទេសស៊ីរី។
អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានរិះគន់ការកែប្រែគោលនយោបាយរបស់អាមេរិកកាលពីថ្ងៃអង្គារ ដោយប្រាប់ទីភ្នាក់ងារសារព័ត៌មាន Reuters ថា៖ «សក្តានុពលក្នុងការផ្គត់ផ្គង់សព្វាអាវុធដល់ក្រុមឧទ្ទាម ដោយរួមមានទាំងរថក្រោះបាញ់យន្តហោះ ត្រូវបានសរសេរបញ្ចូលទៅក្នុងច្បាប់ថ្មីនេះ»។ លោកស្រីសំដៅទៅលើវិធានការការពារមួយដែលចុះហត្ថលេខាដោយលោកប្រធានាធិបតីអាមេរិក បារ៉ាក់ អូបាម៉ា ដែលលោករិះគន់រុស្ស៊ីចំពោះការពាក់ព័ន្ធនឹងសង្គ្រាមនៅក្នុងប្រទេសស៊ីរី។
លោកស្រីបាននិយាយថា កងកម្លាំងផ្លូវអាកាសរបស់រុស្ស៊ីជាមួយនឹងយោធារុស្ស៊ីដទៃទៀតនិងស្ថានទូតរុស្ស៊ីក្នុងទីក្រុង Damascus អាចនឹងត្រូវបានគំរាមកំហែងដោយផ្ទាល់ ហើយការផ្គត់ផ្គង់អាវុធទៅឲ្យក្រុមឧទ្ទាមនឹងអាចត្រូវធ្លាក់ក្នុងកណ្តាប់ដៃរបស់ក្រុមJihad។
រដ្ឋាភិបាលស៊ីរីរបស់លោកប្រធានាធិបតី Bashar al-Assad គឺជាសម្ព័ន្ធមិត្តយូរអង្វែងរបស់រុស្ស៊ី។ រុស្ស៊ីមានទីបញ្ជាការដ្ឋានផ្លូវអាកាសនៅក្បែរទីក្រុង Latakia ក្នុងប្រទេសស៊ីរី ហើយរុស្ស៊ីក៏បានជួយស៊ីរីដណ្តើមយកដែនដីដែលក្រុមឧទ្ទាមបានកាន់កាប់មកវិញផងដែរ។ ក្រុមឧទ្ទាមមួយចំនួនគាំទ្រសហរដ្ឋអាមេរិក៕