លោកប្រធានាធិបតីរុស្សី Vladimir Putin បាននិយាយថាប្រទេសលោកប្រព្រឹត្តតាមការប្តេជ្ញារបស់ខ្លួនដល់កិច្ចព្រមព្រៀងបទឈប់បាញ់គ្នាក្នុងប្រទេសស៊ីរី ក៏ប៉ុន្តែលោកបានសម្តែងការសង្ស័យអំពីការប្តេជ្ញារបស់ស.រ.អា.ដល់កិច្ចព្រមព្រៀងនេះ ដោយលោកបាននិយាយថារដ្ឋាភិបាលរដ្ឋធានីវ៉ាស៊ីនតោន បានងាកចេញពីការអំពាវនាវរបស់ខ្លួនផ្ទាល់ដែលសុំឲ្យមានការបើកចំហ។
លោក Putin បាននិយាយនៅក្នុងការបង្ហាញខ្លួនមួយតាមទូរទស្សន៍ក្នុងពេលធ្វើដំណើរទៅកាន់ប្រទេស Kyrgystan ថា «ខ្ញុំមិនយល់ថាហេតុដូចម្តេចបានជាយើងត្រូវតែរក្សាកិច្ចព្រមព្រៀងមួយបែបនេះជាការសម្ងាត់»ដោយលោកបានថ្លែងបន្ថែមថារដ្ឋាភិបាលក្រុងម៉ូស្គូនឹងមិនផ្សព្វផ្សាយលក្ខខណ្ឌនៃកិច្ចព្រមព្រៀងនេះជាឯកតោភាគីឡើយ។
លោក Putinបាននិយាយថារដ្ឋាភិបាលរដ្ឋធានីវ៉ាស៊ីនតោនប្រហែលជាខិតខំព្យាយាមរក្សាសក្តានុពលប្រយុទ្ធរបស់ពួកឧទ្ទាមដែលប្រយុទ្ធប្រឆាំងនឹងរដ្ឋាភិបាលស៊ីរី ដោយលោកបានថ្លែងបន្ថែមថារដ្ឋាភិបាលស.រ.អា.មិនអាចបែងចែកអ្វីដែលហៅថាចំនុចល្អនៃក្រុមប្រឆាំងពីអ្វីដែលលោកហៅថា «ជាឧក្រិដ្ឋជនពាក់កណ្តាលនិងពួកភេរវជន»។ លោកបានពោលថា «នេះជាផ្លូវមានគ្រោះថ្នាក់ណាស់»។
តាមរយៈកិច្ចព្រមព្រៀងបទឈប់បាញ់គ្នាមួយដែលបានត្រូវប្រកាសដោយលោករដ្ឋមន្ត្រីការបរទេសស.រ.អា. John Kerry និងសមភាគីរុស្សីរបស់លោកគឺលោក Sergei Lavrov នៅក្នុងក្រុងហ្សឺណែវ កាលពីមួយសប្តាហ៍មុននេះ អរិភាពគួរត្រូវផ្អាកកាលពីថ្ងៃចន្ទដែលជាការចាប់ផ្តើមបុណ្យ Eid al-Adha នៃសាសនា ឥស្លាមដើម្បីបើកផ្លូវឲ្យមានការបញ្ជូនជំនួយមនុស្សធម៌ដោយគ្មានការបង្អាក់ចូលទៅក្នុងប្រទេសស៊ីរី។
ចាប់ផ្តើមពីថ្ងៃចន្ទក្រោយទៅប្រសិនបើស្ថានភាពល្អប្រសើរតាមលក្ខខណ្ឌទាំងនេះការសម្របសម្រួលរួមគ្នារវាងស.រ.អា.និងប្រទេសរុស្សីអំពីការវាយប្រហារតាមអាកាសនឹងចាប់ផ្តើមធ្វើប្រឆាំងនឹងពួករដ្ឋឥស្លាម និងពួក Jabhat Fateh al-Sham ដែលពីមុនមានឈ្មោះថា al-Nusra ដែលមិនមែនជាភាគីនៃកិច្ចព្រមព្រៀងបទឈប់បាញ់គ្នានេះទេ៕