រដ្ឋបាលលោក អូបាម៉ា កំពុងព្រមានប្រទេសរុស្ស៊ីថា កិច្ចសហប្រតិបត្តិការរវាងប្រទេសទាំងពីរក្នុងប្រទេសស៊ីរី នឹងមិនបោះជំហានទៅមុខទេ បើសិនជាជំនួយមនុស្សធម៌ មិនចាប់ផ្តើមទៅដល់ទីក្រុង Aleppo និងតំបន់រងគ្រោះឯទៀតនោះ។
ក្នុងសេចក្តីថ្លែងការមួយចេញផ្សាយដោយក្រសួងការបរទេសស.រ.អា. លោករដ្ឋមន្ត្រីការបរទេស John Kerry បានប្រាប់លោករដ្ឋមន្ត្រីការបរទេសរុស្ស៊ី Sergei Lavrov ថាស.រ.អា. មានការព្រួយបារម្ភអំពីការពន្យារម្តងហើយម្តងទៀតដែលជាការមិនអាចទទួលយកបាន នូវការផ្តល់ជំនួយមនុស្សធម៌ ហើយថាស.រ.អា.រំពឹងថារុស្ស៊ីនឹងប្រើប្រាស់ឥទ្ធិពលរបស់ខ្លួន លើរបបលោក Assad ដើម្បីអនុញ្ញាតឲ្យមានការផ្តល់ជំនួយ។
អ្នកនាំពាក្យម្នាក់នៃការិយាល័យជំនួយមនុស្សធម៌របស់អង្គការសហប្រជាជាតិបានថ្លែងថា រថយន្តដឹកទំនិញចំនួន៤០គ្រឿង កំពុងតែរង់ចាំនៅតាមបណ្តោយទល់ដែនរវាងប្រទេសតួកគី និង ស៊ីរី ដើម្បីទទួលការធានាថារថយន្តទាំងនោះមានសុវត្តិភាពក្នុងការធ្វើដំណើរចូលទៅក្នុងប្រទេសស៊ីរី។
នៅស្របពេលជាមួយគ្នានេះដែរ ក្រុមមន្ត្រីអាមេរិកាំងបានបញ្ជាក់ថា កងកម្លាំងស.រ.អា. បានចាប់ផ្តើមធ្វើការជាមួយកងកម្លាំងតួកគី នៅភាគខាងជើងនៃប្រទេសស៊ីរី ដើម្បីតតាំងជាមួយពួករដ្ឋឥស្លាម៕
