លោក Rupert Murdochអាយុ៩២ឆ្នាំ ជាប្រធានបណ្តាញព័ត៌មានដែលបានបង្កើតបណ្តាញទូរទស្សន៍ Fox News នឹងចុះចេញពីតំណែងជាមេដឹកនាំទាំងក្រុមហ៊ុនមេនិងការកាន់កាប់បណ្តាញព័ត៌មានNews Corp.របស់លោក។
បណ្តាញទូរទស្សន៍ Foxបានប្រាប់ឱ្យដឹងកាលពីថ្ងៃព្រហស្បតិ៍ថា លោក Murdoch នឹងក្លាយជាប្រធានកិត្តិយស (chairman emeritus) ក្រុមហ៊ុនទាំង២របស់លោក។ លោក Lachlanដែលជាកូនប្រុសរបស់លោកនឹងក្លាយជាប្រធានក្រុមហ៊ុន News Corpហើយនឹងបន្តជាប្រធានការិយាល័យប្រតិបត្តិរបស់ក្រុមហ៊ុន Fox Corp។
លោកLachlan Murdochបាននិយាយថា៖ «យើងដឹងគុណដែលលោកនឹងធ្វើជាប្រធានកិត្តិយសហើយដឹងថា លោកនឹងបន្តផ្តល់ការប្រឹក្សាដ៏មានតម្លៃដល់ក្រុមហ៊ុនទាំង២នេះ»។
ក្រៅពីបណ្តាញទូរទស្សន៍ Fox News លោក Murdochបានចាប់ផ្តើមបណ្តាញផ្សព្វផ្សាយ Fox ដែលបានប្រកួតប្រជែងប្រកបដោយជោគជ័យលើកដំបូងតទល់នឹងបណ្តាញទូរទស្សន៍ធំៗ៣គឺ ABC, CBS និង NBC។ លោកក៏ជាម្ចាស់កាសែត Wall Street JournalនិងNew York Postដែរ។
លោកMurdoch មានឥទ្ធិពលយ៉ាងខ្លាំងនៅក្នុងពិភពអភិរក្សនិយម ជាទីកន្លែងដែលបណ្តាញទូរទស្សន៍ Fox News Channelក្លាយជាទូរទស្សន៍ដ៏មានឥទ្ធិពលនិងនយោបាយរបស់ជាតិចាប់តាំងពីការចាប់ផ្តើមរបស់ខ្លួននៅឆ្នាំ១៩៩៦មក។
លោកMurdochបានសន្យានៅក្នុងលិខិតមួយច្បាប់ផ្ញើទៅកាន់ពួកបុគ្គលិកថា លោកនឹងនៅបន្តទាក់ទិននឹងFox។
លោកMurdochបានសរសេរថា៖ «ក្នុងតួនាទីថ្មីរបស់ខ្ញុំ ខ្ញុំអាចធានាអស់លោក អ្នកថាខ្ញុំនឹងទាក់ទិនជារៀងរាល់ថ្ងៃនៅក្នុងការប្រកួតប្រជែងខាងគំនិត។ ក្រុមហ៊ុនរបស់យើងជាសហគមន៍ ហើយខ្ញុំនឹងក្លាយជាសមាជិកសកម្មម្នាក់របស់សហគមន៍យើង។ ខ្ញុំនឹងមើលការផ្សាយរបស់យើងដោយដោយល្អិតល្អន់ អានកាសែតនិងគេហទំព័រ និងសៀវភៅរបស់យើងដោយការយកចិត្តទុកដាក់បំផុត»។
មិនមានការអត្ថាធិប្បាយភ្លាមៗថា តើហេតុអ្វីបានជាលោក Murdochប្រកាសចុះចេញនៅពេលនេះទេ។ ហើយចៃដន្យ វាជាសប្តាហ៍ដែលលោក Michael Wolffអ្នកនិពន្ធនិងអ្នកសរសេរប្រវត្តិលោក Murdochនឹងបោះពុម្ពសៀវភៅដែលមានចំណងជើងថា «ទីបញ្ចប់នៃបណ្ដាញទូរទស្សន៍ Fox News» ដែលនិយាយពីការសង្ស័យនានាអំពីអ្វីដែលនឹងកើតមានឡើងដល់បណ្តាញទូរទស្សន៍នេះនៅពេលដែលប្រធានក្រុមហ៊ុននេះចាកចេញពីក្រុមហ៊ុននោះ៕
ប្រែសម្រួលដោយលោក ជឹង ប៉ូជីន