គណបក្សប្រជាជនកម្ពុជា ដែលធ្លាក់ប្រជាប្រិយភាព បានបើកមហាសន្និបាតវិសាមញ្ញរយៈពេលបីថ្ងៃរបស់ខ្លួននៅថ្ងៃសុក្រនេះ ដោយប្រកាសធ្វើការកែទម្រង់នយោបាយជាដាច់ខាតសម្រាប់ធានាដល់ជ័យជំនះក្នុងការបោះឆ្នោតលើកក្រោយ។
ស្របពេលជាមួយគ្នានេះ លោកនាយករដ្ឋមន្ត្រី ហ៊ុន សែន អនុប្រធានគណបក្សប្រជាជនកម្ពុជា បានប្រកាសភ្លាមៗថា នឹងមិនមានការផ្លាស់ប្តូរប្រធានគណបក្សទេ បើទោះជាលោក ជា ស៊ីម ដែលកាន់តំណែងនេះ កំពុងមានជំងឺធ្ងន់ ហើយស្ថិតក្រោមការព្យាបាលនៅប្រទេសវៀតណាមជាច្រើនថ្ងៃមកហើយក្តី។
លោក ហេង សំរិន ប្រធានកិត្តិយសគណបក្សនេះ បានប្រកាសក្នុងសេចក្តីថ្លែងបើកមហាសន្និបាតវិសាមញ្ញនៅរសៀលថ្ងៃនេះថា កំណែទម្រង់គណបក្សគឺជាបញ្ហាអាយុជីវិត។
«អង្គមហាសន្និបាតរបស់យើងលើកនេះមានប្រធានបទសំខាន់គឺការកែទម្រង់គឺជាអាយុជីវិតរបស់ជាតិ និងរបស់គណបក្សប្រជាជនកម្ពុជា»។
គណបក្សប្រជាជនកម្ពុជា ដែលកាន់អំណាចអស់រយៈពេលជាងបីទសវត្សមកហើយនោះ បានសម្តែងឲ្យឃើញពីការធ្លាក់ចុះប្រជាប្រិយភាព ក្រោយពីការបោះឆ្នោតខែកក្កដាឆ្នាំ២០១៣កន្លងទៅ។ គណបក្សនេះបានបាត់បង់២២អាសនៈនៅក្នុងរដ្ឋសភាពោលគឺបានធ្លាក់ចុះពី៩០អាសនៈមកត្រឹម៦៨អាសនៈវិញ បន្ទាប់ពីទទួលរងការរិះគន់ពីផលអវិជ្ជមានជាច្រើនក្នុងសង្គម។ តួលេខនេះបង្ហាញថា គណបក្សកាន់អំណាចបាត់បង់សំឡេងគាំទ្រជាង២,៥៦លាននាក់ក្នុងការបោះឆ្នោតចុងក្រោយ បើធៀបនឹងការបោះឆ្នោតកាលពីឆ្នាំ២០០៨។
លោកហេង សំរិន បច្ចុប្បន្នជាប្រធានរដ្ឋសភាដែរនោះ បានទទូចឲ្យមានការវាយតម្លៃឲ្យប្រាកដប្រជាលើនិន្នាការស្រុតចុះនេះ។
«ថ្វីបើគណបក្សយើងនៅទទួលបានការគាំទ្រពីប្រជាជនដោយសំឡេងភាគច្រើនដាច់ខាតនៅទូទាំងប្រទេសក៏ដោយ ក៏យើងទទួលស្គាល់ថា គណបក្សយើងបានថយអាសនៈមួយចំនួននៅក្នុងរដ្ឋសភា ទន្ទឹមនឹងអាសនៈគណបក្សប្រឆាំងមានការកើនឡើង។ ប្រការនេះតម្រូវឲ្យយើងត្រូវសិក្សាឲ្យបានគ្រប់ជ្រុងជ្រោយអំពីមូលហេតុ ដែលនាំឲ្យកើតមានស្ថានភាពដូច្នេះ»។
យោងតាមបាយការណ៍ ដែលដាក់ជូនមហាសន្និបាតវិសាមញ្ញរបស់គណបក្សប្រជាជនកម្ពុជា ហើយដែលវីអូអេសំឡេងសហរដ្ឋអាមេរិកជាខេមរភាសាទទួលបាន បានបង្ហាញពីការទទួលស្គាល់របស់គណបក្សកាន់អំណាចនេះ ដែលថា ខ្លួនមានចំណុចខ្សោយមួយចំនួន ដែលនាំឲ្យបាត់បង់ការគាំទ្ររបស់ម្ចាស់ឆ្នោត ដូចជាការខ្វះចន្លោះក្នុងការអនុវត្តគោលនយោបាយអំពើពុករលួយ ភាពបក្ខពួកនិយម និងក្រុមគ្រួសារនិយម ការប្រើអំណាចបំពាន ការបាត់បង់ជំនឿលើប្រព័ន្ធយុត្តិធម៌ ភាពមិនស្មើគ្នានៅចំពោះមុខច្បាប់ បញ្ហាដីធ្លី ការកាប់បំផ្លាញព្រៃឈើ បញ្ហាព្រំដែន និងអន្តោប្រវេសន៍ជាដើម។
សមាជិកជាន់ខ្ពស់ និងថ្នាក់ដឹកនាំរបស់គណបក្សប្រជាជនកម្ពុជាប្រមាណ១៣០០នាក់មកពីមន្ទីរ ក្រសួង ស្ថាប័ន និងខេត្តក្រុងទូទាំងប្រទេស បានចូលរួមមហាសន្និបាតវិសាមញ្ញដែលនឹងបញ្ចប់នៅថ្ងៃអាទិត្យទី១ខែកុម្ភៈ។
នៅក្នុងកិច្ចប្រជុំរយៈពេលបីថ្ងៃនេះ គណបក្សប្រជាជនកម្ពុជានឹងត្រូវដាក់ផែនការយុទ្ធសាស្រ្តរយៈពេលប្រាំឆ្នាំរបស់ខ្លួនសម្រាប់ការបោះឆ្នោតទៅមុខ និងបោះឆ្នោតបញ្ចូលក្រុមយុវជនក្នុងគណៈកម្មាធិការកណ្តាលដែលជាក្បាលម៉ាស៊ីនដឹកនាំសំខាន់មួយរបស់គណបក្សកាន់អំណាច។ ក្រុមយុវជនគឺជាក្រុមបោះឆ្នោតបានធ្វើឲ្យមានការផ្លាស់ប្តូរលទ្ធផលបោះឆ្នោតយ៉ាងភ្ញាក់ផ្អើលរយៈពេលចុងក្រោយនេះ៕