នៅពេលដែលសាកលលោកប្រារព្ធទិវាសិទ្ធិមនុស្សអន្តរជាតិនៅថ្ងៃអាទិត្យស្អែកនេះ ក្រុមគាំទ្រសិទ្ធិមនុស្សចិន នឹងតាមមើលដោយក្តីសង្ឃឹមថា ប្រធានាធិបតីសហរដ្ឋអាមេរិក ដូណាល់ ត្រាំ ធ្វើទៅតាមការសន្យានៅដើមឆ្នាំនេះដើម្បីប្រើច្បាប់ Magnitsky Act ដាក់ទណ្ឌកម្មលើបុគ្គលដែលរងការចោទប្រកាន់ពីការរំលោភសិទ្ធិមនុស្ស។
កាលពីខែកញ្ញា ក្រុមអង្គការសិទ្ធិមនុស្សចម្រុះដែលមានអង្គការចំនួន២៣ បានបញ្ជូនបញ្ជីឈ្មោះរបស់ប្រធានប៉ូលិស រដ្ឋអាជ្ញាសាធារណៈ និងប្រធានសន្តិសុខ ចំនួន១៧នាក់ទៅឲ្យក្រសួងការបរទេសសហរដ្ឋអាមេរិកដើម្បីសើរើពិនិត្យមើលឡើងវិញ។ បុគ្គលនានាដែលក្រុមអង្គការសិទ្ធិមនុស្សបានពណ៌នាថា បានរំលោភសិទ្ធិមនុស្សមកពីប្រទេសចំនួន១៥ទូទាំងសាកលលោក រួមមានប្រទេសចិននិងប្រទេសមួយចំនួនទៀតនៅតំបន់អាស៊ីកណ្តាល ហើយត្រូវបានរងការចោទប្រកាន់ពីការពាក់ព័ន្ធក្នុងករណីធ្វើទារុណកម្ម សម្លាប់ឬធ្វើឲ្យពួកអ្នកទោសស្លាប់នៅក្នុងការឃុំឃាំង។
ប្រសិនបើបានទទួលការយល់ព្រម រដ្ឋាភិបាលសហរដ្ឋអាមេរិកនឹងអនុញ្ញាតឲ្យដាក់ទណ្ឌកម្ម រួមមានការហាមឃាត់ទិដ្ឋាការ ហើយនិងរឹបអូសទ្រព្យសម្បត្តិលើបុគ្គលដែលក្រុមអង្គការសិទ្ធិមនុស្សពណ៌នាថា«ជាអ្នករំលោភសិទ្ធិមនុស្ស»។
ច្បាប់ Global Magnitsky Act ដែលអតីតប្រធានាធិបតីសហរដ្ឋអាមេរិកបារ៉ាក់ អូបាម៉ាបានចុះហត្ថលេខាកាលពីខែធ្នូ ឆ្នាំ២០១៦ បានពង្រីកវិសាលភាពច្បាប់ឆ្នាំ២០១២ ដែលបង្កកទ្រព្យសម្បត្តិរបស់ពួកមន្រ្តីរុស្ស៊ី ហើយបានហាមឃាត់ពួកគេមិនឲ្យធ្វើដំណើរទៅកាន់សហរដ្ឋអាមេរិក ពីព្រោះតែការជាប់ទាក់ទងរបស់ពួកគេទៅនឹងការស្លាប់លោក Sergey Magnitsky អ្នកទម្លាយការណ៍សម្ងាត់នៅក្នុងគុកកាលពីឆ្នាំ២០០៩៕