បេក្ខជនប្រធានាធិបតីសហរដ្ឋអាមេរិកខាងគណបក្សសាធារណរដ្ឋចំនួន ៧ នាក់ បានជជែកដេញដោលគ្នាខ្លាំងក្លាកាលពីយប់ថ្ងៃពុធ ដោយម្នាក់ៗប្រឹងប្រែងឱ្យក្លាយជាអ្នកប្រជែងនឹងអតីតប្រធានាធិបតីលោក Donald Trump ដែលមានការគាំទ្រច្រើនដើម្បីទទួលការតែងតាំងជាបេក្ខជនប្រធានាធិបតីខាងគណបក្សសាធារណរដ្ឋ ទោះជាលោកប្រឈមនឹងការចោទប្រកាន់បួនករណីពីបទព្រហ្មទណ្ឌក៏ដោយ។
ដូចដែលលោកបានធ្វើកាលពីខែមុនដែរ លោក Trump បានធ្វើព្រងើយកន្តើយដោយមើលងាយការជជែកដេញគ្នានេះដែលឧបត្ថម្ភដោយគណបក្សសាធារណរដ្ឋ ដែលនាំឱ្យមានការរិះគន់បកមកវិញពីគូប្រជែងពីរនាក់របស់លោក។
អភិបាលរដ្ឋ Florida លោក Ron DeSantis ដែលជាអ្នកប្រជែងកៀកបំផុតរបស់លោក Trump តែជាអ្នកមានការគាំទ្រច្រើនទី ២ ក្នុងការស្ទង់មតិជាតិ បាននិយាយថា«លោក Donald Trump បាត់ខ្លួនពេលបំពេញបេសកកម្ម។ លោកគួរស្ថិតលើវេទិកានេះដើម្បីឆ្លើយថាហេតុដូចម្តេចបានជាលោកបន្ថែមបំណុលជាតិចំនួន ៧,៨ លានលានដុល្លារទៀត»។
អតីតអភិបាលរដ្ឋ New Jersey លោក Chris Christi បាននិយាយរិះគន់ថា ប្រសិនបើអតីតប្រធានាធិបតីរូបនេះបន្តចៀសវាងមិនចូលរួមក្នុងការជជែកដេញដោលគ្នារវាងពួកបេក្ខជនប្រធានាធិបតីខាងគណបក្សសាធារណរដ្ឋ «យើងមិនហៅលោកថា Donald Trump ទេ យើងហៅលោកថា Donald Duck វិញ»។
នៅពេលគូបដិបក្ខរបស់លោកចេញបង្ហាញខ្លួននៅឯបណ្ណាល័យប្រធានាធិបតី Ronald Reagan ក្នុងរដ្ឋ California លោក Trump បានជួបប្រជុំឃោសនាក្នុងរដ្ឋ Michigan ដែលជារដ្ឋមានការប្រយុទ្ធខាងនយោបាយនៅផ្នែកកណ្តាលខាងលិចអាមេរិកដែលនៅទីនោះក្រុមកម្មកររថយន្តកំពុងធ្វើកូដកម្មប្រឆាំងនឹងក្រុមហ៊ុនផលិតរថយន្តធំៗទាំងបីរបស់សហរដ្ឋអាមេរិក។
ដោយតបនឹងការអបអរសាទរទទួលលោកពីក្រុមអ្នកគាំទ្រលោក លោក Trump បានធ្វើការវាយប្រហារភាគច្រើនប្រឆាំងនឹងលោកប្រធានាធិបតី Joe Biden ហើយលោកមិនបានអើពើនឹងការជជែកដេញដោលគ្នារបស់បេក្ខជនប្រធានាធិបតីសាធារណរដ្ឋឯទៀតទេ៕