លោកនាយករដ្ឋមន្រ្តី ហ៊ុន សែន នៅថ្ងៃអង្គារនេះ បានប្រកាសថា កម្ពុជាទទួលបានតំណក់ប្រេងដំបូងនៅថ្ងៃនេះ បន្ទាប់ពីការទន្ទឹងរង់ចាំ និងការពន្យារពេលជាច្រើនឆ្នាំមកហើយ។
លោក ហ៊ុន សែន បានប្រកាសបែបនេះនៅក្នុងសន្និសីទសារព័ត៌មានមួយ ដែលធ្វើនៅផ្ទះរបស់លោកនៅក្រុងតាខ្មៅ ហើយត្រូវបានផ្សព្វផ្សាយតាមប្រព័ន្ធសង្គមហ្វេសប៊ុក និងសារព័ត៌មានក្នុងស្រុក។
ជាមួយការប្រកាសថាតំណក់ប្រេងជា«ពរជ័យ»មួយសម្រាប់បង្កើនចំណូលជាតិ និងកើតចេញពីនយោបាយឈ្នះ-ឈ្នះ លោក ហ៊ុន សែន បានថ្លែងថា លោកនឹងយកថវិកាដែលបានពីប្រេងនេះ ទៅជួយផ្នែកអប់រំ និងសុខាភិបាលក្នុងប្រទេសកម្ពុជា។ លោកមានប្រសាសន៍បែបនេះ ជាការឆ្លើយតបទៅនឹងការបារម្ភអំពីអំពើពុករលួយក្នុងការចាត់ចែងថវិកាបានមកពីប្រេងនេះ។
លោក ហ៊ុន សែន ថ្លែងថា៖ «អត់ទាន់មានប្រេងផង មកព្រួយបារម្ភចាយលុយប្រេង ដោយគេយកពិសោធន៍នៅប្រទេសនីហ្សេរីយ៉ា [Nigeria]។ ប្រទេសមានប្រេង បែរជាក្រីក្រ ដោយសារតែអំពើពុករលួយក្នុងការចាយលុយ»។
តំណក់ប្រេងក្នុងប្លុកA ដែលមានចម្ងាយប្រមាណ១៦០គីឡូម៉ែត្រពីទីរួមខេត្តព្រះសីហនុ ជាការរុករករបស់ក្រុមហ៊ុនចុះបញ្ជីនៅសិង្ហបុរីឈ្មោះ KrisEnergy ដែលបានចុះកិច្ចព្រមព្រៀងជាមួយរដ្ឋាភិបាលកម្ពុជា កាលពីឆ្នាំ២០១៧ ក្នុងការអភិវឌ្ឍអណ្តូងប្រេងកាតនៅក្នុងប្លុកAនៃដែនសមុទ្រកម្ពុជា ដែលមានផ្ទៃក្រឡាប្រមាណ៣ពាន់គីឡូម៉ែត្រការ៉េ។
បើតាមលោក ហ៊ុន សែន តំណក់ប្រេងដំបូងនេះ នឹងត្រូវយកទៅដាក់នៅវិមានឈ្នះ-ឈ្នះ នៅរាជធានីភ្នំពេញ។ នៅក្នុងដែនសមុទ្រ កម្ពុជាមាន៦ប្លុកដែលអាចរុករកប្រេងបាននៅពេលខាងមុខ បន្ថែមពីតំបន់ត្រួតស៊ីគ្នាជាមួយនឹងប្រទេសថៃ ដែលប្រទេសទាំងពីរនឹងខិតខំបន្តការចរចាជាមួយគ្នា។
កាលពីខែមេសា ឆ្នាំ២០២០ លោក ជៀប សួរ អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពល មានប្រសាសន៍ថា រដ្ឋាភិបាលកម្ពុជាកំពុងរង់ចាំអ្នកវិនិយោគផ្សេងទៀតមកវិនិយោគលើប្លុក៤ទៀត គឺប្លុកB ប្លុកC ប្លុកEនិងប្លុកF៕