តុលាការក្រុងភ្នំពេញបានកោះហៅសមាជិកនៃគណបក្សសង្គ្រោះជាតិឱ្យចូលទៅបំភ្លឺបន្ថែមទៀតទាក់ទងនឹងសំណុំរឿងអំពើហិង្សានៅសួនប្រជាធិបតេយ្យដែលបានកើតមានឡើងតាំងពីខែកក្កដាឆ្នាំមុន។
លោកស្រី មូរ សុខហួរ អ្នកតំណាងរាស្រ្តនៃគណបក្សសង្គ្រោះជាតិត្រូវបានតុលាការក្រុងភ្នំពេញកោះហៅឱ្យទៅបំភ្លឺនៅព្រឹកថ្ងៃច័ន្ទសប្តាហ៍ក្រោយ។
លោកស្រីបានប្រាប់VOA នៅថ្ងៃពុធនេះថា លោកស្រីនឹងទៅបំភ្លឺតាមការកោះហៅ។
រីឯលោកមាជ សុវណ្ណារ៉ា មន្ត្រីព័ត៌មានរបស់គណបក្សត្រូវបានកោះហៅឱ្យទៅបំភ្លឺនៅ ថ្ងៃទី១៩ ខែឧសភាខាងមុខនេះដែរ។
អំពើហិង្សានៅសួនប្រជាធិបតេយ្យកាលពីថ្ងៃទី១៥ខែកក្កដាឆ្នាំ២០១៤បានកើតមានឡើងក្នុងខណៈពេលដែលមានបាតុកម្មទាមទារឱ្យបើកសួននោះឡើងវិញហើយបានឈានទៅមានការប៉ះពាល់ទង្គិចគ្នារវាងក្រុមបាតុករនៃគណបក្សប្រឆាំងដែលពុំព្រមទទួលស្គាល់លទ្ធផលឆ្នោតនិងក្រុមសន្តិសុខដែលជួលដោយសាលាខណ្ឌដូនពេញ។
មានមនុស្សជាង៤០នាក់បានរងរបួសក្នុងហេតុការណ៍ហិង្សានោះ។ ភាគច្រើននៃអ្នកទាំងនោះគឺជាកងសន្តិសុខ។ លោកស្រីមូរ សុខហួរស្ថិតក្នុងចំណោមមន្ត្រីជាន់ខ្ពស់គណបក្សពីរនាក់ផ្សេងទៀតដែលត្រូវបានចាប់ឃាត់ខ្លួនភ្លាមៗនៅក្បែរកន្លែងកើតហេតុ៕