មេធាវីការពារមន្ត្រីនិងសកម្មជនគណបក្សប្រឆាំងបានសុំទោសតុលាការក្រុងភ្នំពេញចំពោះការអះអាងថាការសម្រេចនយោបាយនឹងនាំឱ្យកូនក្តីរបស់លោកត្រូវដោះលែងឱ្យនៅក្រៅឃុំនៅថ្ងៃច័ន្ទខាងមុខនេះ។
លោកមេធាវី ជូង ជូងីបានសរសេរលិខិតមួយទៅកាន់ប្រធានតុលាការក្រុងភ្នំពេញដោយបញ្ជាក់ថាលោកមានការសោកស្តាយយ៉ាងខ្លាំងចំពោះការផ្តល់បទសម្ភាសរបស់លោកដល់ក្រុមអ្នកសារព័ត៌មានពាក់ព័ន្ធនឹងការសុំដោះលែងលោកមាជ សុវណ្ណារ៉ា ប្រធាននាយកដ្ឋានព័ត៌មានរបស់គណបក្សសង្គ្រោះជាតិ និងកូនក្តី ពីរនាក់ទៀត។ នេះបើតាមលិខិតដែលចុះ ហត្ថលេខាដោយជូង ជូងីដែលផ្សាយតាមបណ្តាញសង្គមរបស់លោកផៃ ស៊ីផានរដ្ឋលេខាធិការនៃទីស្តីការគណរដ្ឋមន្ត្រីនៅយប់ថ្ងៃសុក្រ។
លោកជូង ជូងីបន្ថែមថា៖
«ខ្ញុំបាទជាមេធាវីមានតួនាទីត្រឹមតែជាអ្នករៀបចំពាក្យសុំឱ្យមានការដោះលែងនិងការពារកូនក្តីតាមច្បាប់តែប៉ុណ្ណោះចំពោះការដោះលែងកូនក្តីឱ្យនៅក្រៅឃុំយ៉ាងណានោះគឺជាសមត្ថកិច្ចនិងជាឆន្ទានុសិទ្ធិរបស់តុលាការ»។
លោក ជូង ជូងី មេធាវីការពារក្តីឲ្យក្រុមសកម្មជនគណបក្សសង្គ្រោះជាតិបានប្រាប់អ្នកសារព័ត៌មានកាលពីព្រឹកថ្ងៃសុក្រនៅវិមានរដ្ឋសភាថាក្រុមមេធាវីគណបក្សសង្គ្រោះជាតិកំពុងតែធ្វើការលើសំណុំឯកសារដើម្បីឲ្យមានការដោះលែងសកម្មជនគណបក្សសង្គ្រោះជាតិដែលស្ថិតនៅក្នុង ពន្ធនាគាព្រៃសឲ្យនៅក្រៅឃុំ និងស្នើឲ្យមានការលើកលែងទោសដល់ក្រុមសកម្មជនតវ៉ាដីធ្លីបឹងកក់រួមទាំងអតីតព្រះសង្ឃចំនួនបីនាក់ទៀតផង។
លោកបានបន្ថែមថា ក្រុមស្ត្រីបឹងកក់ទាំង១១រូបរួមទាំងអតីតព្រះសង្ឃបីរូបនឹងត្រូវបាន ព្រះករុណាព្រះមហាក្សត្រ នរោត្តម សីហមុនីព្រះរាជទានទោសនិងដោះលែងស្របពេលដែលតុលាការក្រុងភ្នំពេញគ្រោងនឹងបើកសវនាការដើម្បីសម្រេចឲ្យសកម្មជនគណបក្សសង្គ្រោះជាតិនៅក្រៅឃុំនាថ្ងៃច័ន្ទនោះផងដែរ។
លោកមេធាវីអះអាងថាទាំងនេះជាផ្នែកមួយនៃការសម្របសម្រួលផ្នែកនយោបាយដែលកើតឡើងក្រោយពីមានការបង្កើតគណៈកម្មាធិការជាតិរៀបចំការបោះឆ្នោតនិងអនុម័តច្បាប់បោះឆ្នោតដ៏ចម្រូងចម្រាស៕
