អ្នកទោសឈ្មោះ Mario Dimaculangan ប្រើបន្ទប់ទឹកមួយរួមគ្នាជាមួយអ្នកទោស ១៣០ នាក់ផ្សេងទៀត នៅក្នុងពន្ធនាគារដ៏ណែនណាន់តាន់តាប់មួយនៅក្នុងប្រទេសហ្វីលីពីន។ ស្ថានការណ៍នេះនឹងកាន់តែលំបាកខ្លាំងថែមទៀត ដោយហេតុថាប៉ូលិសបើកយុទ្ធនាការបង្ក្រាបឧក្រិដ្ឋកម្មផ្សេងៗដែលមិនធ្លាប់មានពីមុនមក។ នេះបើតាមការរាយការណ៍របស់ទីភ្នាក់ងារព័ត៌មាន AFP។
កងកម្លាំងសន្តិសុខបានសម្លាប់ឧក្រិដ្ឋជនជាច្រើនរយនាក់ និងបានឃុំខ្លួនឧក្រិដ្ឋជនរាប់ពាន់នាក់ផ្សេងទៀត នៅក្នុងអំឡុងពេលតែមួយខែប៉ុណ្ណោះ បន្ទាប់ពីពួកគេបានធ្វើតាមបញ្ជារបស់លោកប្រធានាធិបតី Rodrigo Duterte ដែលបាននិយាយថា ភារកិច្ចជាអាទិភាពចម្បងបំផុតរបស់លោកនៅក្នុងការចាប់ផ្តើមអាណត្តិរយៈពេល ៦ ឆ្នាំ របស់លោក គឺការលុបបំបាត់ចោលគ្រឿងញៀននៅក្នុងសង្គម។
អ្នកទោសទាំងអស់ទំនងជាមានវាសនាមិនល្អក្នុងការជាប់ឃុំដ៏យូរនៅក្នុងប្រព័ន្ធព្រហ្មទណ្ឌដែលគ្មានការឧបត្ថម្ភមួយ។ ឧទាហរណ៍ដូចជានៅក្នុងពន្ធនាគារក្នុងទីក្រុង Quezon ជាដើម អ្នកទោស Mario Dimaculangan ត្រូវបានជាប់ឃុំត្រាំត្រែងអស់រយៈពេល ១៤ ឆ្នាំមកហើយ ដោយសារតែសាវនាការកាត់ទោសអ្នកទោសរូបនេះពាក់ព័ន្ធនឹងបទឧក្រិដ្ឋមនុស្សឃាត និងបទឧក្រិដ្ឋចោរកម្មត្រូវបានពន្យាពេលអូសបន្លាយយ៉ាងយូរ។
អ្នកទោសរូបនេះបានប្រាប់ទីភ្នាក់ងារព័ត៌មាន AFP នៅឯផ្លូវដើរក្នុងពន្ធនាគារមួយដែលមានភាពណែនណាន់តាន់តាប់និងធុំក្លិនញើសយ៉ាងដូច្នេះថា៖ «អ្នកទោសភាគច្រើនចង់ឆ្កួតអស់ហើយ។ ពួកគេមិនអាចគិតអ្វីចេញភ្លាមៗឲ្យបានច្បាស់នោះទេ។ គុកនេះចង្អៀតខ្លាំងណាស់។ គ្រាន់តែងាកខ្លួនបន្តិច យើងប៉ះគ្នាទៅហើយ»។
នៅក្នុងពន្ធនាគារនេះ មានអ្នកទោសចំនួន ៣ ពាន់ ៨ រយនាក់ ដែលធ្វើឲ្យអ្នកទោសម្នាក់ៗគ្មានកន្លែងទូលាយសម្រាប់ខ្លួនឯងនោះទេ គឺប្រជ្រៀតគ្នាសឹងតែរកកន្លែងដើរគ្មាន។ កាលពីពន្ធនាគារនេះត្រូវបានគេកសាងដំបូងកាលពី៦ទសវត្សរ៍មុន គេមានគោលបំណងដាក់អ្នកទោសចំនួនតែ ៨ រយនាក់ប៉ុណ្ណោះ៕