ភ្ជាប់​ទៅ​គេហទំព័រ​ទាក់ទង

អភិបាល​ក្រុង​​ដែលចម្រូង​ចម្រាស​នាំមុខ​ក្នុង​ការបោះឆ្នោត​ប្រធានាធិបតី​ហ្វីលីពីន


បេក្ខជន​នាំ​មុខ​នៃ​ការ​បោះ​ឆ្នោត​ជាតិ​ហ្វីលីពីន​ Rodrigo Duterte ថ្លែង​ក្នុង​សន្និសីទ​កាសែត​មួយ​នៅ​​ក្រោយ​​​ការបោះឆ្នោត​ នៅ​​ក្នុង​ទីក្រុង​ Davao ដែល​ជា​ក្រុង​កំណើត​របស់​លោក កាល​ពី​ថ្ងៃទី៩ ខែឧសភា ឆ្នាំ២០១៦។

បើ​តាម​លទ្ធផល​ក្រៅ​ផ្លូវការ​នៃ​ការ​បោះឆ្នោត​ជាតិ​កាល​ពី​ថ្ងៃ​ចន្ទ​នៅ​ក្នុង​ប្រទេសហ្វីលីពីន​បង្ហាញ​ថា​ អភិបាល​ក្រុង​ម្នាក់​មក​ពី​ប៉ែក​ខាង​ត្បូង​ប្រទេស​ដែល​ជា​អ្នក​និយាយ​ម៉ឺងម៉ាត់​ម្នាក់​ ​បាន​នាំ​មុខ​គេ​នៅ​ក្នុង​ការ​ប្រកួត​ប្រជែង​ដើម្បី​តំណែង​ប្រធានាធិបតី​របស់​ប្រទេស​នេះ។

ការ​រាប់​សន្លឹក​ឆ្នោត​នៅ​ពេល​ថ្មីៗ​បំផុត​បញ្ជាក់​ថា ​លោក ​Rodrigo Duterte អភិបាល​ក្រុង​ Davao ​មាន​សន្លឹក​ឆ្នោត​គាំទ្រ​ជិត​ពីរ​ដង​ច្រើន​ជាង​សន្លឹក​ឆ្នោត​ដែល​គាំទ្រ​អ្នក​ប្រកួត​ប្រជែង​ប្រកិត​បំផុត​របស់​លោក​គឺ​លោក ​Mar Roxas ​អតីត​រដ្ឋ​មន្ត្រី​ក្រសួង​មហា​ផ្ទៃ។​

លោក​ Duterte ​ដែល​មាន​អាយុ​៧១​ឆ្នាំ​បាន​ទទួល​ការ​គាំទ្រ​ដោយ​សារ​ការ​និយាយ​បែប​ប្រមាថ​មើល​ងាយ​របស់​លោក​ដោយ​លោក​បាន​សន្យា​ថា​ នឹង​ប្រយុទ្ធ​ប្រឆាំង​នឹង​ឧក្រិដ្ឋកម្ម​និង​អំពើ​ពុក​រលួយ​ ដែល​មាន​រួម​បញ្ចូល​ការ​សន្យា​ថា​នឹង​ប្រហារ​ជីវិត​ពួក​ឧក្រិដ្ឋជន។ ការ​និយាយ​ដូច្នេះ​ ធ្វើ​ឱ្យ​មាន​ការ​ប្រៀបធៀប​លោក​ទៅ​នឹង​លោក ​Donald Trump​ បេក្ខជន​ប្រធានាធិបតី​ស.រ.អា.​ខាង​គណបក្ស​សាធារណរដ្ឋ។​

លោក​ស្រី​ Grace Poe ​សមាជិកា​ព្រឹទ្ធសភា​ហ្វីលីពីន​ ដែល​បាន​ប្រជែង​ជា​ទៀង​ទាត់​សម្រាប់​តំណែង​ជាន់​ខ្ពស់​បំផុត​នេះ​ នៅ​ក្នុង​ការ​ស្ទង់​មតិ​សាធារណៈ​ពីរ​សប្តាហ៍​មុន​នេះ​ បាន​ទទួល​ស្គាល់​បរាជ័យ​របស់​លោក​ស្រី​កាល​ពី​យប់​ថ្ងៃ​ចន្ទ​ នៅ​ពេល​ដែល​លោក​ស្រី​បាន​ធ្លាក់​មក​ថ្នាក់​ទីបី​នៅ​ក្នុង​ការ​រាប់​សន្លឹក​ឆ្នោត​ក្រៅ​ផ្លូវការ​នេះ។ ​នៅ​ក្នុងសន្និសីទ​កាសែត​មួយ​ដើម្បី​ប្រកាស​អំពី​សេចក្តី​សម្រេច​ចិត្ត​របស់​លោកស្រី​ លោក​ស្រី​បាន​និយាយ​ថា​លោក​ស្រី​នឹង​គោរព​លទ្ធផល​នៃ​ការ​បោះឆ្នោត​នេះ​ហើយ​នឹង​ធ្វើការ​ជាមួយ​លោក​ Duterte។

លោកស្រី​ Poe ​បាន​មានប្រសាសន៍​ថា​ លោក​ស្រី​នឹង​បញ្ចប់​រយៈ​ពេល​បី​ឆ្នាំ​ចុង​ក្រោយ​នៃ​អាណត្តិ​ព្រឹទ្ធ​សភា​របស់​លោក​ស្រី​ ហើយ​ប្រយុទ្ធ​ដើម្បី​ឱ្យ​សំឡេង​របស់​ប្រជារាស្ត្រ​យើង​ត្រូវ​បាន​គេ​ឮ​នៅ​ទី​នោះ៕

XS
SM
MD
LG