ស្ថាប័នប្រព័ន្ធផ្សព្វផ្សាយអន្តរជាតិកំពុងតែថ្កោលទោសទៅលើសុន្ទរកថានាពេលថ្មីៗនេះ របស់ប្រធានាធិបតីហ្វីលីពីនដែលនឹងចូលកាន់តំណែង ដែលការពារការសម្លាប់ទៅលើអ្នកកាសែតនៅក្នុងប្រជុំកោះប៉ាស៊ីហ្វិក។
លោកប្រធានាធិបតីដែលទើបតែជាប់ឆ្នោតថ្មី Rodrigo Duterte បានថ្លែងប្រាប់អ្នកកាសែតនៅក្នុងសន្និសីទកាសែតមួយកាលពីថ្ងៃអង្គារថា អ្នកកាសែតជាច្រើនត្រូវបានគេសម្លាប់ដោយសារតែពួកគេទាំងនោះពុករលួយ និងបានព្រមានថា អ្នកផ្សេងទៀតនឹងត្រូវគេសម្លាប់ដូចគ្នា ប្រសិនបើពួកគេជាមនុស្សចោលម្សៀត។
ប្រទេសហ្វីលីពីនគឺជាកន្លែងដ៏គ្រោះថ្នាក់បំផុតនៅក្នុងពិភពលោកសម្រាប់អ្នកកាសែត ដោយមានអ្នកកាសែតជិត២០០នាក់ត្រូវបានគេសម្លាប់នៅក្នុងរយៈពេលពីរទសវត្សរ៍ចុងក្រោយនេះ។
គណៈកម្មាធិការការពារអ្នកកាសែតបានចេញលិខិតមួយកាលពីថ្ងៃពុធ ដោយបាននិយាយថា សម្តីរបស់លោក Duterte «ហាក់ដូចជាយកការសម្លាប់ក្រៅអំណាចតុលាការទៅគំរាមកំហែងធ្វើឲ្យប្រទេសហ្វីលីពីនក្លាយទៅជាវាលពិឃាដអ្នកកាសែត»។
លោក Duterte វ័យ៧១ឆ្នាំ ដែលបានធ្វើជាអភិបាលក្រុង Davao អស់រយៈពេលពីរទសវត្សរ៍មកហើយនោះ បានឈ្នះការបោះឆ្នោតជ្រើសរើសប្រធានាធិបតីកាលពីខែមុន ជាមួយនឹងការសន្យាបំប៉ោងនិងស្បថស្បែរថានឹងកម្ចាត់អំពើឧក្រិដ្ឋកម្មនិងអំពើពុករលួយ ដោយរួមមានទាំងការសន្យាសម្លាប់ឧក្រិដ្ឋជនផងដែរ ដែលនេះបង្ហាញយ៉ាងច្បាស់ពីការប្រៀបធៀបទៅនឹងលោកមហាសេដ្ឋីអចលនទ្រព្យ Donald Trump ដែលជាបេក្ខជនប្រធានាធិបតីដែលគេរំពឹងថា នឹងទទួលបានការតែងតាំងពីគណបក្សសាធារណរដ្ឋនោះ។
សម្តីរបស់លោក Duterte បានទទួលការគាំទ្រពីម្ចាស់ឆ្នោតហ្វីលីពីនដែលរងទុក្ខវេទនាអស់រយៈពេលយ៉ាងយូរ ដែលមិនសប្បាយចិត្តនឹងភាពក្រីក្រនិងវិសមភាព ក៏ដូចជាការចោទប្រកាន់ពីសំណាក់អង្គការសិទ្ធិមនុស្ស ដែលលោកបានបញ្ជាឲ្យសម្លាប់ក្រៅអំណាចតុលាការរាប់រយករណី កាលពីពេលដែលលោកធ្វើជាអភិបាលក្រុង Davao នោះ៕