ប្រធានគណបក្សភឿថៃអ្នកស្រី ផែតុងតាន ស៊ីណាវ៉ាត្រា (Paetongtharn Shinawatra) បានចាប់ផ្តើមទស្សនកិច្ចរយៈពេល២ថ្ងៃនៅប្រទេសកម្ពុជា ដើម្បីរឹតចំណងមិត្តភាពរវាងគណបក្សកាន់អំណាចនៃប្រទេសទាំងពីរ និងពិភាក្សាផ្លាស់ប្តូរយោបល់លើកិច្ចការប្រទេសជាតិផ្សេងៗទៀត។
អ្នកស្រី ផែតុងតាន ស៊ីណាវ៉ាត្រា អាយុ៣៧ឆ្នាំ គឺជាកូនស្រីពៅរបស់លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្រ្តីថៃដ៏ចម្រូងចម្រាស ដែលត្រូវបានទម្លាក់ពីអំណាចដោយរដ្ឋប្រហារយោធា កាលពីឆ្នាំ ២០០៦។ បច្ចុប្បន្នគណបក្សភឿថៃគឺជាគណបក្សកាន់អំណាចក្នុងប្រទេសថៃ ដែលមានលោក សេដ្ឋា ថាវីស៊ីន (Srettha Thavinsin) ជានាយករដ្ឋមន្ត្រី។
ទស្សនកិច្ចរបស់អ្នកស្រី ផែតុងតាន ប្រធានគណបក្សភឿថៃ ដែលជាគណបក្សដឹកនាំរដ្ឋាភិបាលទីក្រុងបាងកកនៅប្រទេសថៃ ធ្វើឡើងតបតាមការអញ្ជើញរបស់លោក ហ៊ុន សែន អតីតនាយករដ្ឋមន្ត្រីកម្ពុជា និងជាប្រធានគណបក្សគ្រប់គ្រងប្រទេស។ នេះបើអ្នកនាំពាក្យរបស់គណបក្សប្រជាជនកម្ពុជា។
អ្នកនាំពាក្យគណបក្សគ្រប់គ្រងប្រទេសលោក សុខ ឥសាន ប្រាប់វីអូអេនៅថ្ងៃចន្ទនេះថា ដំណើរទស្សនកិច្ចរបស់អ្នកស្រី ផែតុងតាន ស៊ីណាវ៉ាត្រា មកកម្ពុជា គឺជាទស្សនកិច្ចទៅវិញទៅមក ដើម្បីរឹតចំណងទំនាក់ទំនងរវាងប្រទេសទាំងពីរ ក៏ដូចជាមិត្តភាព សាមគ្គីភាព និងកិច្ចសហប្រតិបត្តិការរវាងបក្សកាន់អំណាចនៃប្រទេសដែលមានភូមិផងរបងជាមួយគ្នា។
លោកថ្លែងថា៖ «ហ្នឹងយើងមិនបាច់ឆ្ងល់ទេ ពីព្រោះនៅថៃក៏បក្សភឿថៃជាបក្សកាន់អំណាច ហើយនៅកម្ពុជាបក្សប្រជាជនកម្ពុជាក៏ជាបក្សកាន់អំណាចដូចគ្នា អ៊ីចឹងអ្នកឈ្នះរកអ្នកឈ្នះវាជារឿងធម្មតា ហើយពង្រឹងសាមគី្គភាព មិត្តភាព និងសហប្រតិបត្តិការជាមួយគ្នាឱ្យកាន់តែរឹងមាំបន្ថែមទៀត»។
លោក សុខ ឥសាន បន្តថា កាលណាគណបក្សកាន់អំណាចនៃប្រទេសទាំងពីរមានទំនាក់ទំនងល្អនឹងគ្នានោះ វានឹងធ្វើឱ្យរដ្ឋាភិបាលប្រទេសទាំងពីរមានទំនាក់ទំនងល្អជាមួយគ្នា ក៏ដូចជាទំនាក់ទំនងសេដ្ឋកិច្ចរវាងប្រជាជន និងប្រជាជនមានលក្ខណៈល្អប្រសើរផងដែរ។
ក្នុងថ្ងៃដំបូងនៃការចាប់ផ្តើមដំណើរទស្សនកិច្ចនៅក្នុងប្រទេសកម្ពុជា អ្នកស្រី ផែតុងតាន ស៊ីណាវ៉ាត្រា បានចូលជួបពិភាក្សាជាមួយក្រុមអ្នកតាក់តែងច្បាប់នៅសភាជាតិ។ នេះបើតាមសេចក្តីប្រកាសព័ត៌មានរបស់សភាជាតិដែលបានផ្សព្វផ្សាយលើប្រព័ន្ធទំនាក់ទំនងសង្គមហ្វេសប៊ុក។
ប្រធានរដ្ឋសភាស្តីទី និងជាសមាជិកអចិន្ត្រៃយ៍ នៃគណៈកម្មាធិការកណ្ដាលគណបក្សប្រជាជនកម្ពុជា លោក ជាម យៀប ត្រូវបានគេស្រង់សម្តីក្នុងសេចក្តីប្រកាសព័ត៌មាននោះថា ជំនួបជាមួយមេដឹកនាំគណបក្សភឿថៃ នឹងជំរុញទំនាក់ទំនងរវាងគណបក្សកាន់អំណាចទាំងពីរ គឺគណបក្សប្រជាជនកម្ពុជា និងគណបក្សភឿថៃ ឱ្យកាន់តែស៊ីជម្រៅ ស្អិតរមួត និងទូលំទូលាយបន្ថែមទៀត ក្នុងការបង្កើនកិច្ចសហប្រតិបត្តិការរវាងសមាជិកសភានៃគណបក្សទាំងពីរដើម្បីការពារ និងបង្កើនផលប្រយោជន៍សម្រាប់ប្រជាជននៃប្រទេសទាំងពីរ។
អ្នកស្រី ផែតុងតាន បានប្រាប់សមាជិកសភាកម្ពុជាឱ្យដឹងអំពីដំណើរការនៃការដឹកនាំរដ្ឋាភិបាលនៅក្នុងប្រទេសថៃនាពេលបច្ចុប្បន្ន ដែលមានគណបក្សចម្រុះកំពុងធ្វើការរួមគ្នា និងបានកសាងសុខសន្តិភាពដែលបានបាត់បង់មួយរយៈកាលមុន ឱ្យមានភាពល្អប្រសើរឡើងវិញ។ នេះបើតាមសេចក្តីប្រកាសព័ត៌មានរបស់សភាកម្ពុជា។
សេចក្តីប្រកាសព័ត៌មានដដែលឱ្យដឹងថា អ្នកស្រី ផែតុងតាន មានជំនឿថា សន្តិភាពនឹងមានបន្តសម្រាប់ប្រទេសទាំងពីរ ដែលនឹងនាំឱ្យសេដ្ឋកិច្ចនៃប្រទេសទាំងពីរក៏មានការរីកចម្រើនទៀតផង។
វីអូអេមិនអាចទាក់ទងសុំការអត្ថាធិប្បាយពីអ្នកនាំពាក្យរដ្ឋសភាលោក ឡេង ប៉េងឡុង តាមទូរសព្ទបានទេនៅថ្ងៃចន្ទនេះ។
អតីតនាយករដ្ឋមន្ត្រីកម្ពុជាលោក ហ៊ុន សែន ថតរូបជាមួយអតីតនាយករដ្ឋមន្ត្រីថៃលោក Thaksin Shinawatra ក្នុងពេលសួរសុខទុក្ខលោក Thaksin នៅទីក្រុងបាងកក ប្រទេសថៃ កាលពីថ្ងៃពុធ ទី២១ ខែកុម្ភៈ ឆ្នាំ២០២៤។ (Hun Sen Via Facebook/Handout via REUTERS)
មុនដំណើរទស្សនកិច្ចរបស់អ្នកស្រី ផែតុងតាន ស៊ីណាវ៉ាត្រា មកកាន់ប្រទេសកម្ពុជា គណបក្សប្រជាជនកម្ពុជាបានឱ្យដឹងនៅក្នុងសេចក្តីប្រកាសព័ត៌មានមួយថា ទស្សនកិច្ចរបស់មេដឹកនាំគណបក្សភឿថៃ មកកម្ពុជាគឺជាការផ្លាស់ប្តូរទស្សនកិច្ចជាន់ខ្ពស់រវាងគណបក្សទាំងពីរ ដែលក្នុងគោលបំណងលើកិច្ចសហប្រតិបត្តិការនៃប្រទេសជាប់ភូមិផងរបងគ្នា ដើម្បីបម្រើផលប្រយោជន៍រួមរបស់ប្រជាជន និងគណបក្សទាំងពីរដោយផ្អែកលើចំណងមិត្តភាព និងកិច្ចសហប្រតិបត្តិការជិតស្និតរវាងគណបក្សទាំងពីរ។
ក្នុងដំណើរទស្សនកិច្ចចាប់ពីថ្ងៃទី១៨ ដល់១៩ ខែមីនានេះ អ្នកស្រី ផែតុងតាន ស៊ីណាវ៉ាត្រា នឹងជួបពិភាក្សាទ្វេភាគីជាមួយនឹងលោក ហ៊ុន សែន ប្រធានគណបក្សប្រជាជនកម្ពុជា និងជួបសម្តែងការគួរសមជាមួយនឹងលោក សាយ ឈុំ ប្រធានព្រឹទ្ធសភា ក៏ដូចជានឹងមានជំនួបជាមួយលោក ហ៊ុន ម៉ាណែត នាយករដ្ឋមន្ត្រីកម្ពុជាផងដែរ។
អ្នកតាមដាននយោបាយអន្តរជាតិ លោក សេង វណ្ណលី មើលឃើញពីដំណើរទស្សនកិច្ចរបស់អ្នកស្រី ផែតុងតាន ស៊ីណាវ៉ាត្រា ថាជាការរឹតចំណងដ៏ស្អិតរមួតនៃទំនាក់ទំនងរបស់មេដឹកនាំគណបក្សកាន់អំណាចនៃប្រទេសទាំងពីរ។
លោកបន្ថែមថា ដំណើរទស្សនកិច្ចនេះក៏ចង់បង្ហាញទៅដល់ប្រជាជននៃប្រទេសទាំងពីរ ពីចំណងមិត្តភាពរបស់មេដឹកនាំបក្សកាន់អំណាច ដោយសារតែកន្លងទៅប្រជាជនប្រទេសទាំងពីរតែងមានទំនាស់ជុំវិញបញ្ហាវប្បធម៌ប្រពៃណី និងប្រវត្តិសាស្ត្រ ក៏ដូចជាតំបន់ត្រួតស៊ីគ្នានៅខេត្តកោះកុងនៃប្រទេសកម្ពុជា និងខេត្តត្រាតនៃប្រទេសថៃ។
បើតាមលោក សេង វណ្ណលី ដំណើរទស្សនកិច្ចនេះក៏អាចជួយកាត់បន្ថយភាពតានតឹងនៃជម្លោះ និងស្វែងយល់ពីគ្នាឱ្យកាន់តែស៊ីជម្រៅផងដែរ។
លោកថ្លែងថា៖ «ម្យ៉ាងទៀតចំណងមិត្តភាពដ៏ស្អិតរមួតរវាងមេដឹកនាំចាស់ៗដូចជាអតីតលោកនាយករដ្ឋមន្ត្រី ថាក់ស៊ីន និងអតីតលោកនាយករដ្ឋមន្រ្តី ហ៊ុន សែន នៅក្នុងជំនួបកាលពីពេលថ្មីៗនេះ យើងឃើញនៅក្រោយជំនួបហ្នឹងមានប្រតិកម្មរបស់ជនជាតិថៃ ក៏ដូចជាអ្នកស្នេហាជាតិជ្រុលនិយមថៃជាច្រើន ចាប់ផ្តើមកកូរបញ្ហាទំនាស់ប្រវត្តិសាស្ត្រ ក៏ដូចជាប្រពៃណីទំនៀមទម្លាប់រវាងប្រទេសទាំងពីរ»។
ទោះជាយ៉ាងណា លោកថា ការបង្កើនកិច្ចសហប្រត្តិបត្តិការរវាងមេដឹកនាំបក្សកាន់អំណាចទាំងពីរនេះ ក៏បានបង្កជាការព្រួយបារម្ភដល់ជនជាតិថៃដែលមិនចូលចិត្តលោក ថាក់ស៊ីន ព្រោះពួកគេយល់ថា លោក ថាក់ស៊ីន បង្កើនទំនាក់ទំនងនេះគឺដើម្បីតែប្រយោជន៍របស់គណបក្សតែប៉ុណ្ណោះ។ នេះបើតាមលោក សេង វណ្ណលី។
វីអូអេមិនទាន់អាចសុំការអត្ថាធិប្បាយពីស្ថានទូតថៃប្រចាំនៅកម្ពុជាបានទេ ដោយសារស្ថានទូតមិនឆ្លើយសំណួរដែលបានផ្ញើតាមសារអេឡិចត្រូនិកអ៊ីមែលនៅថ្ងៃចន្ទនេះ។
ដំណើរទស្សនកិច្ចរបស់ប្រធានគណបក្សភឿថៃ អ្នកស្រីផែតុងតាន ស៊ីណាវ៉ាត្រា កើតមានឡើង ក្រោយអតីតនាយករដ្ឋមន្ត្រីកម្ពុជាលោក ហ៊ុន សែន បានទៅសួរសុខទុក្ខលោក ថាក់ស៊ីន ស៊ីណាវ៉ាត្រា បន្ទាប់ពីអតីតនាយករដ្ឋមន្រ្តីថៃរូបនេះ ត្រូវបានព្រះមហាក្សត្រថៃសម្រេចដោះលែងដោយមានលក្ខខណ្ឌពីបទចោទប្រកាន់ថាលោកបានប្រព្រឹត្តអំពើពុករលួយ។
គួររំឭកថា លោកហ៊ុន សែន និងលោក ថាក់ស៊ីន មានទំនាក់ទំនងយ៉ាងស៊ីជម្រៅ ហើយបានរាប់អានគ្នាជាបងប្អូនធម៌តាំងពីឆ្នាំ ១៩៩២ មុនពេលលោក ថាក់ស៊ីន បានក្លាយជានាយករដ្ឋមន្ត្រីថៃ។ បន្ទាប់មកលោកថាក់ស៊ីន ត្រូវបានធ្វើរដ្ឋប្រហារទម្លាក់ពីអំណាចក្នុងឆ្នាំ ២០០៦ លោក ថាក់ស៊ីន នៅតែមានទំនាក់ទំនងយ៉ាងជិតស្និទ្ធជាមួយលោក ហ៊ុន សែន ហើយលោកត្រូវបានតែងតាំងជាទីប្រឹក្សារបស់លោក ហ៊ុន សែន ថែមទៀតផង ហើយអំឡុងពេលរស់នៅក្រៅប្រទេសលោក ថាក់ស៊ីន និងក្រុមគ្រួសារបានមកប្រទេសកម្ពុជាដើម្បីជួបជាមួយលោក ហ៊ុន សែន ជាញឹកញាប់ផងដែរ៕