កាលពីថ្ងៃសៅរ៍ម្សិលមិញ ប៉ាឡេស្ទីនបានគំរាមផ្អាករាល់ទំនាក់ទំនងទាំងអស់ជាមួយនឹងសហរដ្ឋអាមេរិក ប្រសិនបើរដ្ឋបាលរបស់លោកប្រធានាធិបតី Donald Trump ធ្វើតាមគម្រោងដែលចង់បិទការិយាល័យការទូតរបស់ប៉ាឡេស្ទីននៅក្នុងរដ្ឋធានីវ៉ាស៊ីនតោន។
ការកាត់ផ្ដាច់ទំនាក់ទំនងដែលអាចទៅរួចនេះ អាចប៉ះពាល់ដល់កិច្ចប្រឹងប្រែងរបស់លោក Trump ក្នុងការស្វែងរកសន្តិភាពនៅក្នុងតំបន់មជ្ឈិមបូព៌ា ដែលជាបេសកកម្មដែលលោកផ្ដល់ភារកិច្ចដល់កូនប្រសារបស់លោក គឺលោក Jared Kushner។
អ្នកចរចាជាន់ខ្ពស់របស់ប៉ាឡេស្ទីនលោក Saeb Erekat បាននិយាយថា ការសម្រេចរបស់សហរដ្ឋអាមេរិក «គឺជារឿងអកុសល និងមិនអាចទទួលយកបាននោះទេ»។ លោកក៏បានចោទប្រកាន់រដ្ឋាភិបាលក្រុងវ៉ាស៊ីនតោនផងដែរ ថាបានធ្វើតាមការដាក់សម្ពាធពីរដ្ឋាភិបាលរបស់នាយករដ្ឋមន្ត្រីអ៊ីស្រាអែលលោក Benjamin Netanyahu «នៅចំពេលដែលប៉ាឡេស្ទីនព្យាយាមធ្វើកិច្ចសហការដើម្បីសម្រេចឲ្យបាននូវដំណោះស្រាយចុងក្រោយមួយ»។
នៅក្នុងការប្រកាសតាមវីដេអូមួយនៅលើប្រព័ន្ធផ្សព្វផ្សាយសង្គម លោក Saeb Erekat បាននិយាយថា៖ «ប៉ាឡេស្ទីននឹងផ្អាកការទំនាក់ទំនងទាំងអស់ជាមួយនឹងរដ្ឋបាលសហរដ្ឋអាមេរិកមួយនេះ»។
គេមិនទាន់ឃើញមានប្រតិកម្មណាមួយភ្លាមៗពីសំណាក់រដ្ឋបាលរបស់លោក Trump នោះទេ។ ការិយាល័យរបស់នាយករដ្ឋមន្ត្រីអ៊ីស្រាអែលលោក Netanyahu បានបញ្ជាក់ថា ការបិទនេះគឺជា «បញ្ហាពាក់ព័ន្ធនឹងច្បាប់របស់សហរដ្ឋអាមេរិក»។
មន្ត្រីអាមេរិកបានបញ្ជាក់មុនពេលលោក Saeb Erekat ប្រកាសយ៉ាងដូច្នេះថា វិធានការនេះគឺមិនមានគោលបំណងបង្កើនឥទ្ធិពលលើប៉ាឡេស្ទីននោះទេ ប៉ុន្តែគ្រាន់តែបណ្ដាលមកពីផលវិបាកដែលមិនបានជៀសបាននៃច្បាប់របស់សហរដ្ឋអាមេរិក។
រដ្ឋបាលលោក Trump បានប្រកាសកាលពីល្ងាចថ្ងៃសុក្រថា ប៉ាឡេស្ទីនប្រឆាំងនឹងមាត្រាច្បាប់ដែលបានចែងថា អង្គការរំដោះប៉ាឡេស្ទីន (Palestine Liberation Organization) ដែលជាអង្គការតំណាងឲ្យប្រជាពលរដ្ឋប៉ាឡេស្ទីន មិនអាចមានដំណើរការការិយាល័យរបស់ខ្លួននៅក្នុងរដ្ឋធានីវ៉ាស៊ីនតោននោះទេ ប្រសិនបើប៉ាឡេស្ទីនព្យាយាមឲ្យតុលាការឧក្រិដ្ឋកម្មអន្តរជាតិ ICC កាត់ទោសអ៊ីស្រាអែលពាក់ព័ន្ធនឹងឧក្រិដ្ឋកម្មប្រឆាំងនឹងជនជាតិប៉ាឡេស្ទីន៕