ពិធីបុណ្យឯករាជ្យជាតិលើកទី៦៥ របស់ប្រទេសកម្ពុជា បានប្រារព្ធឡើងយ៉ាងឱឡារិក ខុសប្លែកពីឆ្នាំមុនៗ ដោយមានអ្នកចូលរួមប្រមាណ២៥.០០០នាក់ និងមានកងកម្លាំងសន្តិសុខជិត៤.០០០នាក់។ កម្មវិធីបុណ្យជាតិដ៏សំខាន់នេះ បានចាប់ផ្តើមនៅវិមានឯករាជ្យនិងបញ្ចប់នៅព្រះបរមរាជវាំង។
បន្ទាប់ពីព្រះមហាក្សត្របានប្រទានភ្លើងជ័យនៅឯវិមានឯករាជ្យរួច ព្រះមហាក្សត្រ នាយករដ្ឋមន្រ្តី មន្រ្តីរដ្ឋាភិបាលជាន់ខ្ពស់ កងកម្លាំងមកពីគ្រប់អង្គភាព នៃក្រសួងការពារជាតិ ក្រសួងមហាផ្ទៃមន្ត្រីរាជការនានាភ្ញៀវជាតិនិងអន្តរជាតិរួមទាំងសិស្សានុសិស្សរាប់រយនាក់បានបន្តហែក្បួនទៅកាន់ព្រះបរមរាជវាំង ជាទីដែលមានការបង្ហាញកងទ័ពកម្ពុជា និងការថ្លែងពីនាយករដ្ឋមន្រ្តីហ៊ុន សែន និង ព្រះមហាក្សត្រនៃកម្ពុជាព្រះបាទ នរោត្តម សីហមុនី។
ថ្លែងទៅកាន់ជនរួមជាតិពីប្រាសាទចន្ទច្ឆាយាមុខព្រះបរមរាជវាំង ព្រះមហាក្សត្រវីរក្សត្រនៃកម្ពុជា ព្រះករុណាព្រះបរមនាថ នរោត្តម សីហមុនី ក៏បានថ្លែងរំឮកគុណដល់ព្រះវរបិតារបស់ទ្រង់ គឺព្រះមហាវីរៈក្សត្រព្រះបាទនរោត្តម សីហនុ ដែលបានទាមទារយកសិទ្ធិសេរីភាពនិងឯករាជ្យភាពពេញលេញមួយជូនប្រទេសកម្ពុជានៅក្នុងឆ្នាំ១៩៥៣ ហើយធ្វើឱ្យកម្ពុជា«មានឋានៈស្មើនឹងសាធារណរដ្ឋបារាំងគឺមានឋានៈជារដ្ឋឯករាជ្យពេញបរិបូណ៌»។
សិស្សានុសិស្សឈរកាន់ផ្កាដើម្បីអបអរពិធីបុណ្យឯករាជ្យជាតិលើកទី៦៥ នៅវិមានឯករាជកាលពីព្រឹកថ្ងៃទី០៩ វិច្ឆិកា២០១៨។(ទុំ ម្លិះ/VOA)
ព្រះមហាក្សត្រនៃកម្ពុជា ព្រះករុណាព្រះបរមនាថ នរោត្តម សីហមុនី ក៏បានថ្លែងអំពាវនាវឲ្យប្រជាពលរដ្ឋកម្ពុជារួបរួមសាមគ្គីគ្នាជាធ្លុងមួយក្រោមរដ្ឋធម្មនុញ្ញជាតិដែរ ដើម្បីរក្សាឯករាជ្យជាតិនិងសាមគ្គីជាតិ។
«នៅក្នុងឱកាសនេះ ខ្ញុំសូមអំពាវនាវបងប្អូនប្រជាពលរដ្ឋកម្ពុជាគ្រប់មជ្ឈដ្ឋាន សូមរួបរួមសាមគ្គីជាធ្លុងមួយស្ថិតក្រោមដំបូលរដ្ឋធម្មនុញ្ញនិងច្បាប់រដ្ឋដើម្បីចូលរួមចំណែកការពារនិងកសាងមាតុភូមិលើគ្រប់វិស័យ»។
ប្រទេសកម្ពុជាបានរួចផុតពីអាណានិគមនិយមបារាំងនិងបានក្លាយជារដ្ឋឯករាជ្យពេញបរិបូរណ៍មួយនៅក្នុងឆ្នាំ១៩៥៣ ថ្ងៃ ទី០៩ វិច្ឆិកា បន្ទាប់ពីព្រះមហាវីរក្សត្រព្រះបាទនរោត្តម សីហនុ ទទួលជោគជ័យក្នុងការទាមទារឯករាជ្យពីសាធារណរដ្ឋបារាំង ដែលបានគ្រប់គ្រងប្រទេសកម្ពុជាប្រមាណ ៩០ឆ្នាំ ចាប់តាំងពីឆ្នាំ១៨៦៣។
នៅថ្ងៃសុក្រនេះដែរ ការប្រារព្ធបុណ្យឯករាជ្យជាតិបានធ្វើឡើងព្រមជាមួយ និងខួបកំណើតនៃការបង្កើតកងយោធពលខេរភូមិន្ទកម្ពុជា។
ប្រទេសកម្ពុជា កំពុងរងការរិះគន់ពីបសិ្ចមប្រទេសពីការវាយប្រហារលើក្រុមអ្នករិះគន់រដ្ឋាភិបាល ការរឹតត្បិតលើក្រុមអង្គការសង្គមស៊ីវិល សារព័ត៌មានឯករាជ្យ ការរំលាយបក្សជំទាស់សង្គ្រោះជាតិ ការរឹតត្បិតសិទ្ធិនយោបាយរបស់អ្នកនយោបាយប្រឆំាង ការចាប់ឃុំខ្លួនមេបក្សជំទាស់ រួមទាំងការបោះឆ្នោតជាតិខែកក្កដាដោយគ្មានបក្សជំទាស់សង្គ្រោះជាតិជាដើម។
កន្លងមក សហរដ្ឋអាមេរិកបានប្រកាសមិនទទួលស្គាល់លទ្ធផលបោះឆ្នោត កាលពីថ្ងៃទី២៩ ខែកក្កដា និងព្រមានចាត់វិធានការបន្ថែមលើការបង្កកទ្រព្យសម្បត្តិ និងដាក់ទណ្ឌកម្មទិដ្ឋាការដល់មន្ត្រីកម្ពុជាមួយចំនួនពាក់ព័ន្ធនឹងការរំលោភសិទ្ធិមនុស្ស។ ចំណែកសហភាពអឺរ៉ុប ក៏បានព្រមានដកប្រព័ន្ធអនុគ្រោះពន្ធពីកម្ពុជា ដោយទុកពេល១២ខែ ដើម្បីឲ្យរដ្ឋាភិបាលកម្ពុជាស្តាស្ថានភាពប្រជាធិបតេយ្យឡើងវិញ។
យ៉ាងណាក៏ដោយ លោកនាយករដ្ឋមន្រ្តី ហ៊ុន សែន ដែលបានកាន់អំណាចជាង៣០ឆ្នាំមកនោះប្តេជ្ញាក្នុងការការពារឯករាជ្យជាតិ សន្តិភាព អធិបតេយ្យភាព និងបូរណភាពទឹកដី ដោយទប់ស្កាត់ការជ្រៀតជ្រែកការងារផ្ទៃក្នុងកម្ពុជា។
នាយករដ្ឋមន្រ្តីកម្ពុជា លោក ហ៊ុន សែន ស្ថិតក្នុងរថយន្តចេញដំណើរទៅកាន់ព្រះបរមរាជវាំង នៅក្នុងការប្រារព្ធពិធីបុណ្យឯករាជ្យជាតិលើកទី៦៥ នៅវិមានឯករាជកាលពីព្រឹកថ្ងៃទី០៩ វិច្ឆិកា២០១៨។(ទុំ ម្លិះ/VOA)
លោកបានថ្លែងថា៖
«ទប់ស្កាត់ការជ្រៀតជ្រែកកិច្ចការផ្ទៃក្នុងកម្ពុជា និងប្រឆាំងជាដាច់ខាតរាល់សកម្មភាពដែលពាក់ព័ន្ធនឹងបដិវត្តពណ៌ ឬ ការញុះញង់ណាមួយដែលបង្កឲ្យមានអស្ថិរភាពនយោបាយឬចលាចលក្នុងសង្គមជាតិកម្ពុជា»។
លោក ហ៊ុន សែន ដែលទើបតែបន្តតំណែងរយៈពេល៥ឆ្នាំទៅមុខទៀតតាមការបោះឆ្នោតនៅចុងខែកក្កដាកន្លងទៅបានបង្ហាញអំពីយុទ្ធសាស្រ្តចតុកោណដំណាក់កាលទី០៤ និងសុទិដ្ឋិនិយមក្នុងការបន្តកសាងប្រទេសជាតិឲ្យមានវឌ្ឍនភាពលើគ្រប់វិស័យ។
យុវជនកាយរឹទ្ធិ គី ឡាយហុង មកពីវិទ្យាល័យសាមគ្គីក្នុងរាជធានីភ្នំពេញ បានសម្តែងក្តីរីករាយ ដែលខ្លួនបានមកចូលរួមអបអរនៅក្នុងពិធីបុណ្យឯករាជ្យលើកទី៦៥នេះ និងបានបង្ហាញពីការដឹងគុណដែលប្រទេសកម្ពុជាត្រូវបានរំដោះពីអាណានិគមនិយមបារាំងសេស។ យ៉ាងណាក៏ដោយយុវជនវ័យ១៨ឆ្នាំរូបនេះបានបន្តថាប្រទេសកម្ពុជាមានសន្តិភាពហើយ ប៉ុន្តែខ្លួនចង់ឃើញប្រទេសកម្ពុជាមានសន្តិភាពខ្លាំងជាងនេះទៀតនៅឆ្នាំខាងមុខ។
គី ឡាយហុងបានបន្តថា៖
«ខ្ញុំចង់ឲ្យស្ថានភាពនៅក្នុងប្រទេសកម្ពុជាកែប្រែជាងហ្នឹងតិច មិនចង់អោយរបៀបថាមានជម្លោះទាស់ទែងគ្នា ដោយសារតែមានការខ្វែងគំនិតអ៊ីចឹងណាបង ខ្ញុំចង់មានការប្រសើរជាងហ្នឹងបន្តិចទៀត»។
មួយថ្ងៃមុនការប្រារព្ធពិធី បុណ្យឯករាជ្យជាតិ លើកទី ៦៥ មេដឹកនាំបក្សប្រឆាំងលោក កឹម សុខា បានចេញសារអបអរពិធីបុណ្យឯករាជ្យជាតិលើកទី៦៥ ក្នុងឆ្នាំ២០១៨ បើទោះជាលោកកំពុងជាប់ឃុំខ្លួននៅក្នុងផ្ទះក៏ដោយ។ លោកក៏បានអំពាវនាវឱ្យមានការថែរក្សាការពារឯករាជ្យជាតិនិងការបង្រួបបង្រួមជាតិនិងថ្លែងអំណរគុណដល់បុព្វបុរសដែលបានពលីជីវិតដើម្បីប្រទេសជាតិកម្ពុជា។
រដ្ឋាភិបាលសហរដ្ឋអាមេរិក លោករដ្ឋមន្ត្រីក្រសួងការបរទេសអាមេរិក ម៉ៃខល បុំប៉េអូ (Michael Pompeo) បានអបអរសាទរចំពោះកម្ពុជា ក្នុងពេលដែលកម្ពុជា រៀបចំបុណ្យខួបលើកទី៦៥ ដែលជាថ្ងៃឯករាជ្យជាតិ ដែលកម្ពុជាក្រោមការដឹកនាំ របស់សម្តេចឳសម្តេចព្រះបាទ នរោត្តម សីហនុ បានដណ្តើមពីបារាំង។ លោករដ្ឋមន្ត្រីនៃប្រទេសមហាអំណាចក៏បានបង្ហាញពីការបន្តទំនាក់ទំនងរឹងមាំរវាង សហរដ្ឋអាមេរិក និងប្រជាជនកម្ពុជាដើម្បីផ្តល់ផលប្រយោជន៍ដល់ប្រទេសទាំងពីរ ផងដែរ។
មុននិងពិធីបុណ្យឯករាជ្យលើកទី៦៥នាព្រឹកថ្ងៃសុក្រនេះ ក៏មានការបង្ហោះប៉ោងៗដោយភ្ជាប់ជាមួយពាក្យស្លោក និងការបួងសួងសូមឱ្យមានសុខសន្តិភាព ការបង្រួបបង្រួមជាតិ និងសាមគ្គីជាតិក្នុងប្រទេសកម្ពុជា៕