អាជ្ញាធរខេត្តកំពតអះអាងថា ការលិចលង់ទឹកជំនន់ក្នុងខេត្តនេះគឺមិនមានពាក់ព័ន្ធនឹងការបើទ្វារទឹកនៃទំនប់វារីអគ្គិសនីកំចាយ ដូចអ្នកជំនាញ និងអ្នកប្រើប្រាស់បណ្តាញសង្គមបានអះអាងនោះទេ។
រូបភាពនៃទឹកជំនន់ក្នុងខេត្តកំពត និងការបើកទ្វារទឹកទំនប់វារីអគ្គិសនីកំចាយត្រូវបានចែកចាយពេញទំព័រហេ្វសប៊ុក ចាប់តាំងពីថ្ងៃពុធកន្លងទៅ។ យ៉ាងហោចណាស់មានឃុំចំនួនបីក្នុងខេត្តកំពតបានទទួលរងគ្រោះដោយទឹកជំនន់យ៉ាងគំហុកនេះ។ ឃុំទាំងបីនោះរួមមានឃុំម៉ាក់ប្រាង្គ ឃុំកំពង់ក្រែង និងឃុំព្រៃឃ្មុំ ដែលស្ថិតនៅផ្នែកខាងក្រោមនៃទំនប់វារីអគ្គិសនីកំចាយរបស់ក្រុមហ៊ុនចិនស៊ីណូហ៊ីដ្រូ។
ទោះជាយ៉ាងនេះក្តី ក៏លោក ខូយ ឃុនហួរ អភិបាលខេត្តកំពត បានបដិសេធការអះអាងទាំងទ្បាយណាដែលថា ការលិចទឹកជំនន់នេះពាក់ព័ន្ធទៅនឹងការបើកទ្វារទំនប់វារីអគ្គិសនីនោះ។ លោកបានថ្លែងការពារក្រុមហ៊ុនចិនស៊ីណូហ៊ីដ្រូ ដោយលើកឡើងថា ការបិទ និងបើកទំនប់ដោយក្រុមហ៊ុនគ្រប់គ្រងវារីអគ្គិសនីកំចាយនោះគឺគោរពតាមស្តង់ដារក្រឹត្យក្រមត្រឹមត្រូវ។
«ការដែលលើកឡើងហ្នឹងគឺ វាអត់មានលក្ខណៈវិទ្យាសាស្រ្តទេ ហើយការបិទបើកមិនមែនការបិទបើកភ្លឺស្រែទេ គឺការបិទបើកទំនប់»។
លោកបន្ថែមទៀតថា៖
«ការដែលបើក ឬមិនបើក តិចឬច្រើន វាអាស្រ័យទៅលើទឹក។ សូម្បីនៅប្រទេសរីកចម្រើនក៏ដូចគ្នាដែរ។ អានេះវាមិនមែនជារឿងធ្លាក់ភ្លៀងធម្មតាទេ។ វាជាភ្លៀងដែលមកពីព្យុះ។ កាលណាវាច្រើន យើងត្រូវបើកឲ្យច្រើន ហើយកាលណាទឹកតិច គេបើកឲ្យតិចវិញ។ វាជាក្រឹត្យក្រមរបស់វា»។
លោកអភិបាលខេត្តក៏បានបញ្ជាក់ដែរថា មិនមានផលប៉ះពាល់ជាដុំកំភួនដល់ប្រជាពលរដ្ឋនៅក្នុងខេត្តកំពតទេ។ លោកប្រាប់ថា មានតែការខូចខាតផ្ទះសម្បែងផ្ទះតូចតាច និងប៉ះពាល់ដំបូលបន្តិចបន្តួចតែប៉ុណ្ណោះ។
ទំនប់វារីអគ្គិសនីកំចាយ ដែលអាចផ្គត់ផ្គង់ថាមពលអគ្គិសនី១៩៣មេហ្កាវ៉ាត់ ត្រូវបានបើកឲ្យដំណើរការចាប់តាំងពីឆ្នាំ២០១១មក ក្រោមគម្រោងសាងសង់ និងវិនិយោគដោយក្រុមហ៊ុនចិនឈ្មោះស៊ីណូហ៊ីដ្រូ។ គម្រោងនេះរងការរិះគន់យ៉ាងច្រើនពីអ្នកការពារបរិស្ថាន និងអ្នកជំនាញថាមពលអំពីផលប៉ះពាល់លើបរិស្ថាន និងលើប្រជាពលរដ្ឋដែលរស់នៅក្បែរនោះ។
លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្ដីពីកម្ពុជា យល់ថា កត្តាចម្បងដែលបង្កឲ្យមានការលិចទីក្រុងកំពតនោះគឺ មិនមានអ្វីក្រៅពីការបើកទ្វារទំនប់វារីអគ្គិសនីផ្ទួនៗនោះទេ ដោយសារតែមានភ្លៀងធ្លាក់ជាបន្តបន្ទាប់ក្នុងពេលប៉ុន្មានថ្ងៃនេះ។
«អាហ្នឹងវាពាក់ព័ន្ធជាមួយនឹងការគ្រប់គ្រង់ទំនប់ រឿងប្រព័ន្ធបង្ហៀរទឹក យន្តការក្នុងការកាត់បន្ថយទាក់ទងនឹងផលប៉ះពាល់។ គាត់(ក្រុមហ៊ុន)បានធ្វើការប៉ាន់ស្មានទេ? ថាតើនៅពេលដែលគាត់ធ្វើសំណង់សាងសង់ហើយ ពេលដែលភ្លៀងចូលខ្លាំងមក ថា តើគាត់មានជម្រើសផ្សេងៗក្នុងការបង្ហៀរទឹកចេញពីអាងស្តុកទឹកហ្នឹង កុំឲ្យទឹកបើកតាមតែទ្វារទំនប់ទឹកតែមួយមុខ ក្នុងការធានាថា កុំឲ្យមានផលប៉ះពាល់នៅពេលដែលភ្លៀងខ្លាំង ទឹកបង្ហូរខ្លាំងមក វាប៉ះពាល់ដល់ប្រជាជននៅក្នុងតំបន់ភាគខាងក្រោមនៃទំនប់ហ្នឹង?»។
លោក តឹក វណ្ណារ៉ា យល់ថា ទំនប់ត្រូវបានគេសាងសង់ដើម្បីគ្រប់គ្រងស្ថានភាពទឹក និងកាត់បន្ថយទឹកជំនន់ ដែលបង្កឡើងដោយទឹកភ្លៀង។ ហេតុដូចនេះ វាត្រូវតែមានការគ្រប់គ្រងប្រព័ន្ធបង្ហៀរទឹកឲ្យត្រឹមត្រូវ។ លោកបន្ថែមទៀតថា អង្គការសង្គមស៊ីវិលដែលធ្វើការងារពាក់ព័ន្ធបញ្ហានេះនឹងធ្វើសំណើទៅក្រុមហ៊ុនទំនប់វារីអគ្គិសនីកំចាយ សុំឲ្យក្រុមហ៊ុនមានការគិតគូរអំពីបញ្ហានេះឡើងវិញ។
«យើងឲ្យក្រុមហ៊ុនពិនិត្យមើលឡើងវិញទាក់ទងនឹងផលប៉ះពាល់លើប្រជាពលរដ្ឋ ដែលគាត់រស់នៅភាគខាងក្រោមហ្នឹង ហើយនឹងភាពទទួលខុសត្រូវអ្វីខ្លះ ដែលក្រុមហ៊ុនចូលរួមចំណែកទាក់ទងទៅលើផលប៉ះពាល់របស់គាត់។ ហើយទី២ ថាតើសម្រាប់ថ្ងៃក្រោយ ពេលបន្ទាប់ទៀត មានជម្រើសអ្វីខ្លះក្នុងការបង្ហៀរទឹកចេញដើម្បីកុំឲ្យប៉ះពាល់ប្រជាជនផ្នែកខាងក្រោម។ ហើយទី៣ ថាតើមានជូនដំណឹងជាមុនទេ ឲ្យប្រជាជនរស់នៅភាគខាងក្រោមហ្នឹង ដឹងពីការបើកទឹកយ៉ាងគំហុកចេញពីអាងស្តុកទុកទំនប់ហ្នឹង ដើម្បីឲ្យគាត់ត្រៀមខ្លួនជាមុន»។
គណៈកម្មាធិការជាតិគ្រប់គ្រងគ្រោះមហន្តរាយបានប្រកែកមិនផ្តល់អត្ថាធិប្បាយដល់ VOA ស្តីពីផលប៉ះពាល់នៃទឹកជំនន់ដ៏គំហុកនោះទេ តែលោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានឲ្យដឹងថា ស្ថានភាពអាកាសធាតុ និងទឹកជំនន់បានធូរស្រាលខ្លះវិញហើយ៕