សាលាក្តីខ្មែរក្រហមបានរៀបចំឲ្យជនជាប់ចោទ នួន ជា ធ្វើពិធីសង្ឃទាននៅក្នុងមន្ទីរឃុំឃាំងសម្រាប់ឱកាសបុណ្យភ្ជុំបិណ្ឌនេះ ស្របពេលដែលខៀវ សំផន ត្រូវបញ្ជូនទៅកាន់មន្ទីរពេទ្យជាបន្ទាន់ដោយសារជំងឺផ្តាសាយធំ។
លោកនេត្រ ភក្ត្រា អ្នកនាំពាក្យសាលាក្តីខ្មែរក្រហមបានឲ្យដឹងនៅថ្ងៃសុក្រនេះថាពិធីសាសនាត្រូវបានរៀបចំសម្រាប់ជនជាប់ចោទទាំងពីរកាលពីថ្ងៃពុធទី១៧ខែកញ្ញា ក៏ប៉ុន្តែខៀវ សំផន មានអាការៈឈឺផ្តាសាយខ្លាំងនៅវេលាម៉ោង៤ទៀបភ្លឺនៅថ្ងៃដដែលនោះហើយក្រុមគ្រូពេទ្យបានសម្រេចចិត្តបញ្ជូនទៅកាន់មន្ទីរពេទ្យជាបន្ទាន់។
«មន្ទីរឃុំឃាំងរបស់សាលាក្តីខ្មែរក្រហមបានរៀបចំនូវពិធីសាសនាដោយធ្វើជាពិធីសង្ឃទានសម្រាប់ជនជាប់ចោទទាំងពីរគឺនួន ជា និងខៀវ សំផន ដើម្បីចូលរួមសម្រាប់ពិធីភ្ជុំបិណ្ឌ។ប៉ុន្តែមានតែវត្តមានរបស់នួន ជា និងក្រុមគ្រួសាររបស់គាត់ទេ។ដោយឡែកខៀវ សំផន មិនមានវត្តមានទេដោយសារតែពេលព្រឹកនោះគាត់ត្រូវបានបញ្ជូនទៅកាន់មន្ទីរពេទ្យដើម្បីព្យាបាលជំងឺផ្តាសាយរបស់គាត់»។
ខៀវ សំផន អតីតប្រមុខរដ្ឋនៃរបបកម្ពុជាប្រជាធិបតេយ្យរបស់ពួកខ្មែរក្រហមអាយុ៨៣ឆ្នាំ និងនួន ជា អតីតប្រធានសភាអាយុ៨៨ ឆ្នាំត្រូវផ្តន្ទាទោសដោយអង្គជំនុំជម្រះសាលាដំបូងរបស់សាលាក្តីខ្មែរក្រហមឲ្យជាប់ពន្ធនាគារអស់មួយជីវិតកាលពីដើមខែសីហា។ ក្រោយពីតុលាការរកឃើញកំហុសទាក់ទងទៅនឹងឧក្រិដ្ឋកម្មប្រឆាំងមនុស្សជាតិក្រោមការគ្រប់គ្រងរបស់ខ្លួន។
ការគ្រប់គ្រងដែលមានរយៈពេលជិតបួនឆ្នាំបានបណ្តាលឲ្យប្រជាពលរដ្ឋកម្ពុជាស្លាប់យ៉ាងតិច១,៧លាននាក់។
លោកនេត្រ ភក្រ្តាបញ្ជាក់ថាពិធីសាសនាសង្ឃទានសម្រាប់ពិរុទ្ធជននួន ជា មានរយៈពេលប្រមាណមួយម៉ោងដោយមានព្រះសង្ឃមួយអង្គនិងអាចារ្យម្នាក់។
ពិធីបុណ្យភ្ជុំបិណ្ឌគឺជាពិធីព្រះពុទ្ធសាសនាដ៏សំខាន់មួយរបស់ប្រជាពលរដ្ឋខ្មែរដែលមានរយៈពេល១៥ថ្ងៃ។ ក្នុងពិធីនេះពុទ្ធសាសានិកធ្វើពិធីបង្សុកូល ឬប្រគេនចង្ហាន់ព្រះសង្ឃដើម្បីឧទ្ទិសកុសលដល់បុព្វការីជនឬជីដូនជីតាសាច់ញាត្តិរបស់ខ្លួនដែលបានទទួលមរណភាពក្នុងពេលកន្លងមក។
ពិធីព្រះពុទ្ធសាសនានេះនិងសាសនាដទៃទៀត ត្រូវរំលាយចោលទាំងស្រុងនៅក្នុងរបបកម្ពុជាប្រជាធិបតេយ្យរបស់នួន ជា និងខៀវ សំផន។
ដោយឡែកខៀវ សំផន នៅតែបន្តស្ថិតនៅក្នុងមន្ទីរពេទ្យនៅឡើយឈានដល់ថ្ងៃទី៣នៅថ្ងៃនេះ។នេះបើយោងតាមលោកគង់ សំអុន សហមេធាវីកម្ពុជារបស់ជនជាប់ចោទ។
«ឥឡូវលោកខៀវ សំផន នៅមន្ទីរពេទ្យអស់រយៈពេលបីថ្ងៃហើយ។គាត់មានជំងឺរលាកផ្លូវដង្ហើម»។
គេនៅមិនទាន់ដឹងថាក្រុមគ្រូពេទ្យនឹងអនុញ្ញាតឲ្យអតីតប្រមុខរដ្ឋសម័យខ្មែរក្រហមរូបនេះចាកចេញពីមន្ទីរពេទ្យនៅពេលណានោះទេ។ ក៏ប៉ុន្តែទាំងលោកមេធាវីគង់ សំអុន ទាំងលោកនេត្រ ភក្ត្រា អ្នកនាំពាក្យសាលាក្តីខ្មែរក្រហមអះអាងថា ខៀវ សំផន មានសុខភាពល្អប្រសើរមកវិញខ្លះហើយ៕