កូរ៉េខាងជើងនិយាយនៅថ្ងៃចន្ទនេះថា នាយករដ្ឋមន្ត្រីជប៉ុនលោក Fumio Kishida បានស្នើសុំឱ្យមានជំនួបកំពូលមួយជាមួយមេដឹកនាំកូរ៉េខាងជើងលោកKim Jong Un។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មានAP។
ប្អូនស្រីរបស់លោកKim Jong Un គឺអ្នកស្រី Kim Yo Jong ដែលជាមន្ត្រីជាន់ខ្ពស់របស់កូរ៉េខាងជើងផងដែរនោះ បានគូសបញ្ជាក់ដូចនេះនៅក្នុងការផ្សព្វផ្សាយនៃប្រពន្ធឃោសនារដ្ឋកូរ៉េ។ អ្នកស្រីនិយាយថា លោកKishidaបានស្នើឡើងដូចនេះតាមរយៈប្រភពមួយ ដែលមិនត្រូវបានប្រាប់ឱ្យដឹង ដើម្បីនាំយកជំហររបស់លោក ក្នុងការចង់ជួបមេដឹកនាំកូរ៉េខាងជើងដោយផ្ទាល់ក្នុងពេលឆាប់ៗខាងមុខ។
អ្នកស្រីKim Yo Jong និយាយថា តើសំណើសុំជួបនេះគឺដើម្បីលើកកម្ពស់ទំនាក់ទំនងទ្វេភាគីឬយ៉ាងណាគឺអាស្រ័យលើភាគីជប៉ុនតែប៉ុណ្ណោះ។ អ្នកស្រីបន្ថែមទៀតថា ប្រសិនបើលោក Kishida ផ្តោតលើការព្យាយាមជំរុញដោះស្រាយបញ្ហាចាប់ពង្រត់ជនជាតិជប៉ុនកាលពីអតីតកាលដោយកូរ៉េខាងជើងនោះ លោកនឹងទទួលរងការរិះគន់ថាលោកចង់ជួបមេដឹកនាំកូរ៉េខាងជើងគឺដើម្បីចង់ជំរុញប្រជាប្រិយភាពរបស់លោកតែប៉ុណ្ណោះ។
អ្នកជំនាញមួយចំនួននិយាយថា កូរ៉េខាងជើងកំពុងប្រឹងប្រែងលើកកម្ពស់ទំនាក់ទំនងរបស់ខ្លួនជាមួយជប៉ុន ដើម្បីជាវិធីមួយធ្វើឱ្យចុះខ្សោយភាពជាដៃគូសន្តិសុខត្រីភាគីរវាងរដ្ឋាភិបាលក្រុងវ៉ាស៊ីនតោនជាមួយកូរ៉េខាងត្បូងនិងជប៉ុន ខណៈដែលលោក Kishida ក៏កំពុងចង់ធ្វើឱ្យប្រសើរឡើងនូវទំនាក់ទំនងរបស់ខ្លួនជាមួយកូរ៉េខាងជើងផងដែរ ដើម្បីបង្កើនប្រជាប្រិយភាពរបស់លោកដែលកំពុងតែធ្លាក់ចុះនៅក្នុងប្រទេស។
សហរដ្ឋអាមេរិកនិងកូរ៉េខាងត្បូងបានពង្រីកការធ្វើសមយុទ្ធយោធារបស់ខ្លួន ក៏ដូចជាសមយុទ្ធត្រីភាគីជាមួយជប៉ុនផងដែរ ក្នុងការឆ្លើយតបនឹងការបាញ់សាកល្បងអាវុធ ដែលជាការបង្កហេតុរបស់កូរ៉េខាងជើងតាំងពីឆ្នាំ២០២២មក៕