សមាជិករដ្ឋសភាសហរដ្ឋអាមេរិកចំនួន៩នាក់ខាងគណបក្សសាធារណរដ្ឋ ដែលមិនសូវមានឈ្មោះបោះសំឡេងក្នុងចំណោមពលរដ្ឋអាមេរិកាំង បានប្រកាសកាលពីថ្ងៃអាទិត្យថា ពួកគេនឹងឈរឈ្មោះប្រកួតប្រជែងយកតំណែងប្រធានរដ្ឋសភាអាមេរិក។
រដ្ឋសភាអាមេរិកពុំមានប្រធានដឹកនាំរបស់ខ្លួនអស់ពេលជិត៣សប្តាហ៍មកហើយ បន្ទាប់ពីសមាជិកស្តាំនិយមតឹងរ៉ឹងចំនួន៨នាក់ បានចូលរួមជាមួយសមាជិករដ្ឋសភាខាងគណបក្សប្រជាធិបតេយ្យ បោះឆ្នោតទម្លាក់អតីតប្រធានរដ្ឋសភាលោក Kevin McCarthy កាលពីពេលកន្លងទៅនេះ។
ក្រុមសមាជិករដ្ឋសភាមួយក្រុមតូចខាងគណបក្សសាធារណរដ្ឋ មានការខឹងសម្បារដែលលោក McCarthy បានឯកភាពយល់ព្រមលើកិច្ចព្រមព្រៀងចំណាយថវិកាមួយរបស់រដ្ឋាភិបាល ជាមួយប្រធានាធិបតីអាមេរិកលោក Joe Biden ដែលគេគិតថាជារឿងធំ ដែលនឹងបញ្ជៀសការបិទផ្នែកខ្លះរបស់រដ្ឋាភិបាលអាមេរិក និងទុកឱ្យរដ្ឋាភិបាលមានថវិកាដំណើរការរហូតដល់ថ្ងៃទី១៧ ខែវិច្ឆិកាខាងមុខ។
តាំងពីការទម្លាក់លោក McCarthy ចេញពីតំណែងប្រធានរដ្ឋសភាមក ក្រុមសមាជិករដ្ឋសភាអាមេរិកខាងបក្សសាធារណរដ្ឋ នៅមិនទាន់អាចស្រុះស្រួលគ្នា ដើម្បីរកអ្នកថ្មីមកជំនួសអតីតប្រធានរដ្ឋសភាចាស់នៅឡើយទេ។ ពេលនេះសមាជិករដ្ឋសភាចំនួន៩នាក់ខាងគណបក្សនេះនិយាយថា ពួកគេកំពុងព្យាយាមដើម្បីប្រកួតប្រជែងយកតំណែងមួយនេះ ដែលគេរំពឹងថានឹងលើកឡើងពីបេក្ខភាពរបស់គេនៅក្នុងកិច្ចប្រជុំរបស់គណបក្សនៅយប់ថ្ងៃចន្ទនេះ។ ប្រសិនបើគណបក្សសាធារណរដ្ឋយល់ព្រមលើជម្រើសមួយនេះ រដ្ឋសភាអាមេរិកទាំងមូលអាចបោះឆ្នោតជ្រើសរើសប្រធានរបស់ខ្លួនជាថ្មីម្តងទៀតនៅថ្ងៃអង្គារស្អែកនេះ។
បេក្ខជនឈរឈ្មោះជាប្រធានរដ្ឋសភាអាមេរិកនៃគណបក្សសាធារណរដ្ឋទាំង៩នាក់នេះរួមមាន លោក Jack Bergman មកពីរដ្ឋ Michigan លោក Tom Emmer មកពីរដ្ឋ Minnesota លោក Byron Donalds មកពីរដ្ឋ Florida លោក Kevin Hern មកពីរដ្ឋ Oklahoma លោក Pete Sessions មកពីរដ្ឋ Texas លោក Gary Palmer មកពីរដ្ឋ Alabama លោក Austin Scott មកពីរដ្ឋ Georgia លោក Dan Meuser មកពីរដ្ឋ Pennsylvania និងលោក Mike Johnson នៃរដ្ឋ Louisiana។
គេនៅមិនទាន់ឃើញមានបេក្ខជនណាម្នាក់លេចធ្លោខ្លាំងនៅឡើយទេក្នុងចំណោមបេក្ខជនទាំង៩រូបនេះ បើទោះបីជាលោក Tom Emmer ដែលមានឋានៈលំដាប់លេខ៣ក្នុងរដ្ឋសភាអាមេរិកខាងបក្សសាធារណរដ្ឋមានប្រៀបលើសបន្តិច ដោយសារតែអតីតប្រធានរដ្ឋសភាលោក McCarthy គាំទ្រលោកក្តី។
ការដែលរដ្ឋសភាអាមេរិកមិនមានប្រធានដឹកនាំនេះ ធ្វើឱ្យរដ្ឋសភាមិនអាចបើកកិច្ចប្រជុំអនុម័តច្បាប់ ឬអនុម័តគាំទ្រសេចក្តីសម្រេចណាមួយ ដូចជាការគាំទ្រប្រទេសអ៊ីស្រាអែល ក្រោយការវាយប្រហារដ៏ភ្ញាក់ផ្អើលរបស់ក្រុមហាម៉ាស់លើអ៊ីស្រាអែល កាលពីថ្ងៃទី៧ ខែតុលា កន្លងទៅនេះ៕