លោក Steve Scalise នៃគណបក្សសាធារណរដ្ឋបញ្ចប់ការប៉ុនប៉ងឱ្យក្លាយជាប្រធានរដ្ឋសភាក្រោយពីលោកគ្មានសំឡេងឆ្នោតគ្រប់គ្រាន់ដើម្បីទទួលតំណែងនេះ។ លោក Scalise បាននិយាយប្រាប់សហសេវិកនានារបស់គណបក្សសាធារណរដ្ឋនៅក្នុងការប្រជុំបិទទ្វារមួយ កាលពីយប់ថ្ងៃព្រហស្បតិ៍អំពីសេចក្តីសម្រេចរបស់លោក។
វិធានការបន្ទាប់មានភាពស្រពិចស្រពិល ពីព្រោះរដ្ឋសភាបានបិទនៅពេលក្រុមសាធារណរដ្ឋព្យាយាមបោះឆ្នោតជ្រើសរើសប្រធានម្នាក់ក្រោយការដកលោក Kevin McCarthy ពីតំណែងនេះ។
លោក Scalise បានថ្លែងថា គណបក្សសាធារណរដ្ឋជាក្រុមភាគច្រើន «ត្រូវតែប្រមូលផ្តុំគ្នាហើយមិនទាន់មានការណ៍នេះនៅឡើយទេ»។
លោកបានធ្វើការច្រើនដើម្បីធ្វើឱ្យមានសំឡេងឆ្នោតគាំទ្រច្រើន ក្រោយពីបានទទួលការតែងតាំងដោយសហសេវិកភាគច្រើនរបស់លោក តែក្រោយពីមានជំនួបឯកជនច្រើនម៉ោងជាងពីរថ្ងៃនិងរហូតដល់ពេលយប់ជ្រៅនៅក្នុងវិមានសភាកាពីតូលមក មានការច្បាស់លាស់ថា ក្រុមសមាជិកសភានៅតែមិនព្រមគាំទ្រលោក។
មានការខឹងសម្បារកាន់តែខ្លាំងឡើងនៅពេលវិបត្តិនេះមានភាពធ្ងន់ធ្ងរជាងមុន ហើយក្រុមសាធារណរដ្ឋបានខាតមួយថ្ងៃទៀតដោយគ្មានប្រធានរដ្ឋសភា។ លោក Scalise បានខំប្រឹងឱ្យមានសំឡេងគាំទ្រជាង ១០០ ភាគច្រើនពីក្រុមសមាជិកដែលគាំទ្រគូប្រជែងធំរបស់លោក គឺអ្នកតំណាងរាស្ត្រ លោក Jim Jordan ប្រធានគណៈកម្មាធិការនីតិកម្មដែលមានការគាំទ្រពីក្រុមអ្នកនិយមនយោបាយតឹងរ៉ឹង។ លោក Jim Jordan បានប្រកាសថា លោកមិនឈរឈ្មោះទៀតទេ ហើយថា លោកបោះឆ្នោតឱ្យលោក Scalise។
តែក្រុមនិយមនយោបាយតឹងរ៉ឹងជាច្រើននាក់ដែលធ្វើតាមខ្សែញាក់របស់លោក Donald Trump នៅតែក្រាញននៀលក្នុងការប្រយុទ្ធដ៏យូរដើម្បីរកអ្នកជំនួសលោក McCarthy នៅក្រោយការដកលោកពីតំណែងជាប្រវត្តិសាស្ត្រនេះ។ ពួកគេបាននិយាយបង្ហាញហេតុផលថា លោក Scalise មេដឹកនាំក្រុមភាគច្រើនមិនមែនជាជម្រើសល្អជាងមុនទេ ហើយថា លោកគួរផ្តោតលើសុខភាពលោក ដោយសារលោកកំពុងប្រយុទ្ធនឹងជំងឺមហារីក ហើយលោកមិនមែនជាមេដឹកនាំដែលពួកគេនឹងគាំទ្រទេ។ មិនទាន់មានការកំណត់ធ្វើការបោះឆ្នោតក្នុងរដ្ឋសភាទៀតទេ៕
