លោក Jim Jordan សមាជិកសភាសហរដ្ឋអាមេរិកសង្ឃឹមថាមានសមាជិករដ្ឋសភាគ្រប់គ្រាន់នឹងគាំទ្របេក្ខភាពលោកជាប្រធានរដ្ឋសភា នៅពេលក្រុមអ្នកតំណាងរាស្ត្រនឹងប្រជុំគ្នានៅថ្ងៃពុធនេះនៅម៉ោង ១១ព្រឹកម៉ោង នៅរដ្ឋធានីវ៉ាស៊ីនតោន មួយថ្ងៃក្រោយពីពួកសហសេវិកសាធារណរដ្ឋរបស់លោកបានច្រានលោកចោលនៅក្នុងការបោះឆ្នោតលើកទីមួយ។
លោក Jordan បាននិយាយថា៖ «យើងកំពុងធ្វើឱ្យមានការជឿនលឿន។ ខ្ញុំមានអារម្មណ៍ល្អអំពីការណ៍នេះ។ យើងនឹងបន្តធ្វើដូច្នេះតទៅទៀត។ យើងបានសន្ទានាគ្នាល្អ បានពិភាក្សាគ្នាល្អជាមួយពួកសហសេវិករបស់យើង។ ហើយការពិតទៅ គ្មាននរណាម្នាក់ក្នុងអង្គប្រជុំរបស់យើងចង់ឱ្យមានរដ្ឋាភិបាលចម្រុះបែបណាមួយជាមួយពួកប្រជាធិបតេយ្យទេ។ ដូច្នេះ យើងនឹងបន្តធ្វើការតទៅទៀត ហើយយើងនឹងមានការបោះឆ្នោត»។
សមាជិកនៃគណបក្សសាធារណរដ្ឋទាំងអស់ មិនទាន់បានត្រៀមខ្លួនដើម្បីលើក លោក Jordan ដែលជាប្រធានគណៈកម្មាធិការនីតិកម្មរដ្ឋសភាឱ្យទទួលតំណែងជាន់ខ្ពស់ បន្ទាប់ពីប្រធានាធិបតីនិងអនុប្រធានាធិបតីទេ។
កាលពីថ្ងៃអង្គារ សមាជិករដ្ឋសភាខាងគណបក្សសាធារណរដ្ឋ ២០នាក់ បានបោះឆ្នោតប្រឆាំងនឹងលោក Jordan។
តំណាងរាស្ត្រគណបក្សសាធារណរដ្ឋខ្លះនៅតែមិនសប្បាយចិត្តនឹងការដកលោក Kevin McCarthy ពីតំណែងប្រធានរដ្ឋសភាកាលពីពីរសប្តាហ៍មុននេះ។ តែលោក Jordan នៅតែមានសុទិដ្ឋិនិយម៕
