អត្រាអ្នកជក់បារីនៅក្នុងប្រទេសនូវែលសេឡង់ស្ថិតក្នុងកម្រិតទាបក្នុងប្រវត្តិសាស្ត្ររួចទៅហើយ។ បើយោងតាមតួលេខរបស់រដ្ឋាភិបាលនូវែលសេឡង់បានឱ្យដឹងថា មនុស្សពេញវ័យ ៨% ជក់បារីជារៀងរាល់ថ្ងៃ ហើយជនជាតិដើមភាគតិច Māori ជិត ១ភាគ៥ ក៏អ្នកជក់បារីដែរ។
ប៉ុន្តែអាជ្ញាធរចង់ឱ្យការប្រើប្រាស់ថ្នាំជក់ទាបជាងក្រោម ៥% នៅត្រឹមឆ្នាំ ២០២៥។ ពួកគេថា គោលបំណងគឺដើម្បីលុបចោលការជក់បារីទាំងស្រុងតែម្តង។
ច្បាប់មួយដែលត្រូវបានអនុម័តដោយសភាប្រទេសនូវែលស៊ីឡង់កាលពីពាក់កណ្តាលខែធ្នូ នៅក្នុងទីក្រុងវែលីងតោន បានដាក់ការហាមឃាត់ជាធរមានលើប្រជាជននូវែលសេឡង់ក្មេងៗមិនឱ្យទិញបារីអស់មួយជីវិត។ កំណែទម្រង់នេះកំណត់ថា ផលិតផលថ្នាំជក់មិនត្រូវលក់ទៅឱ្យបុគ្គលដែលកើតចាប់ពីថ្ងៃទី ១ ខែមករា ឆ្នាំ ២០០៩តទៅនោះទេ។
ច្បាប់នេះត្រូវបានគេចាត់ទុកថា ជាច្បាប់ដំបូងគេនៅក្នុងពិភពលោកផងដែរ។
ចំនួនហាងឬតូបដែលអនុញ្ញាតឱ្យលក់បារីនឹងត្រូវកាត់បន្ថយពី ៦.០០០ ទៅត្រឹម ៦០០ តូបប៉ុណ្ណោះនៅទូទាំងប្រទេសនូវែលស៊ីឡង់ទាំងមូល។ ចំនួនសារធាតុនីកូទីនដែលស្របច្បាប់ក្នុងផលិតផលថ្នាំជក់ក៏នឹងត្រូវដកចេញផងដែរ។
ក្រុមអ្នករិះលក់ចំពោះការផ្លាស់ប្តូរនេះបានព្រមានថា ការធ្វើបែបនេះអាចជំរុញឱ្យមានទីផ្សារខុសច្បាប់លើផលិតផលថ្នាំជក់កើតឡើង។
លោកសាស្ត្រាចារ្យ Nick Wilson ជាប្រធានមហាវិទ្យាល័យសុខភាពសាធារណៈនៅសាកលវិទ្យាល័យ Otago បានប្រាប់សារព័ត៌មាន Australian Broadcasting Corp. កាលពីថ្ងៃទី ១៤ ខែធ្នូថា ការលុបចោលអាយុស្របច្បាប់សម្រាប់ការប្រើប្រាស់ថ្នាំជក់ ជាផ្នែកមួយនៃការពង្រឹងវិធានការប្រឆាំងការជក់បារី។ លោកបានថ្លែងក្នុងសម្តីដើមដូចនេះថា៖
«នេះគ្រាន់តែជាជំហានមួយនៃវិធានការទាំងមូលប៉ុណ្ណោះ ហើយវាអាចជាផ្នែកដែលមិនសំខាន់បំផុតមួយ ពាក់ព័ន្ធនឹងការកាត់បន្ថយកន្លែងលក់បារី និងដកសារធាតុនីកូទីនពីក្នុងថ្នាំជក់។ ការដកសារធាតុនីកូទីនពីថ្នាំជក់ប្រហែលជាផ្នែកដ៏សំខាន់នៃច្បាប់នេះរហូតមកដល់ពេលនេះ»។
រដ្ឋាភិបាលនូវែលសេឡង់បាននិយាយថា គេត្រូវការច្បាប់ថ្នាំជក់ដែលតឹងជាងមុន ដើម្បីជួយមនុស្សរាប់ពាន់នាក់ឱ្យរស់នៅបានយូរជាងមុន និងមានសុខភាពល្អជាងមុន។ ក្រុមមន្ត្រីបានអះអាងថា គេអាចសន្សំទឹកប្រាក់រាប់ពាន់លានដុល្លារអាមេរិក បើមិនត្រូវចំណាយដើម្បីព្យាបាលជំងឺដែលបង្កមកពីការជក់បារីនោះទេ។
ប្រទេសអូស្ត្រាលីបាននាំមុខគេក្នុងពិភពលោកលើការគ្រប់គ្រងថ្នាំជក់ ដោយការប្រើប្រាស់សារព្រមានសុខភាពជារូបភាព រួមជាមួយនឹងច្បាប់ស្តីពីការវេចខ្ចប់ ដែលត្រូវបានអនុម័តនៅក្នុងឆ្នាំ ២០១២ និងអត្រាយកពន្ធខ្ពស់ផងដែរ។ ការិយាល័យស្ថិតិអូស្ត្រាលីបានរាយការណ៍នៅក្នុងឆ្នាំ ២០២១ ថា មនុស្សពេញវ័យ ១ភាគ១០ ឬ ប្រមាណ ២លាន១សែននាក់ជាអ្នកជក់បារីប្រចាំថ្ងៃនៅក្នុងប្រទេសនេះ។
ខណៈដែលអត្រាជក់បានធ្លាក់ចុះនៅក្នុងប្រទេសជាច្រើន វានៅតែមានអត្រាខ្ពស់ខ្លាំងនៅក្នុងប្រទេសផ្សេងទៀត ជាពិសេសនៅតំបន់អាស៊ីអាគ្នេយ៍ និងផ្នែកមួយចំនួននៅអឺរ៉ុប។ នេះបើយោងតាមអង្គការសុខភាពពិភពលោក។
អង្គការសុខភាពពិភពលោកនិយាយថា «ការប្រើប្រាស់ថ្នាំជក់គឺជាមូលហេតុធំបំផុតក្នុងពិភពលោក សម្រាប់ការស្លាប់ក៏ដូចជាជំងឺមិនឆ្លងដែលអាចបង្ការបានជាមុននោះ»៕