កាលពីថ្ងៃអង្គារ ក្រុមអ្នកបោះឆ្នោតនៅក្នុងរដ្ឋញូវយ៉ក បានទៅកាន់ស្ថានីយ៍បោះឆ្នោតដើម្បីបោះឆ្នោតប្រធានាធិបតីបឋម។ ការស្ទង់មតិនៅមុនការបោះឆ្នោតនេះបង្ហាញឱ្យឃើញថា លោកស្រី ហ៊ីលឡារី គ្លីនតុន (Hillary Clinton) ខាងគណបក្សប្រជាធិបតេយ្យនិងលោក ដូណាល់ ត្រាំ (Donald Trump) ខាងគណបក្សសាធារណរដ្ឋនាំមុខខ្លាំងលើសពួកអ្នកប្រជែងរបស់គាត់។
ជ័យជម្នះដាច់ណាត់របស់លោកស្រីគ្លីនតុន ដែលជាអតីតរដ្ឋមន្ត្រីការបរទេសស.រ.អា. អាចជំរុញលោកស្រីឱ្យក្លាយទៅជាស្ត្រីទីមួយដែលនឹងទទួលការតែងតាំងជាបេក្ខនារីប្រធានាធិបតីរបស់គណបក្សធំមួយ។ ជ័យជម្នះរបស់លោក ត្រាំ ដែលជាមហាសេដ្ឋីអចលនទ្រព្យមានប្រាក់រាប់ពាន់លានដុល្លារដែលមិនធ្លាប់កាន់តំណែងតាមរយៈការបោះឆ្នោតសោះនោះ នឹងរក្សាក្តីសង្ឃឹមរបស់លោកក្នុងការទទួលការតែងតាំងជាបេក្ខជនរបស់គណបក្សសាធារណរដ្ឋនៅមុនមហាសន្និបាតរបស់គណបក្សក្នុងខែកក្កដា ដែលជាសន្និបាតដើម្បីតែងតាំងបេក្ខជនប្រធានាធិបតី។
ទាំងលោកស្រីគ្លីនតុល ទាំងលោក ត្រាំ មានចំណងទាក់ទងខ្លាំងជាមួយរដ្ឋញូវយ៉ក។ លោកស្រីគ្លីនតុន បានធ្វើរដ្ឋញូវយ៉កឱ្យទៅជារដ្ឋដែលលោកស្រីមានលំនៅដ្ឋាននៅទីនោះ ហើយលោកស្រីបានឈ្នះឆ្នោតពីរដងក្នុងការប្រកួតប្រជែងដើម្បីកាន់តំណែងជាសមាជិកាព្រឹទ្ធសភាស.រ.អា.ប្រចាំរដ្ឋនេះ។ ចំណែកឯលោក ត្រាំ វិញបានអភិវឌ្ឍអចលនទ្រព្យជាច្រើននៅក្នុងបូរី ញូវយ៉កហើយលោករស់នៅក្នុងអាគារខ្ពស់ប្រណីតមួយដែលដាក់ឈ្មោះលោកផ្ទាល់។
ការស្ទង់មតិនយោបាយថ្មីៗបំផុតបានបង្ហាញថា លោកស្រីគ្លីនតុន ដែលជាភរិយាលោកអតីតប្រធានាធិបតីប៊ីល គ្លីនតុន (Bill Clinton) មានការគាំទ្រមានតួលេខពីរខ្ទង់លើសលោក ប៊ែនី សាន់ឌ័រ (Bernie Sanders) សមាជិកព្រឹទ្ធសភាស.រ.អា.ប្រចាំរដ្ឋវើម៉ុន (Vermont) ដែលជាគូប្រជែងតែម្នាក់គត់របស់លោកស្រីនិងដែលបានវាយប្រហារដល់ចំណងទាក់ទងខាងហិរញ្ញវត្ថុរបស់លោកស្រីជាមួយប្រធានក្រុមហ៊ុនធំៗនៅវ៉លស្ទ្រីត (Wall Street)។
ការស្ទង់មតិនៅមុនការបោះឆ្នោតក្នុងរដ្ឋញូវយ៉កបង្ហាញថា លោក ត្រាំ មានការគាំទ្រប្រមាណ៥០ភាគរយក្នុងបណ្តាពួកអ្នកបោះឆ្នោតខាងគណបក្សសាធារណរដ្ឋដោយលោកនឹងមានជ័យជម្នះលើលោក ថិដ ឃ្រូស (Ted Cruz) សមាជិកព្រឹទ្ធសភាស.រ.អា.ប្រចាំរដ្ឋតិចសាស់ (Texas) និងលោកចន ខាស៊ិស (John Kasich) ដែលជាអភិបាលរដ្ឋអូហៃយ៉ូ (Ohio)៕