គណៈកម្មាធិការជាតិរៀបចំការបោះឆ្នោត (គ.ជ.ប) នឹងរាប់សន្លឹកឆ្នោតឡើងវិញតាមការិយាល័យចំនួន២៣ ស្ថិតក្នុងឃុំដូង ខេត្តស្វាយរៀង នៅថ្ងៃចន្ទនេះ ទៅតាមបណ្ដឹងរបស់គណបក្សកាន់អំណាច និងគណបក្សប្រឆាំង។ នេះបើយោងតាមសេចក្ដីប្រកាសព័ត៌មានរបស់ គ.ជ.ប. កាលពីថ្ងៃសៅរ៍។
លោក ហង្ស ពុទ្ធា អ្នកនាំពាក្យ គ.ជ.ប. បានប្រាប់ VOA នាថ្ងៃអាទិត្យនេះថា ឃុំដូង ដែលនឹងត្រូវរាប់សន្លឹកឆ្នោតឡើងវិញ មានការិយាល័យបោះឆ្នោតចំនួន២៣ការិយាល័យ។ លោកបន្ថែមថា គណបក្សប្រជាជនកម្ពុជា និងគណបក្សសង្គ្រោះជាតិបានប្តឹងសុំរាប់សន្លឹកឆ្នោតឡើងវិញ ដោយពួកគេអះអាងថា សន្លឹកឆ្នោតអត់បានការ មានចំនួនច្រើនពេក។
«បណ្តឹងនេះចេញពីគណបក្សប្រជាជនផង ចេញពីគណបក្សសង្គ្រោះជាតិផង។ គាត់មានការសង្ស័យថាសន្លឹកឆ្នោតដែលរាប់ទៅហ្នឹង សន្លឹកឆ្នោតកំណត់បានការ និងមិនបានការគឺមានភាពអត់ច្បាស់លាស់។ គាត់មានសង្ស័យថាអាអត់បានការហ្នឹងច្រើន»។
ទោះជាយ៉ាងណា លោក ហង្ស ពុទ្ធា មិនបានបញ្ជាក់លម្អិតពីចំនួននិងប្រភេទសន្លឹកឆ្នោតអត់បានការក្នុងឃុំដូងនោះទេ ដោយលោកប្រាប់ថា ត្រូវរងចាំរហូតដល់លទ្ធផលបោះឆ្នោតចេញជាផ្លូវការ គ.ជ.ប នឹងប្រកាសលម្អិតពីសន្លឹកឆ្នោតអត់បានការសរុបទូទាំងប្រទេស។
លទ្ធផលបណ្ដោះអាសន្ននៃការបោះឆ្នោតក្រុមប្រឹក្សាឃុំ-សង្កាត់ ដែលផ្សាយដោយ គ.ជ.ប. បង្ហាញថា គណបក្សសង្គ្រោះជាតិឈ្នះគណបក្សកាន់អំណាចក្នុងឃុំដូង ខេត្តស្វាយរៀង តែ៣សំឡេងប៉ុណ្ណោះ។ ក្នុងនោះគណបក្សសង្គ្រោះជាតិទទួលបាន ២,៥៩៩ សំឡេង រីឯគណបក្សប្រជាជនកម្ពុជាទទួលបាន ២,៥៩៦សំឡេង។
បើតាមគណៈកម្មាធិការជាតិរៀបចំការបោះឆ្នោត (គ.ជ.ប) គិតត្រឹមថ្ងៃទី៦ ខែមិថុនានេះ គ.ជ.ប ទទួលបានបណ្ដឹងចំនួន៧១ ក្នុងនោះ២៨បណ្ដឹង ប្ដឹងសុំរាប់សន្លឹកឆ្នោតឡើងវិញ ចំណែក៤៣បណ្ដឹងទៀត ប្ដឹងសុំដាក់ពិន័យលើអ្នកប្រព្រឹត្ដបទល្មើសព្រហ្មទណ្ឌ ដែលផ្ទុយនឹងច្បាប់បោះឆ្នោតឃុំ-សង្កាត់។ ក្នុងចំណោមបណ្ដឹងប្តឹងសុំរាប់សន្លឹកឆ្នោតឡើងវិញទាំង២៨ មាន១៨បណ្ដឹង ជារបស់គណបក្សប្រជាជនកម្ពុជា ប្ដឹងសុំរាប់សន្លឹកឆ្នោតតាមការិយាល័យមួយចំនួន ដូចជាក្នុងខេត្តបាត់ដំបង ភ្នំពេញ និងកំពង់ធំ។ ចំណែកគណបក្សសង្គ្រោះជាតិ ក៏បានប្ដឹងសុំរាប់សន្លឹកឆ្នោតតាមការិយាល័យមួយចំនួន ដូចជាក្នុងខេត្តស្ទឹងត្រែង កោះកុង សៀមរាប តាកែវ និងភ្នំពេញ។
លោក យឿង សុធារ៉ា មន្រ្តីច្បាប់ និងអង្កេតនៃអង្គការឃ្លាំមើលការបោះឆ្នោតនៅកម្ពុជា ហៅកាត់ថាខុមហ្វ្រែល ប្រាប់ VOA ថា បើតាមការអង្កេតរបស់លោក សន្លឹកឆ្នោតដែលកំណត់ថាបានការ និងមិនបានការ ហាក់មានភាពមិនប្រក្រតីច្រើន។ លោកបន្ថែមថា គ.ជ.ប គួរបណ្តុះបណ្តាលមន្រ្តីរបស់ខ្លួនឲ្យយល់ច្បាស់ពីប្រភេទនៃសន្លឹកឆ្នោតដែលបានការ និងមិនបានការទាំងនោះ ជៀសវាងការកំណត់ដែលធ្វើឲ្យមានការតវ៉ា។
«ត្រឹមតែលេខសូន្យ រង្វង់លេខសូន្យ អាហ្នឹងវាមានបញ្ហាអី? ឧទាហរណ៍គ្រីសវាស្នឹមៗ ជាស្នាមប៊ិចទៅហើយ មន្រ្តីការិយាល័យខ្លះក៏អត់រាប់ចូលដែរ។ គួរតែរាប់ចូល។ រឿងគំនូសសន្លឹកឆ្នោតនេះ គឺមានបញ្ហាមែនទែនក្នុងការបោះឆ្នោតឃុំ-សង្កាត់នេះ គឺថាមានការតវ៉ា ពីព្រោះវា អាចក្លាយជាសន្លឹកឆ្នោតមានប្រយោជន៍ នៅពេលដែលរាប់ នៅពេលដែលកំណត់ឲ្យបានត្រឹមត្រូវមួយ»។
បើតាមសេចក្តីប្រកាសព័ត៌មានមួយទៀតរបស់គណៈកម្មាធិការជាតិរៀបចំការបោះឆ្នោត (គ.ជ.ប) ចេញនៅថ្ងៃអាទិត្យនេះ គ.ជ.ប នឹងត្រួតពិនិត្យផ្ទៀងផ្ទាត់លទ្ធផលបោះឆ្នោតតាមឃុំ-សង្កាត់ទាំងអស់ឡើងវិញ ចាប់ពីថ្ងៃទី១៣ ខែមិថុនា នៅទីស្តីការ គ.ជ.ប ផ្ទាល់៕