រដ្ឋសភាដែលគ្រប់គ្រងទាំងស្រុងដោយគណបក្សប្រជាជនកម្ពុជា នឹងបើកសម័យប្រជុំមួយ នៅសប្តាហ៍នេះ ដើម្បីពិនិត្យនិងអនុម័តសេចក្តីព្រាងច្បាប់ធម្មនុញ្ញស្តីពីវិសោធនកម្មមាត្រាចំនួន៨ ដែលកំពុងមានភាពចម្រូងចម្រាស។ នេះបើតាមសេចក្តីប្រកាសព័ត៌មានរបស់រដ្ឋសភាចេញផ្សាយនៅថ្ងៃចន្ទនេះ។
កិច្ចប្រជុំរបស់រដ្ឋសភានេះនឹងធ្វើឡើងនៅថ្ងៃព្រហស្បតិ៍ ទី២៨ ខែកក្កដា ឆ្នាំ២០២២ ចាប់ពីម៉ោង៨ព្រឹក។ កិច្ចប្រជុំនេះនឹងមានការពិភាក្សានិងអនុម័តសេចក្តីព្រាងច្បាប់មួយចំនួនទៀតផងដែរ។
ការអនុម័តសេចក្តីព្រាងច្បាប់កែរដ្ឋធម្មនុញ្ញនេះត្រូវការសំឡេងពីរភាគបីនៃតំណាងរាស្រ្តសរុបទាំងអស់ចំនួន១២៥រូប។
កាលពីសប្តាហ៍មុន គណបក្សនយោបាយចំនួន៤ ដែលរួមមានគណបក្សភ្លើងទៀន គណបក្សប្រជាធិបតេយ្យមូលដ្ឋាន គណបក្សឆន្ទៈខ្មែរ និង គណបក្សកែទម្រង់កម្ពុជា បានដាក់ញត្តិរួមមួយច្បាប់ទៅរដ្ឋសភា ដើម្បីសុំឱ្យរដ្ឋសភាកុំអនុម័តសេចក្តីព្រាងច្បាប់ធម្មនុញ្ញថ្មីចុងក្រោយនេះ ដែលត្រូវបានគណៈរដ្ឋមន្រ្តីរបស់លោកនាយករដ្ឋមន្រ្តី ហ៊ុន សែន អនុម័ត កាលពីថ្ងៃទី៨ ខែកក្កដា ឆ្នាំ២០២២។ គណបក្សទាំងនោះចាត់ទុកការធ្វើវិសោធនកម្មថ្មីនេះនឹងធ្វើឱ្យប៉ះពាល់ធ្ងន់ធ្ងរដល់របបសភានិយម ដោយបន្ថយសិទ្ធិអំណាចតំណាងរាស្ត្រ និងបំបាត់សំឡេងគណបក្សដែលមានអាសនៈភាគតិចក្នុងសភា។
គណបក្សទាំង៤បញ្ជាក់ក្នុងញត្តិរួមនោះថា ការធ្វើវិសោធនកម្មរដ្ឋធម្មនុញ្ញលើកទី១០នេះ ធ្វើឱ្យបន្ថយអំណាចសភាជាតិ ដោយផ្តល់សិទ្ធិអំណាចទៅឱ្យគណបក្សនយោបាយ ដែលជាស្ថាប័នក្រៅរដ្ឋាភិបាលក្នុងការស្នើដោយផ្ទាល់ថ្វាយទៅព្រះមហាក្សត្រក្នុងការចាត់តាំងនាយករដ្ឋមន្ត្រី ដែលជាហេតុធ្វើឱ្យប៉ះពាល់ធ្ងន់ធ្ងរដល់របបសភានិយម ដោយបំបាត់សំឡេងគណបក្សដែលមានអាសនៈតិចក្នុងសភានិងដោយមិនគោរពគោលការណ៍ជាមូលដ្ឋាននៃលទ្ធិប្រជាធិបតេយ្យសេរីពហុបក្ស និងបន្ថយសិទ្ធិអំណាច និងតួនាទីអ្នកតំណាងរាស្ត្រ ដោយសារការបង្កើនចំនួនតំណាងរាស្ត្រក្នុងការធ្វើញត្តិបន្ទោសរាជរដ្ឋាភិបាលពី៣០នាក់ ទៅមួយភាគបី ឬស្មើនឹងសំឡេងតំណាងរាស្ត្រចំនួន៤២នាក់។
បើយោងតាមសេចក្តីព្រាងច្បាប់ធម្មនុញ្ញថ្មីចុងក្រោយបង្អស់នេះ ត្រង់មាត្រា១១៩ អត្ថន័យក៏ត្រូវបានស្នើកែប្រែ ដោយលុបចោលឃ្លាពាក់ព័ន្ធនឹងការស្នើពីប្រធាន ដោយមានមតិឯកភាពពីអនុប្រធានទាំងពីរនៃរដ្ឋសភា ក្នុងការស្នើតំណាងរាស្ត្រមួយរូបជានាយករដ្ឋមន្ត្រីឱ្យបង្កើតរដ្ឋាភិបាល។ មាត្រាថ្មីចែងថា តាមសេចក្តីស្នើពីគណបក្សដែលមានអាសនៈច្រើនជាងគេក្នុងរដ្ឋសភា ព្រះមហាក្សត្រចាត់តាំងវរជនមួយរូបជានាយករដ្ឋមន្ត្រី ឱ្យបង្កើតរាជរដ្ឋាភិបាល។ សេចក្តីស្នើពីគណបក្សដែលមានអាសនៈច្រើនជាងគេក្នុងរដ្ឋសភានេះ ត្រូវចម្លងជូនប្រធានរដ្ឋសភា៕