ក្រុមមេធាវី និងមេដឹកនាំសហជីពទ្រទ្រង់សិទ្ធិការងារក្រុមហ៊ុនណាហ្កាវើលដ៍(LRSU) ស្នើឱ្យតុលាការកំពូលទម្លាក់បទចោទប្រកាន់ ដែលពួកគេយល់ថា ជាការបំភ្លៃខុសអង្គហេតុ និងជាការបំពានច្បាប់លើសិទ្ធិធ្វើបាតុកម្មដោយសន្តិវិធី។
កាលពីព្រឹកថ្ងៃសុក្រនេះ ក្រុមមេដឹកនាំសហជីពក្រុមហ៊ុនណាហ្កាវើលដ៍ចំនួន៨នាក់ ក្នុងនោះគឺកញ្ញា ឈឹម ស៊ីថរដែលកំពុងជាប់ឃុំ និងអ្នកស្ថិតក្រៅឃុំគឺ កញ្ញាឈឹម សុខន អ្នកស្រី ឃ្លាំង សុបិន្តជាដើម បានបង្ហាញខ្លួននៅក្នុងសាលសវនាការដើម្បីចូលរួមដំណើរការជំនុំជម្រះបណ្តឹងសាទុក្ខពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ដែលផ្តើមចេញពីការធ្វើបាតុកម្មនានាកន្លងមកដើម្បីដោះស្រាយវិវាទការងារដែលមានរយៈពេលជាង៣ឆ្នាំជាមួយក្រុមហ៊ុនណាហ្កាវើលដ៍។
សហមេធាវីការពារក្តីរបស់ថ្នាក់ដឹកនាំសហជីពក្រុមហ៊ុនណាហ្កាវើលដ៍ទាំង៨រូបនោះគឺលោក សំ ចំរើន បានលើកឡើងនៅក្នុងសវនាការថា តុលាការជាន់ទាប ដែលចោទប្រកាន់កូនក្តីរបស់លោកថា បានបង្កសកម្មភាពញុះញង់ផ្សេងៗនោះ គឺមិនអាចទទួលយកបានទេតាមផ្លូវច្បាប់។
លោកបន្ថែមថា សាលដីការរបស់សាលាឧទ្ធរណ៍ដែលចាត់ទុកជាបានការកន្លងមក មិនបានគោរពតាមរដ្ឋធម្មនុញ្ញកម្ពុជា និងក្រមព្រហ្មទណ្ឌឡើយ ហើយការសម្រេចនោះគ្រាន់តែជាការយល់ឃើញរបស់តុលាការ និងអង្គហេតុដែលទទួលបានពីអាជ្ញាធរប៉ុណ្ណោះ។
លោកមេធាវី សំ ចំរើន ផ្តល់បទសម្ភាសន៍ដល់អ្នកសារព័ត៌មាននៅក្រៅរបងតុលាការកំពូល រាជធានីភ្នំពេញ កាលពីថ្ងៃទី២៦ ខែតុលា ឆ្នាំ២០២២។ (លាស់ លីបលីប/វីអូអេ)
លោកសំ ចំរើន និងសហភាតារបស់លោកប្រាំនាក់ទៀតបានបញ្ជាក់ក្នុងសវនាការទៀតថា ថ្នាក់ដឹកនាំសហជីពមិនបានប្រព្រឹត្តបទល្មើសញុះញង់ណាមួយដែលប៉ះពាល់ដល់សន្តិសុខសង្គម ហើយសកម្មភាពនៃការធ្វើកូដកម្មរបស់ពួកគេគឺធ្វើដោយសន្តិវិធី និងស្របតាមច្បាប់ការងារ។
កញ្ញាឈឹម សុខន ដែលចូលរួមសវនាការនៅព្រឹកថ្ងៃសុក្រនេះ បន្តអះអាងថា ក្រុមសហជីពរបស់អ្នកស្រីមិនបានធ្វើសកម្មភាព«ញុះញង់» ដូចការចោទប្រកាន់នោះទេ។
ក្រោយសវនាការនៅតុលាការកំពូលបានបិទបញ្ចប់ កញ្ញាប្រាប់អ្នកសារព័ត៌មានថា៖ «បំភ្លៃអង្គហេតុ ដោយសារអង្គហេតុរបស់ពួកយើងគឺយើងធ្វើកូដកម្ម ហើយកូដកម្មគឺយើងដើរគ្រប់នីតិវិធីនៃច្បាប់។ ច្បាប់គេចែងឱ្យយើងធ្វើម៉េច គឺយើងដើរនីតិវិធីរហូតដល់នីតិវិធីកូដកម្ម អ៊ីចឹងយើងធ្វើកូដកម្មស្របច្បាប់»។
កញ្ញា ឈឹម សុខន ថ្នាក់ដឹកនាំនៃសហជីពក្រុមហ៊ុនណាហ្គាវើលដ៍ ផ្តល់បទសម្ភាសន៍ដល់អ្នកសារព័ត៌មាននៅថ្ងៃទី២៦មេសា ឆ្នាំ២០២៤។ (ស៊ឹម ចាន់សំណាង/វីអូអេ)
បើតាមការរំពឹងរបស់កញ្ញាឈឹម សុខន តុលាការកំពូលនឹងផ្តល់ភាពស្អាតស្អំដល់ថ្នាក់ដឹកនាំសហជីពនៃក្រុមហ៊ុនណាហ្កាវើលដ៏ និងសម្រេចដោះលែងកញ្ញាឈឹម ស៊ីថរ ឱ្យមានសេរីភាពវិញ។
កញ្ញាបន្ថែមថា៖ «មកដល់ថ្ងៃហ្នឹង ខ្ញុំនៅតែទាមទារឱ្យតុលាការទម្លាក់បទចោទ ហើយសងភាពស្អាតស្អំឱ្យពួកខ្ញុំ ព្រោះពួកខ្ញុំអត់បានធ្វើអ្វីដូចដែលគាត់ចោទទេ។ អ្វីដែលពួកខ្ញុំធ្វើគឺកូដកម្មដែលមានចែងក្នុងផ្លូវច្បាប់ ហើយជារួមទាំងអស់គ្នា មានការយល់ព្រមពីសមាជិក [គឺ]វាអត់បានញុះញង់អីទេ»។
លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូផ្តល់បទសម្ភាសន៍ក្នុងរាជធានីភ្នំពេញនាថ្ងៃទី២៦ ខែមេសា ឆ្នាំ២០២៤។ (ស៊ឹម ចាន់សំណាង/វីអូអេ)
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ដែលបានចូលឃ្លាំមើលសវនាការនាព្រឹកថ្ងៃសុក្រនេះ ប្រាប់អ្នកសារព័ត៌មាននៅក្រៅតុលាការកំពូលថា មេធាវីការពារក្តីរបស់មេដឹកនាំសហជីពនៃក្រុមហ៊ុនណាហ្កាវើលដ៏ បានទាមទារឱ្យចៅក្រមជំនុំជម្រះក្តីទម្លាក់បទចោទប្រកាន់លើជនជាប់ចោទទាំង៨នាក់ ព្រោះករណីនេះ គឺជាវិវាទការងារ មិនមែនជាបទព្រហ្មទណ្ឌនោះទេ។
លោកថ្លែងថា៖ «អ៊ីចឹងយើងមើលទៅការសន្និដ្ឋានរបស់មេធាវីទាំង៦រូបហ្នឹង គឺអង្គហេតុ អង្គច្បាប់ ដែលបានកាត់ឱ្យកូនក្តីរបស់គាត់ជាប់ពន្ធនាគារ គឺមិនសមហេតុផល ហើយមិនមានភស្តុតាងគ្រប់គ្រាន់»។
វិវាទការងាររួម គួរតែដោះស្រាយតាមច្បាប់ការងារ ដោយមិនគួរមានការចោទប្រកាន់បទល្មើសព្រហ្មទណ្ឌនោះទេ ហើយបើតុលាការនៅបន្តយកសំណុំរឿងនេះមកដោះស្រាយនោះ វិវាទនេះអូសបន្លាយពេលយូរតទៅទៀត។ នេះបើតាមលោក អំ សំអាត។
កាលពីថ្ងៃទី១៩ ខែតុលា ឆ្នាំ២០២៣ សាលាឧទ្ធរណ៍ភ្នំពេញបានសម្រេចតម្កល់សាលក្រមរបស់សាលាដំបូងរាជធានីភ្នំពេញ ទុកជាបានការ និងនាំខ្លួន កញ្ញា ឈឹម ស៊ីថរ មេដឹកនាំសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្កាវើលដ៍ (LRSU) ទៅឃុំខ្លួនបន្តនៅពន្ធនាគារ បន្ទាប់ពីត្រូវបានសាលាដំបូងផ្តន្ទាទោសឱ្យជាប់ពន្ធនាគាររយៈពេលពីរឆ្នាំ។
ក្រោយពីស្តាប់សេចក្តីសន្និដ្ឋានរបស់មេធាវីការពារក្តី និងតំណាងមហាអយ្យការនៃតុលាការកំពូល លោក និល ណុន ប្រធានក្រុមប្រឹក្សាជំនុំជម្រះ បានប្រកាសនាពេលជិតបិទបញ្ចប់សវនាការថា តុលាការកំពូលនឹងប្រកាសសាលដីការសម្រេចលើសំណុំរឿងរបស់ក្រុមមេដឹកនាំសហជីពក្រុមហ៊ុនណាហ្កាវើលដ៍នៅថ្ងៃទី៣ ខែឧសភា ឆ្នាំ២០២៤ ខាងមុខ៕