ពួកប្រឆាំងការគ្រប់គ្រងពួកយោធានៅក្នុងប្រទេសមីយ៉ាន់ម៉ា បានប្រារព្ធខួបនៃការរឹបអូសយកអំណាចរបស់ពួកយោធាកាលពីថ្ងៃទី១ ខែកុម្ភៈឆ្នាំមុន ដោយការធ្វើកូដកម្មនៅទូទាំងប្រទេសនៅថ្ងៃអង្គារនេះ ដើម្បីបង្ហាញនូវកម្លាំងនិងសាមគ្គីភាពរបស់ខ្លួននៅពេលដែលមានការព្រួយបារម្ភអំពីអ្វីដែលបានក្លាយជាជម្លោះហិង្សាដើម្បីដណ្តើមអំណាចកាន់តែខ្លាំង។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AP។
«កូដកម្មស្ងាត់ស្ងៀម» មួយបានធ្វើឲ្យគ្មានមនុស្សដើរនៅតាមផ្លូវនានានៅក្នុងទីក្រុងនិងទីប្រជុំជនរបស់មីយ៉ាន់ម៉ា ដោយមនុស្សស្ថិតនៅផ្ទះហើយកន្លែងធ្វើអាជីវកម្មបិទទ្វារចាប់តាំងពីម៉ោង១០ព្រឹករហូតដល់ម៉ោង៤រសៀល។
នៅក្នុងទីក្រុងរ៉ង់ហ្គូន ដែលជាទីក្រុងធំជាងគេបង្អស់នៅក្នុងប្រទេសនិងទីកន្លែងផ្សេងទៀត រូបថតនៅលើបណ្តាញព័ត៌មានសង្គម បានបង្ហាញថា តាមផ្លូវដែលជាធម្មតាមមាញឹក នៅពេលនេះស្ទើរតែគ្មានមនុស្ស។
ខួបនេះក៏បានទាក់ទាញការយកចិត្តទុកដាក់ពីអន្តរជាតិ ជាពិសេសពីប្រទេសលោកខាងលិចដូចជាសហរដ្ឋអាមេរិកដែលបានរិះគន់ពីការដណ្តើមកាន់កាប់អំណាចរបស់យោធា។
នៅក្នុងសាររបស់ប្រធានាធិបតីសហរដ្ឋអាមេរិកលោក Joe Biden បានអំពាវនាវឲ្យពួកយោធាប្រែក្រឡាស់ចំណាត់ការរបស់ខ្លួន ដោះលែងមេដឹកនាំស៊ីវិលដែលបណ្តេញចេញពីអំណាចគឺលោកស្រី Aung San Suu Kyi ហើយនឹងអ្នកទោសផ្សេងៗទៀតនិងចូលរួមនៅក្នុងការសន្ទនាប្រកបដោយខ្លឹមសារដើម្បីធ្វើឲ្យប្រទេសមីយ៉ាន់ម៉ាឆ្ពោះទៅកាន់មាគ៌ាប្រជាធិបតេយ្យវិញ៕